Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ma 'o Yesus 'una wotagi 'o Zaitun ma gigiede.

² Ma bibinoka 'o ngoru-ngorumika 'una wotagioli ma Jou 'awi Woaka, de 'o nyawa manga gudai yaika 'unaka. 'O Yesus wogogeruku de womulaenge wakidotoko.

³ Ma 'orasi ge'ena 'o 'agamaka yodoto-dotoko de 'o Farisioka misidamake 'o ngeweka mimoi mosongou so mi'asa 'o Yesusika. 'Ona yosuloko 'o ngeweka gumuna moma'okode manga sigoronaka,

⁴ Ge'enaka de kayongosekau 'o Yesusika, "'Aba Guru, 'o ngeweka numuna misidamake mosongou yomasi'iduoka de 'o nyawa manga rokata.

⁵ 'O Musa 'awi besesongoka naga 'o 'atorangi konaneda, nako 'o ngeweka koge'ena ge'ena salingou yakiteto sigado yakisongene. Ne'ena kokia moteke to ngona 'Aba 'ani di-dibangi?"

⁶ 'Ona yosano koge'ena ma ngale yomau witaili, la 'ona 'idadi wisisala. Ma 'o Yesus kawogogere de womakuduruku de wotuli-tulisi 'o tonauku de 'awi ra-raga.

⁷ Gee 'ona yosano kayogegotokau, de 'awi saeke wamomiki so kawongosekau 'onaka, "Nginioka naga gee nago'ona yomamaoku manga sowono koi'iwa, madaka la 'onasi 'isira miteto munaka."

⁸ Ge'ena 'iduanga de 'o Yesus womakudurukoli de wotuli-tulisi 'o tonauku.

⁹ Gee yo'isenoka 'o Yesus koge'ena wongose, de 'ona moi-moi yomakoki'aikokau ge'enaka, 'ikurue gee yope-pereki. So ma rai ge'enaka ka 'o Yesusou de 'o ngeweka gumuna gee kamoma'okodesi ge'enaka.

¹⁰ Ge'enaka de 'o Yesus 'awi saeke wamomikie de wongose 'o ngewekaka gumuna, "'Ona yoodumu kiakau? Komoiwa nihukumu?"

¹¹ Muna mosango, "Ko'uwa 'Aba." Ge'enaka de 'o Yesus wongose, "Ngoi mita kotonihukumuwa. Ne'ena notagiou de 'uwau 'o sowono nodiaioli."

¹² 'O Yesus wobicarali 'o nyawa yoku-kudaika wongose 'ato, "Ngoi ne'ena 'o darangi 'o dunia ma nyawaka. 'O nyawa gee yomoteke de de ngoi, 'ona 'asa yotagi-tagi ko 'o sakautuokawa, ma to 'ona de manga darangi gee yakisi'asa 'o 'ahu 'ika-kakalika."

¹³ 'O Farisioka kayongosekau 'unaka, "Ne'ena ka ngona ma sirete nomasisakisii ma ngale ngona. Ma 'ani demo ge'ena koitiaiwa de 'o nyawa yakisiliba."

¹⁴ 'O Yesus wosango, "Ngaro ka ngoi ma sirete tomasisakisii ma ngale ngoi, ma 'ai demo ge'ena 'itiai, sababu ngoi tanako kiano toboa de kiaka totagi. Ngini konianakowa ngoi kiano toboa de kiaka totagi.

¹⁵ Ngini niakihukumu 'o nyawa ka de 'o nyawa ma di-dibangi; ngoi komoiwa takihukumu.

¹⁶ Ma nako ngoi takihukumu 'o nyawa, 'ai butusangi ge'ena 'itiai, sababu ngoi kotomatengokawa. 'Ai Dea gee woisulo-suloko naga de de ngoi.

¹⁷ Naga 'ania besesongo ma bukuoka 'isitulisuku konee: ''O sakisii gee ma gou-goungu 'itiai ge'ena salingou yamididi, de yamididi go'ona manga demo kaimatero.'

¹⁸ Gee miosisa-sakisii ma ngale ngoi ge'ena mimididi, ge'ena la ngoi de 'ai Dea gee woisulo-suloko."

¹⁹ De 'ona kayongosekau, "'Ani Dea gu'una kiaka?" 'O Yesus wosango, "Ngini koninakowa ngoi de mita 'ai Dea. Nako ngini ninako ngoi, ma raiokau wininako mita 'ai Dea."

²⁰ Ge'ena 'iodumu 'o Yesus wosidemo ma 'orasi 'una wodotoko ma Jou 'awi Woaka 'o sadakaa ma peti ma dateoka. Ma komoiwa witagoko sababu ma 'orasi koya'adonuawasi.

²¹ 'O Yesus kawongosekauoli 'onaka, "Ngoi 'asa totagi, de ngini ninonu ngoi, ma ngini 'asa niosongene nia sowono ma sigoronaka sababu konimaogoruwa 'o sowono niodiai. Kiaka naga ngoi totagi, ngini konia'akunuwa niaika."

²² So 'O Yahudioka manga balu-balusu kayongosekau, "Poilia 'una womau womaso-songene, sababu 'una wongose 'ato, ''O ngii gee kiaka ngoi totagi, ngini konia'akunuwa niaika.'"

²³ Ge'enaka de 'o Yesus kawongosekau 'onaka, "Ngini nia 'asali 'o duniano, ma ngoi dakuuku 'o sorogaaku. Ngini 'o dunia ma mau-mau niparetano ma ngoi 'o sorogaa ma mau-mau 'iparetano.

²⁴ Ge'enau ma sababu so kangano tongose 'ato, dua niosongene sababu koniamadawa 'ania sowono. De ma goungu dua niosongene 'ania so-sowono ma sigoronaka, nako koniongakuwa 'ato ngoi ne'ena 'una gee wisironga 'NGOI NAGA'."

²⁵ De 'ona yosano, "Ngona ne'ena doka ma kia?" 'O Yesus wosango, "Tei! Ge'ena tinisidemokau kamadi-disirakasi!

²⁶ 'O gudaiosi naga 'idadi tinisidemo de 'o gudaiosi 'idadi tinisisala. Ma 'una gee woisulo-suloko ge'ena ma gou-goungu 'idadi powingaku, de ngoi tosihabari 'o duniaka, 'okia naga gee to'isenino 'unano."

²⁷ 'Ona koyasahewa 'ato 'una wobi-bicara ge'ena ma dumutu ma Dea.

²⁸ Ge'enau so 'o Yesus kawongosekau 'onaka, "Dua gee ngoi 'o Nyawa ma Ngowaka nisitedenokau 'o salipoka, 'asa de nianako 'ato, 'Ngoi ge'ena 'unau gee 'isironga: NGOI NAGA', de ngini 'asa nianako 'ato koi'iwa tadiai moteke ka to ngoi 'ai mau ma sirete. Ngoi tositotara duga ka 'okia naga gee 'ai Dea woisidoto-dotokino.

²⁹ De 'una woisulo-suloko gee, naga de de ngoi. 'Una koma'iwa woimadaka tomatengoka, sababu ngoi kaitaurika tadiai 'okia naga gee 'awi singina yasanangi."

³⁰ 'O Yesus wosidemoka ge'ena 'iodumu, de manga gudai yongaku 'unaka.

³¹ Ge'enaka de 'o Yesus kawongosekau 'o Yahudi ma nyawaka gee yongaku-ngakuokau 'unaka, "Nako ngini nio'ahu moteke 'ai do-dotoko, ngini ma gou-goungu 'ai do-domoteke.

³² So ngini 'asa nianako 'okia gee 'iti-tiai ma Jo'oungu ma Dutuno, de ge'enau so ngini ko 'o yongosuawau."

³³ 'Ona kayongosekau, "Ngomi ne'ena 'amia 'asali 'o Abrahamuno. Koma'iwasi ngomi miodadi yongosi nago'onaka naga bato! 'Okia ni dumutu nongose 'ato ngini 'asa nisipidili?"

³⁴ 'O Yesus wongose 'onaka, "'Ai demo ne'ena posironga 'itiaioka. 'O nyawa gee 'o sowono yodi-diai, 'ona ge'ena 'o sowono ma yongosi.

³⁵ De wimoi woyongo-yongosi ge'ena 'awi hak 'ita-tatapu koi'iwa 'o woa ma dodaka, ma 'o ngowaka ma dutu ge'ena kaisi'ado-'adonika 'awi hak de ma 'ena.

³⁶ Ge'enau so nako ngoi ma Jo'oungu ma Dutu wi Ngowaka tinisipidili nia sowonoka, ge'ena ngini ma gou-goungu konioyongosikawau.

³⁷ Ma goungu ngoi tanako ngini ne'ena 'ania 'asali 'o Abrahamuno. Ma ngini niomau ngoi nito'oma, sababu niooluku niamoteke 'ai do-dotoko.

³⁸ 'Okia naga gee tamake 'ai Deaka, ge'enau tosidemo. Ma ngini niadiai 'okia naga gee to ngini nia dea nidotoika."

³⁹ 'Ona yosango, "To ngomi 'amia dea ge'ena 'o Abraham." 'O Yesus wongose, "Nako ma gou-goungu ngini 'o Abraham 'awi ngowa-ngowaka, ma raiokau ngini niadiai 'isoka gee 'o Abraham wadi-diai.

⁴⁰ Ngoi tinisitotara 'okia naga 'iti-tiai gee ma Jouoka to'isenino, ma ngini niomau ngoi nito'oma. 'O Abraham kowodiaiwa 'isoka koge'ena!

⁴¹ Ngini niadiai 'okia naga gee 'ania dea ma sirete yadi-diai." 'Ona yosango, "Ngomi ko 'o mosolesuwa ma ngowaka. To ngomi 'amia dea duga kawomatengoka ge'ena la ma Jo'oungu ma Dutu ma sirete."

⁴² Ge'enaka de 'o Yesus kawongosekau 'onaka, "Nako ma Jo'oungu ma Dutu ge'ena to ngini nia dea, ma raiokau ngini nisibosono ngoi, sababu ngoi toboa ma Jo'oungu ma Dutuno. Ngoi toboa ko de to ngoiwa ma sirete 'ai mau, ma 'una woisuloko.

⁴³ 'Okia ma sababu so koniasahewa 'okia naga gee tosidemo-demo? Sababu ngini niooluku niosigisene 'ai do-dotoko.

⁴⁴ To ngini 'ania dea ge'ena 'o Tokata ma Koana, de ngini niomau niamoteke to 'ena ma mau. Ka ma sirasi, 'o Tokata ma Koana ge'ena 'ito-to'oma. 'Ena koma'iwa yamoteke 'iti-tiai, sababu 'enaka koi'iwa 'o loa. Nako 'ena 'ieluku, ge'ena yadaene, sababu 'ena ma biasau. 'Ena ge'ena 'ielu-eluku, de 'o sagala ngeluku ma titi.

⁴⁵ Ma ngano ngoi tositotara 'iti-tiai, so ngini koniongakuwa ngoino.

⁴⁶ Naga nginioka nago'ona 'idadi yosinyata 'ato ngoi tosowono? Nako tositotara 'iti-tiai, 'ido'oa so ngini koniongakuwa ngoino?

⁴⁷ 'O nyawa gee manga 'asali ma Jo'oungu ma Dutuno, ge'ena yosigisene ma Jo'oungu ma Dutu 'awi demo. Ma ngini ko ma Jo'oungu ma Dutunowa, ge'enau so ngini niooluku niosigisene."

⁴⁸ 'O Yahudi ma nyawa-nyawa go'ona yosango 'o Yesusika kayongosekau, "Ma goungu yadaene gee miongose 'ato ngona 'o Samaria ma nyawa gee 'o tokata nidongosamuku!"

⁴⁹ 'O Yesus wosango, "Ngoi ko 'o tokatuwa 'idongosamuku. Ngoi towihoromati 'ai Dea, ma ngini konihoromatiwa ngoino.

⁵⁰ Ngoi kotanonuwa ka ngoi ma sirete 'isitedene. Ma naga wimoi wadiai ma ngale ngoi 'isitedene, de 'unau 'awi butusangi 'iti-tiai.

⁵¹ Tinisidemo ne'ena, 'o nyawa gee yamoteke 'ai demo, 'ona koyosongenuawau kaisi'ado-'adonika."

⁵² Ge'enaka de 'o Yahudi ma nyawa-nyawa kayongosekau 'o Yesusika, "Ne'ena ngomi mianako ma gou-goungu ngona 'o tokata nidongosamuku! 'O Abraham ma sirete wosongenokau, koge'enali mita 'o nabii yoodumu. Ma ngona nongose, ''O nyawa gee yamoteke 'ai demo, 'ona kaisi'ado-'adonika koyosongenuawau.'

⁵³ 'O Abraham ma sirete wosongenokau, de 'o nabii mita yokokisongenokau; ngona ne'ena nomamaoku ma kia? 'O Abraham to ngomi mia dea 'una ge'ena 'ifoloi wodaduie de de ngona!"

⁵⁴ 'O Yesus wosango, "Nako ngoi tanonu ka ngoi ma sirete 'isiarene, 'o siarene ge'ena ma ngale koi'iwa. Gee woiho-horomati ge'ena la 'ai Dea gee ngini niongose 'ato ma Jo'oungu ma Dutu gee winisuba-suba,

⁵⁵ 'ena momongo kowininakowa 'una. Ma ngoi towinako. Nako ngoi tongose 'ato ngoi kotowinakowa, ge'ena ngoi toelu-eluku 'isoka nginioli. Ngoi towinako 'una de tosingounu 'awi demo.

⁵⁶ 'Ania dea 'o Abraham womorene ma sala gee dua wamake 'ai bo-boa ma wange. De 'una wamakekau de womorene!"

⁵⁷ Ge'enaka de 'o Yahudi ma nyawa kayongosekau 'o Yesusika, "'Ani 'umuru koya'adonuawasi 'o taunu nagi motoa de wonimakekau 'o Abraham?"

⁵⁸ 'O Yesus wosango, "Tinisidemo ne'ena: 'O Abraham kowi'iwasi 'ena ngoi nagau."

⁵⁹ Ge'enaka de 'o teto yo'ese la yomau witeto, ma 'o Yesus woma'iunu de womagorakokau ma Jou 'awi Woaka.

Yohanes

Video Yohanes 8

Ikuti Kami:

KONTAK | PARTISIPASI | DONASI