Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ta'e ki Yesus minayak im Buḷud Zaitun.
2 Nopo'ikoḷomai kon singgai, subuhpa Sia minayakdon bui im Baḷoi Tuhan, bo nobayong intau namangoi ko'i-Nia. Ki Yesus ilimituí bo nomangkoidon notunduí ko'i monia.
3 Dodai in Sia yogot motunduí, mototunduí mita kon agama Yahudi bo intau mita im Parisi nodia mangoi ko'i Yesus kon tobatuí bobay inta kino-kadapatan nokitualing. Bobay tatua pinokisindogan monia kon yuaík,
4 bodongka noguman ko'i Yesus, "Pak guru, bobay tana'a kino kadapatan nami koyogot nokitualing.
5 Bo kon hukum agama oyuíon in atorang kon bobay naí tana'a mustibií arabon im batu dapot im matoi. Aka podudui in raian i Pak Guru yo naonda?"
6 ḷoliboí monia tua im potayakanbií monia kon taḷaí i Yesus, simbaí oyuíon im baliíon monia dodoyonan popotaḷaían ko'i-Nia. Ta'e ki Yesus tongaí kinumuyung bo nopomais in tononuyuí-Nya kom butaí.
7 Naonda in umurandon monia dodakan, dinumungaí in Sia bo noguman ko'i monia, "Ki ine ing kon sigad monimu in diaí kodosa, yo munadon sia mogarab im batu kom bobay tatua."
8 Onda intua ki Yesus kinumuyung bui bo nomais bui kom butaí.
9 Naonda in nokodongogmai kon singog i Yesus natua, minayakdon mosia nonaḷaímai kon tampat tatua, nobatu-batuí pinangkoi kon intau inta nogurang totok. Pangabisannya dongkadon ki Yesus takin bobay tatua inta simindogpa makow kon tampatnya.
10 Bo ki Yesus dinumungaí bo noliboí kom bobay tatua, "Onda i mosia komintan? Diaí degaí in nohukum ko'inimu?"
11 "Diaí, Pak Guru," tubagnya. "Tua in nopia," guman i Yesus, "Aku'oi in diaíbií doman mohukum ko'inimu. Ta'e bayakdon, bo dona'aidon bui momia kon dosa."]
12 Ki Yesus buipa doman noguman ko'i monia, "Aku'oi na'a bayag in dunia. Intau inta dumudui ko'i-Nakoí diaí bidon sia mayak kom bonu in sidip, ta'e oyuíondon im bayag kong kobiagannya."
13 Bo intau mita im Paris noguman ko'i-Nia, "Ikow nion i mongongumanbií kon soaáḷ ka'ada'an-Mu tontanií, daí onu in ino'uman-Mu nion diaíbií totu'u."
14 Ki Yesus notubag, "Umpakahbií Aku'oi mongonguman kon soaáḷ ka'ada'an-Ku tontanií, ta'e totu'ubií onu ino'uman-Ku tua, sing kinota'auan-Kubií kon nongkon onda in Aku'oi namangoi bo kon onda im bayaían-Ku.
15 Mo'ikow mohakim kon intau podudui in cara intau, Aku'oi in diaíbií mohakim kon tobatuímai intau.
16 Ta'e aka Aku'oi bo mohakim kon intau, yo onu inta sinantuí-Ku tua moaídilbií, sin Aku'oi in de'emanbií tongaí Aku-Aku'oi mita, Aku'oi in noyotakinbií i Amaí-Ku inta nopotabaí ko'i-Nakoí.
17 Kom bonu in Hukum i Musa pinais nana'a: Kosaksian inta mobanar in nongkon kosaksianbií in intau doyowa.
18 Inta nobogoi ing kosaksian soaáḷ Aku'oi in doyowabií, Aku'oi bo ki Amaí-Ku inta nopotabaí ko'i-Nakoí."
19 Daí iliboí monia, "Kon onda ing ki Amaí-Mu tua?" Ki Yesus notubag: "Aku'oi ande ki Amaí-Ku tumpaḷa diaí kinota'auan monimu. Aka kuma bo kinota'auan monimu in Aku'oi, yo pasti kota'auan bidon monimu ing ki Amaí-Ku."
20 Bayongan tua siningog i Yesus wakutu in Sia yogot motunduí kom bonu im Baḷoi Tuhan kon diugmai ing kas pobobogoian kon doit sosumbah. Ta'e diaíbií tobatuímai intau nodomok ko'i-Nia, sin de'emanpabií wakutunya.
21 Ki Yesus bui noguman ko'i monia, "Aku'oi im mayak, bo mo'ikow i motayakbií ko'i-Nakoí, ta'e mo'ikow im matoibií kom bonu in dosamu. Tampat inta bayaían-Ku, diaíbií kodapotan monimu."
22 Daí itoi mita in Yahudi noguman, "Degaí bo limimodbií tontanií in Sia nion, sin Sia moguman, 'Tampat inta bayaían-Ku, diaí kodapotan monimu.'"
23 Bo ki Yesus noguman ko'i monia: "Mo'ikow nion in namangoi nongkon limonag; ta'e Aku'oi in namangoibií nongkon limonik. Mo'ikow in nongkon duniabií na'a, ta'e Aku'oi in de'emanbií nongkon dunia na'a."
24 Tuamai Aku'oi noguman ko'i monimu, kom mo'ikow im matoibií kom bonu in dosa aka diaí mopirisaya kon Aku'oibií in Sia inta sinumangoi "Aku'oi Oyuíon."
25 Mosia noliboí bui, "Sabanarnya ki inebií Ikow nion?" Ki Yesus notubag, "Onupabií im mangale mongonguman takin monimu nion!
26 Mobayongpabií im musti poguman-Ku bo hakimon-Ku soaáḷ mo'ikow nion. Ta'e Sia inta nopotabaí ko'i-Nakoí diaíbií mo'uboḷ. Bo Aku'oi im mopota'au kon dunia na'a onu inta dinongog-Ku nongkon i-Nia."
27 Diaí kinomangalean monia kon Sia tua ing koyogotbií mongonguman ko'i monia soaáḷ ki Amaí.
28 Manangka intua ki Yesus noguman ko'i monia, "Baim poḷantudon monimu ing ki Adií intau, bain tua bo kota'auan monimu kon Aku'oibií na'a in Sia inta sinumangoi 'AKU'OI OYÚON', bo kota'auandon monimu kon diaíbií in tobatuímai im pinomia-Ku inta nongkon ibog-Ku tontanií. Aku'oi in tongaíbií moguman kon onu inta sinunduí i Amaí-Ku ko'i-Nakoí.
29 Bo Sia inta nopotabaí ko'i-Nakoí koyota-yotakin-Kubií, diaíbií dodai onda pinomayak-Nya makow in Aku'oi tontanií, sin Aku'oi in umuranbií mogaid kon onu inta moko sanang kong gina-Nya."
30 Nopaḷut makow noguman kon natua ing ki Yesus, nobarong intau nopirisaya ko'i-Nia.
31 Onda intua ki Yesus noguman kon intau mita in Yahudi inta ain nopirisaya ko'i-Nia, "Aka mo'ikow bo umuran dumudui kon inta sinunduí-Ku, yo mo'ikow in totu-totu'udon mobalií dumodudui-Ku,
32 dan kota'auandon monimu ing ki Allah inta diaí mo'uboḷ tua, bo lantaran tuata mo'ikow im pobebasondon."
33 Mosia noguman, "Kami na'a ing katurunanbií i Abraham, kami in diaípabií dodai onda nobalií ata i inekadon! Yo onu i makusud-Mu moguman, 'Mo'ikow im pobebasonbií?'"
34 Daí ki Yesus noguman ko'i monia, "Poguman-Kudon ko'i monimu, intau inta nogaid kon dosa, nobalií ki ata in dosanya tatua.
35 Bo tobatuí ata diaíbií moko'ulií kom pogutunan motantuí kom bonu im motoḷu adií, ta'e aka adií yo umuranbií moko'ulií kon tampat kom bonu i motoḷu adií.
36 Manangka intua, aka Adií mopobebasdon ko'i monimu, yo mo'ikow in totu-totu'udon mobebas.
37 Kinota'auan-Kubií kom mo'ikow nion katurunanbií i Abraham. tongaí mo'ikow moramiji molimod ko'i-Nakoí, lantaran mo'ikow doií motarima kon totunduí-Ku.
38 Onu in inontong-Ku ko'i Amaí-Ku tua im poguman-Ku. Naí doman mo'ikow mogaid kon onu inta pinoguman i amaí monimu."
39 Mosia notubag, "Ki amaí nami ing ki Abraham." "Aka mo'ikow bo totu-totu'u ki adií i Abraham," guman i Yesus, "pastibií kon aidanbií monimu onu inta inaidan i Abraham.
40 Aku'oi mopota'au onu in totu'u ko'inimu inta ain dinongog-Ku nongkon i Allah, ta'e ramijion monimu limodon in Aku'oi. Ki Abraham in diaíbií mogaid kon natua!
41 Mo'ikow mogaidbií kon onu inaidan i amaí monimu tontanií." Ta'e mosia notubag, "Kami na'a in de'emanbií adií kom boyot. Ki Amaí nami tongaíbií tobatuí, Sia tua ing ki Allah tontanií."
42 Daí ki Yesus noguman ko'i monia, "Aka ki Allah tua ki Amaímu, yo motabibií im mo'ikow ko'i-Nakoí, sin Aku'oi namangoibií nongkon i Allah. Bo de'emanbií ibog-Ku tontanií in namangoi, ta'e ibogbií i-Nia inta nopotabaí mangoi ko'i-Nakoí.
43 Nongonu sin diaíbií komangalean monimu onu im pinoguman-Ku? Lantaranbií mo'ikow diaí mokotahang mokodongog kon totunduí-Ku.
44 Ibilisbií ing ki amaímu, bo mo'ikow mo'ibog dumudui kon ibog i amaímu tatua. Nongkon pinomangkoianpabiímai Ibilis tua moḷolimod. Doiíbií in sia kon onu inta mo'itutui, sin diaíbií im mo'itutui ko'inia. Aka sia bo monguboḷ yo biasabií intua, sin natuabií in sipatnya. Sia mo'uboḷ bo pangkoi im bayongan uboḷ.
45 Ta'e Aku'oi i mogumanbií kon onu im mobanar, bo lantaran tuata mo'ikow diaí mopirisaya ko'i-Nakoí.
46 Ki ine ing kon sigad monimu im mota'au moponyata kon oyuíon in dosa-Ku? Aka totu'u im pinoguman-Ku, yo nongonu si mo'ikow in diaíbií mopirisaya ko'i-Nakoí?
47 Intau inta nongkon i Allah mokidongogbií kon singog i Allah. Ta'e mo'ikow in de'emanbií nongkon i Allah, tuamai mo'ikow doií mokidongog."
48 Itoi mita i Yahudi tatua notubag ko'i Yesus, "Totu'ubií in singog nami kon Ikow nion intau in Samaria inta kino-toḷangan in dimbuḷoí!"
49 Ki Yesus notubag, "Aku'oi in diaíbií kino-toḷangan in dimbuḷoí. Aku'oi in totokbií mohormat ko'i Amaí-Ku, ta'e mo'ikow moningkule ko'i-Nakoí.
50 Aku'oi in diaíbií motayak kon kahormatan-Ku tontanií. Oyuíonbií im mobogoi ing kahormatan ko'i-Nakoí. Sia tuata inta mohakim.
51 Na'a im poguman-Ku ko'i monimu: 'Inta dumudui kon singog-Ku, sia diaí bidon kawasa'an im popatoi.'"
52 Daí itoi mita in Yahudi tatua noguman bui ko'i Yesus: "Tana'a kinota'auandon totok nami kon Ikow nion totu-totu'udon kino-toḷangan in dimbuḷoí! Sing ki Abraham tontanií aim minatoi, naí doman tua in nabi mita. Ta'e Ikow moguman, 'Intau inta dumudui kon singog-Mu, diaí bidon kawasa'an im popatoi.'
53 Aka ki Abraham tontanií ai minatoi, bo nabi mita komintan domandon minatoi, Ikow nion ki ine? Umpakah Ikow i mokawa-kawasa nongkon i amaí nami ki Abraham!"
54 Ki Yesus notubag, "Aka kuma bo motayakbií in Aku'oi kong kahormatan-Ku tontanií, yo kahormatan tatua diaíbií im mangalenya. Inta mohormat ko'i-Nakoí ing ki Amaí-Kubií inta inanggap monimu ki Allah monimu,
55 padahaḷ diaí nokanal monimu in Sia. Aka Aku'oi moguman kon diaí kinota'auan-Ku in Sia, daí mo'uboḷ in Aku'oi naí mo'ikow. Kinota'auan-Kubií in Sia bo Aku'oi in dinumuduibií kon singog-Nya.
56 Ki amaí monimu ki Abraham nopia totok ing ginanya sin sia moko'ontong kon singgai- ku. Sia noko'ontongdon bo nopiadon ing ginanya!"
57 Bo intau mita i Yahudi noguman ko'i Yesus, "Diaípa tugat lima nopuḷuh notaong in umur-Mu, bo Ikow moguman kon ain noko'ontong ko'i Abraham?"
58 Ki Yesus notubag, "Poguman-Kudon ko'i monimu, Wakutu ing ki Abraham diaípa no'i lahir, Aku'oi na'a ing koyongan bidon oyuíon."
59 Bo intau mita in Yahudi tatua nogamaí kom batu sim pogandur ko'i-Nia; ta'e ki Yesus inumadop, bodongka nonaḷaímai kom Baḷoi Tuhan.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA