Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Naꞌuk Yesus nti vuar Zaitun.
2 Varverak sumatan, na Ia nti ewal Yahudi rira Rahan Dawan Falurut, na tamata rivun rma ma rtuan Ia. Ia ndoku ma nair ira.
3 Naꞌut inyai, na Yahudi rira dawan ovi rair Ubu Ni inukun ra ovu tamata Yahudi ovi rtali sidovung Farisi rovun vata i nsifa roak ti verin Ia. Tamata ra rtaha nala lahir vata yai naꞌut i ntuba ovu tamata i wol awan verin ia. Ira rsinir ia ma ndiri tamata rivun avyai fruarira ra.
4 Ba rfalak verin Yesus ne, “Tuan Guru, amtaha nala lahir vata ini naꞌut i ntuba ovu brana i wol awan verin ia.
5 Musa ni inukun ra rfalak ne, vata i notu wean inyai, musti tala vatu ma al tatev-fedan ia. Ba Bapa munovak wean inba naꞌa afa ini?”
6 Ira rfalak wean inyai ma al rlabir teman Ia, boma bisma rfasala Ia. Naꞌuk Yesus ntoak Ia ma ntulis ovu liman tanan a naꞌa lanun.
7 Ira rkiwal ma rorat Ia, ba ndiri ma nfalak verin ira ne, “Tamata iki watan tali mia, wean i wol ni salasilan lahir, na ula ia ma nala vatu al nteva vata ini.”
8 Yesus ntoak ewal vali Ia ma ntulis naꞌa lanun.
9 Naꞌuk ti ma rarenar afa i Yesus nfalak a, na rti talik wan yai. Tamata ovi tuvu roak ira rti ula ira, beti tuvmarmuri ra, ma teran aꞌuk Yesus ovu vata yai rnaꞌa wan yai.
10 Nata Yesus ndiri lahir ma nfalak verin vata yai ne, “Titi, tamata avyai rti ba roak? Wol tamata isa vali nukun oa?”
11 Vata yai nfalak ne, “Duilaꞌa, wol tamata rukun yaꞌa.” Ba Yesus nfalak ne, “Yaꞌa vali wol ukun oa. Ba mewal oa, ovu tali amar ini, na deka motu salasilan kikyai.”
12 Yesus nangrihi ewal verin tamata rivun avyai ma nfalak ne, “Yaꞌa ini lyawan a verin tamata ra naꞌa lanit ivavan a. Tamata iki watan norang Yaꞌa, na ia veka wol nbana naꞌa dedan ralan, naꞌuk ia veka ni lyawan i nala vavaꞌat verin tamata ra.”
13 Tamata Farisi avyai rfalak verin Ia ne, “Oa kaꞌi fwamalik watan Oa, ba Mu afa ovi fwalak ra wol kena.”
14 Yesus nfalak verin ira ne, “Velik ne kaꞌi ufamalik watan Yaꞌa, naꞌuk Ning afa ovi ufalak ra kena. Tevek Yaꞌa ukaꞌa ne, utali inba ovu veka uti inba, naꞌuk mia wol mkyaꞌa ne, utali inba ovu veka uti inba.
15 Mia fyaleka inukun verin tamata ra ovu adat ovi tamata ra baꞌi rala al rfaleka inukun verin tamata liak ra. Yaꞌa wol ufaleka inukun verin tamata isa vali.
16 Naꞌuk wean i ufaleka inukun verin tamata ra, na otu ovu ni malolan a, tevek wol aksa Yaꞌa ufaleka inukun verin ira, naꞌuk Ia i nsinir Yaꞌa novu vali naꞌut i ufaleka inukun verin tamata ra.
17 Naꞌa bira inukun ra rtulis ne, wean i tamata irua rira afa ovi rfalak ra wearira isa, na rira afa ovi rfalak avyai kena.
18 Yaꞌa kaꞌi ufamalik Yaꞌa, ovu Yamang i nsinir Yaꞌa nfamalik vali Yaꞌa.”
19 Ba ira rfalak verin Ia ne, “Yamam a nanaꞌa ba?” Yesus nfalak ne, “Mia wol mkyaꞌa Yaꞌa ovu vali wol mkyaꞌa Yamang a. Wean i mkyaꞌa Yaꞌa, na mia veka mkyaꞌa vali Yamang a.”
20 Yesus nfalak afa avyai munuk naꞌut i nsiair naꞌa Yahudi rira Rahan Dawan Falurut ni lean a, nebang wan i tamata ra rfadoku rira persembahan ra naꞌa. Naꞌuk wol tamata isa vali ntaha Ia, tevek wol naran Ni amar a obin.
21 Yesus nfalak ewal verin tamata rivun avyai ne, “Yaꞌa veka uti verin Yamang a ovu mia veka mdyava Yaꞌa, naꞌuk mia wol bisma miti wan i uti a, ovu veka myata naꞌa bira salasilan ra.”
22 Dawan Yahudi avyai rfalak ne, “Beta ne Ia mane nfedan tenan a, bi nfalak ne, ‘Naꞌa wan i uti a, mia wol bisma miti.’”
23 Ba Yesus nfalak verin ira ne, “Mia mtyali fun ini, naꞌuk Yaꞌa utali ratan. Mia mtyali lanit ivavan ini, naꞌuk Yaꞌa wol utali lanit ivavan ini.
24 Wean inyai, bi inlangin a ufalak verin mia ne, mia veka myata naꞌa bira salasilan ra. Wean i wol myorang ne, Yaꞌa ini tamata i ufalak roak yai, na mia veka myata naꞌa bira salasilan ra.”
25 Ba rorat Ia ne, “Oa ini iki mngaꞌun?” Yesus nfalak verin ira ne, “Yaꞌa ufamalik lan roak verin mia ne, Yaꞌa ini iki!
26 Yaꞌa mane ufalak afa rivun verin mia, ovu ufaleka inukun verin mia. Naꞌuk Ia i nsinir Yaꞌa Ni afa ovi nfalak ra kena lalawatan. Yaꞌa ufamalik afa ovi urenar tali Ia verin tamata ra naꞌa lanit ivavan a.”
27 Ira wol rfan-aran ne, Yesus nfamalik Yaman a verin ira.
28 Wean inyai, bi Yesus nfalak ne, “Wean i fyasaka Yaꞌa, Tamata Yanan Yaꞌa, beti mkyaꞌa ne, Yaꞌa ini tamata i ufalak roak yai, ovu mkyaꞌa vali ne, afa ovi otu ra wol mane rtali watan Yaꞌa. Naꞌuk ufamalik watan afa ovi Yamang a nair roak verin Yaꞌa.
29 Ia i nsinir Yaꞌa nfatuang lalawatan Yaꞌa. Ia wol nsiꞌik watan ma aksa Yaꞌa, tevek otu lalawatan afa ovi rotu ma ralan lolin.”
30 Ti ma Yesus nangrihi munuk roak wean inyai, na tamata rivun rorang Ia.
31 Ba Yesus nfalak verin tamata Yahudi ovi rorang Ia ne, “Wean i myot-orang lalawatan afa ovi ufalak ra, na mia myeluk Ning tamata mngaꞌun ovi rorang Yaꞌa.
32 Mia veka mkyaꞌa afa ovi kena ra, ba afa avyai veka rfatalik mia.”
33 Ira rfalak verin Ia ne, “Abraham ubun-nusin ami, ovu wol fasa vali obin ameluk tamata sansinir. Afakinimi fwalak ne, veka rfatalik ami?”
34 Yesus nfalak verin ira ne, “Afa i ufalak verin mia ini, kena urun! Tamata iki watan notu salasilan, na inyai nfaturu ne, salasilan nfareta roak ia, wean tamata isa nfareta ni sansinir.
35 Tamata sansinir isa wol nanaꞌa lalawatan rahan teta isa, naꞌuk tamata i rarali ia tali rahan teta yai, nanaꞌa lalawatan rahan yai.
36 Ba wean i Ubu Yanan a nfatalik mia tali bira salasilan ra, na kena urun ne, afa ovi lan rfareta mia, wol rfaret-nala roak mia.
37 Yaꞌa ukaꞌa ne, Abraham ubun-nusin mia, naꞌuk mia mdyava lingaꞌan mane fyedan Yaꞌa, tevek mifena ma mtyorung Ning vaivatul ra.
38 Yaꞌa ufamalik afa ovi Yamang nfaturu roak verin Yaꞌa. Naꞌuk mia myot-orang watan afa ovi mryenar tali yamabira a.”
39 Ira rfalak verin Ia ne, “Ami yamamami verin Abraham.” Yesus nfalak verin ira ne, “Wean i mia yamabira verin Abraham, na bira afa ovi myotu ra veka wean lahir ia.
40 Yaꞌa ufamalik afa kena ovi urenar tali Ubu, naꞌuk mia mdyava lingaꞌan mane fyedan Yaꞌa. Abraham wol notu wean inyai.
41 Mia myot-orang watan afa ovi yamabira notu a.” Ira rfalak ne, “Tamata ovi rtuba ovu tamata ovi wol awarira verin ira wol yanarira ami! Ubu aꞌuk saꞌi neluk Yamamami.”
42 Yesus nfalak verin ira ne, “Wean i Yamabira verin Ubu, na mia veka mlyobang urun Yaꞌa, tevek utali Ia uma lanit ivavan a. Yaꞌa wol kaꞌi usinir Yaꞌa ma uma, naꞌuk Ia nsinir Yaꞌa ma uma ini.
43 Afakinimi wol fyan-aran afa ovi ufalak ra? Mia wol fyan-aran, tevek mifena ma mryenar Ning vaivatul ra.
44 Yamabira verin nitdawan a, ovu inabira ma myot-orang watan ni ininan ra. Tali lalan a, nitdawan nsifedan lalawatan, ovu ni vavaꞌat wol nanaꞌa afa ovi kena ra, tevek nafena lahir ma notu afa ovi kena ra. Wean i nsiklabir, na notu watan afa ovi ralan nfalak a, tevek ia baꞌi nsiklabir, ovu afa siklabir ra munuk rtali ia.
45 Ba mia wol myorang Yaꞌa, tevek ufalak afa ovi kena ra.
46 Tamata iki tali mia bisma nfaturu ne, otu salasilan? Wean i ufalak afa ovi kena ra, na afakinimi wol myorang Yaꞌa?
47 Tamata iki watan ntali Ubu, na ia nrenar Ubu Ni vaivatul ra. Naꞌuk mia wol mtyali Ubu, ba mifena ma mryenar Ni afa ovi nfalak ra.”
48 Tamata Yahudi avyai rfalak verin Yesus ne, “Kena ami, wean i amfalak ne, tamata Samaria Oa, ovu nait sian nleal Oa!”
49 Yesus nfalak ne, “Nait sian wol nleal Yaꞌa. Yaꞌa alang Yamang a, naꞌuk mia fyalak sian Yaꞌa.
50 Yaꞌa wol udava ma tamata ra rfadawang Yaꞌa. Naꞌuk Ubu inan ma tamata ra ralang Yaꞌa, ovu Ia i nfaleka inukun verin tamata ra.
51 Afa i ufalak verin mia ini, kena urun! Tamata iki watan not-orang Ning vaivatul ra, na ia veka wol nmata kakiwal.”
52 Tamata Yahudi avyai rfalak verin Ia ne, “Fiang ini amkaꞌa roak ne, nait sian nleal Oa. Tevek Abraham nmata roak ovu nabi ra rmata vali roak, naꞌuk Oa fwalak ne, tamata iki watan not-orang Mu vaivatul ra, na ia veka wol nmata kakiwal.
53 Abraham nmata roak ovu nabi ra rmata vali roak, na Oa ini iki? Oa fwikir ne, Mu dawan nlia yamamami Abraham?”
54 Yesus nfalak ne, “Wean i Yaꞌa kaꞌi ufadawang tenang a, na afa yai wol ihin akataka. Naꞌuk Yamang i fyalak ne, neluk Ubu verin mia, kaꞌi nfadawang Yaꞌa.
55 Velik ne mia wol mkyaꞌa Ia, naꞌuk Yaꞌa ukaꞌa Ia. Wean i ufalak ne, wol ukaꞌa Ia, na Yaꞌa usiklabir roak wean mia. Naꞌuk ukaꞌa Ia, ovu ot-orang Ni vaivatul ra.
56 Yamabira Abraham ralan lolin urun, tevek ia veka nsiꞌik Ning amar i uma a. Ia nsiꞌik roak amar yai, ba ralan lolin urun.”
57 Ba tamata Yahudi avyai rfalak verin Yesus ne, “Oa wol Mu varat vutlima obin, na wean inba ma fwalak ne, mrea roak Abraham?”
58 Yesus nfalak verin ira ne, “Afa i ufalak verin mia ini, kena urun! Wol rarali Abraham obin, na Yaꞌa unaꞌa roak.”
59 Ba ira rala vatu ma al rteva Yesus, naꞌuk Ia kaꞌi nfonak tenan a ma nban-talik Yahudi rira Rahan Dawan Falurut ni lean yai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA