Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Male todami Puang Isa de' buntu Zaitun.

² Ia tonna makale'mo, male pole'i lako rante Bola Puang Allataala na buda tau ratu sirempun. Nacumadokko Puang Isa napamulai nnajahhi tobuda.

³ Ia joo wattu, ratumi to guru agama sola to-Farisi ssolan mesa' baine, to naampa' manggauk sala. Nasuai ke'deh lan tangnga tobuda,

⁴ namane' mpaui lako Puang Isa nakua, "Oo Guru, ia tee baine kiampa' tonna manggauk sala.

⁵ Den diuki' lan sura'na Nabi Musa kumua, 'Ia to baine susi tee, la disilekko'i batu samatena.' Na ia tee too Guru, matumbai kita' to passangan-Ta'?"

⁶ Naanggai' mekutana susi joo la ncobai to Puang Isa dikua nawa'ding mpasalai. Apa cukku bangngi Puang Isa, na mpangngukiran jarin-Na do' litak.

⁷ Apa ia tonna dikutanai tarruh bang, ke'dehmi, namane' mpebalii nakua, "Indara kamu' to te'da namadosa, iamo jolo' la llekko'i batu tee baine."

⁸ Namane' cukku pole' mangnguki' do' litak.

⁹ Ia tonna mangkamo ssa'ding kadan-Na Puang Isa, malai simesa'-mesa'mi tuu lako tau pamula jio mai to kaminang matuanna, naarannai Puang Isa mandamo torro jio sola joo baine.

¹⁰ Anna ke'deh Puang Isa ngkuanni joo baine, "Oo, umbo ngasanmira? Te'da bangrika ssessako?"

¹¹ Mebalimi joo baine nakua, "Te'da Puang." Nakua omo Puang Isa, "Melomi, moi Aku' te'da too angkulassessako. Malemoko. Mammula tee too, danggi' o mupugauk dosa."]

¹² Mangkada pole' omi Puang Isa lako tobuda nakua, "Aku'mo arrang to nnarrangngi penawanna tolino. Ia to tonturu'na', te'da nalalumingka lan kamalillinan, apa la nnampui arrang to mbenni katuoan."

¹³ Nakua to to-Farisi ngkuanni, "Te'da natongan to kadan-Ta', sanga ssa'biki' kale-Ta'."

¹⁴ Mebalimi nakua, "Moi kusa'bii kale-Ku', tongan to kadang-Ku', nasaba' kuissen to kunii ratu, kuissen too to la kunii male. Nate'da miissenni to kunii ratu, ba'tu la kunii male.

¹⁵ Ia ammira'tah kara-karana tau, mangra'tah tolino unamo kamu'. Apa ia ke Aku' te'da tau kura'tah kara-karana, moi mesa'.

¹⁶ Apa ia ke la Aku' mangra'tah, maruruh to pangra'tah-Ku', sanga te'da na Aku' manda mangra'tah, apa solana' Ambe' to ssuana'.

¹⁷ Den diuki' lan sura'na Nabi Musa, kumua, 'Ianna den dua tompangben kasa'bian sangrupa, wa'ding ditarima joo kasa'bianna.'

¹⁸ Na dua ia to sa'bing-Ku', Aku' sola Ambe' to ssuana'."

¹⁹ Nakua joo to-Farisi ngkuanni, "Umbori nanii joo ambe'-Ta'?" Mebalii Puang Isa nakua, "Te'da miissenna', sola Ambe'-Ku'. Ia ke la miissenna', tantu miissen toomi to Ambe'-Ku'."

²⁰ Ia tee kada napau Puang Isa tonna mangngajahhi jio rante Bola Puang Allataala sikandoppi' patti doi' sudakka. Apa moi mesa' tau te'da njokkoi, nasaba' te'dapa nadete'i wattunna.

²¹ Nakua pole' omo Puang Isa lako tobuda, "La malena' ammilannangahna', apa la mate tangdidampangan kamu'. Na ia to la kunii male, te'da mikullei ratu lako."

²² Ia tonna sa'dingngi pekaamberan to-Yahudi, sipangkadai nakua, "Oo, mbai la mbunoi kalena, sanga nakua kumua, 'Te'da kamu' ngkullei ratu lako to la kunii male.'"

²³ Nakua omo Puang Isa, "Topole jiong kamu' mai, na topole jaona' mai. Tojio kamu' mai lino, na Aku' te'da kutopole jio mai lino.

²⁴ Iamo joo kukuan kamu' kumua, la mate tangdidampangan kamu'. Na la mate tangdidampangan kamu', nasaba' te'da mikatappa'i to kadang-Ku' mpamanassai kumua, 'Aku'mo to disanga D|scENNA'|r.'"

²⁵ Mekutanai nakua, "Indariki' sitonganna?" Mebalimi Puang Isa nakua, "Te'da bua'na la ssipangkadan kamu'.

²⁶ Budapa to wa'ding la kupau mpasala kamu', apa te'da kupugaukki. Apa ia to tossuana', wa'ding dikatappa'i, na ia to apa kusa'ding jio mai kale-Na, ia toomo kupau lako kamu' tolino."

²⁷ Te'da naissenni to tau kumua Ambe'-Na to napau Puang Isa.

²⁸ Iamo joo nakua pole' Puang Isa ngkuanni, "Ia ke mipampangmo' jao kaju sitamben tee Aku', Anak Mentolino, mane'ra kamu' nnissenni kumua, Aku'mo tee to disanga 'DENNA''. Mane' toori miissen kumua, te'da kupugaukki to apa situru' pakkaeloran-Ku', apa ia manda to naajaranna' Ambe'-Ku'.

²⁹ Na iamo joo Ambe'-Ku' to ssuana', nasolan bangna'. Te'da nasalaina', nasaba' tuli kupugauk to napumasannang."

³⁰ Ia tonna mangkamo mpau ngasanni joo, buda to-Yahudi matappa' lako kale-Na.

³¹ Nakua Puang Isa ngkuanni to tomatappa'mo lako kale-Na, "Ia ke mituru'mi to pangngajah-Ku', tongannamo kamu' anak gurung-Ku',

³² na la miissen to Puang Allataala, na Iamo la lla'paran kamu'."

³³ Mebalimi joo tau nakua, "Bati'nakan Nabi Ibrahim. Te'dapa kami' naden tau mpukaunankan. Na apara tuu tasanga kumua, la dila'parankan?"

³⁴ Nakua Puang Isa ngkuanni, "La miingaran tee kadang-Ku' kumua, ia to tompugauk dosa, iamo tonapukaunan kuasa dosa.

³⁵ Na ia to kaunan te'da mari'pih tarruh lan bolana puangna. Apa ia joo anakkana joo puang la mari'pih tarruh ia lan bolana ambe'na.

³⁶ Jaji, ia ke kula'paran kamu' jio mai dosami, mane'ra kamu' la'pah tongan, sanga Aku'mo Anak Allataala.

³⁷ Kuissen kumua bati'na kamu' Nabi Ibrahim, apa den tau lan tangnga-tangngami nnangah lalan la mbunona', nasaba' cia'i ntarimai to pangngajah-Ku'.

³⁸ Ia to apa kukita jio Ambe'-Ku', iamo kupauan kamu'. Na ia todamo mipugauk to naajaran kamu' ambe'mi."

³⁹ Mebalimi joo tau nakua, "Nabi Ibrahim to ambe'ki'!" Nakua Puang Isa, "Ia ke la anakkana tongan kamu' Nabi Ibrahim, tantu ia toomo la mipugauk to napugauk.

⁴⁰ Kupauan kamu' katonganan to kusa'ding jio mai Puang Allataala. Apa ia to mipugauk, nnangah ora kamu' lalan la mbunona', na ia to panggaukan susi joo, te'da napugaukki Nabi Ibrahim.

⁴¹ Panggaukanna kamu' ambe'mi mipugauk." Mebalimi nakua, "Tangngiakan to dijajian jio mai panggaukan sala. Mesa'ra ambe'ki', Puang Allataala manda."

⁴² Nakua omo Puang Isa, "Ia ke la Puang Allataala Ambe'mi, la mipakamoja'na', nasaba' pole jiona' mai Puang Allataala. Na ratuna' te'da naeloh-Ku', apa Ia ssuana'.

⁴³ Manassa iamo nate'da mipahangngi to buangan kadang-Ku', nasaba' cia' kamu' mpesa'dingngi pangngajaran-Ku'.

⁴⁴ Ballisi' kamu' to ambe'mi. Iamo mimadoang bang mpugaukki to pangkabudaianna Ballisi'. Mammula jiona mai topabuno ia. Te'da lalo ia nampau katonganan, sanga te'da katonganan naampui. Ia ke mangnguragai, sipato'namo, sanga iamo garonto'na sininna pangnguraga.

⁴⁵ Jaji iamo nate'da mikatappa'ina' ke kupauan kamu' katonganan.

⁴⁶ Te'da bang kamu' ngkullei mpamanassai kumua den dosa jio kale-Ku'. Na ia ke mpauna' katonganan, ciapari na te'da mimatappa'?

⁴⁷ Ia to topole jio mai Puang Allataala nakabudai mpesa'dingngi kadan-Na Puang Allataala. Apa ia to kamu' cia' kamu' mpesa'dingngii, sanga te'da mipole jio mai Puang Allataala."

⁴⁸ Mebalimi to to-Yahudi nakua, "To-Samariaki'. Natamaiki' setang."

⁴⁹ Mebalii Puang Isa nakua, "Te'da natamaina' setang, apa ngkasiri'ra' Ambe'-Ku'. Na ia ke kamu' te'da miangga'na'.

⁵⁰ Tangngia Aku' nnangaran kadipujian kale-Ku', apa Puang Allataalara to mpujina'. Na tongan to kanapujian-Ku'.

⁵¹ La mikatappa'i kumua, ia to tonturu' kadang-Ku', te'da tarruhmo nalasikita kamatean."

⁵² Nakua to to-Yahudi ngkuan Puang Isa, "Oh, kiissenmi tee too kumua natamai tonganmiki' setang, nasaba' mangkami mate Nabi Ibrahim, mate toomi to sininna nabi, antakumua, 'Ia to tonturu' kadang-Ku', te'da tarruhmo nalasikita kamatean.'

⁵³ Ia to tojoloki' Nabi Ibrahim mangkamo mate, sola to sininna nabi mangka toomo mate. Indara tapapadanni to kale-Ta'? Te'da antalala'bi matonggo na ia to Nabi Ibrahim!"

⁵⁴ Mebalimi Puang Isa nakua, "Ia ke la kupakala'bihhi to kale-Ku', moi ci'di' te'da bua'na. Apa Ambe'-Ku'ra mpakala'bihna'! Ia toomo misanga Puangmi.

⁵⁵ Te'da kamu' miissenni na kuissen Aku'. Na ia ke la kukua te'da kuissenni, pangnguragana' susi kamu'. Apa kuissen Aku', na kuturu' to kadan-Na.

⁵⁶ Ia to tojolota' Nabi Ibrahim gaja sannang la ngkita allo karatuan-Ku'. Nakitamo tee too namasannangmo."

⁵⁷ Nakua omo to to-Yahudi ngkuanni, "Te'dapa na limang pulo taun umuru'-Ta', antakua takitamo to Nabi Ibrahim?"

⁵⁸ Mebalii Puang Isa nakua, "La mikatappa'i kumua, te'dapa nadijajian Nabi Ibrahim, na den memanmo'."

⁵⁹ Ia tonna sa'dingngi to-Yahudi joo kadan-Na, pada nnalai batu la nalekkosanni samate-Na, apa membunii Puang Isa, namane' male ssalai Bola Puang Allataala.

Yohanes

Video Yohanes 8

Ikuti Kami:

KONTAK | PARTISIPASI | DONASI