Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Yesus wanako 'ato 'o Farisioka yo'isenokau 'ato 'una 'o nyawa manga gudai wimoteke de waki'osiki, 'ifoloi yokudai de gee 'o Yohanes womote-moteke.

² (Yadaene 'ena 'o Yesus 'una kowaki'osikuwa duga ka 'awi do-domoteke.)

³ Gee 'o Yesus wanako 'ato 'o Farisioka yo'isenokau ge'ena, de 'una woma'aiki 'o Yudea ma daeraaka de wolio 'o Galilea ma daeraaku.

⁴ Wosikauku 'o Galileaku waboa 'o Samaria ma daeraa ge'ena moteke ma Jo'oungu ma Dutu 'awi mau.

⁵ So wototara 'o kota moika 'o Samariaka ma ronga 'o Sikhar, 'o tonaka gee ma sira 'o Yakub wokula-kula 'awi ngowaka 'o Yusufika ma dateoka.

⁶ Ge'enaka dau 'o parigi moi gee yosironga 'o Yakub 'awi parigi. 'O Yesus wokangelakou sababu 'awi do-dagi 'ikurutu, so wogogeruku 'o parigi ma dateoka. Ma 'orasi ge'ena poilia 'o takoro mogiooko de modidi 'o wangeka.

⁷ Ma 'orasi ge'ena 'awi do-domoteke yotagiokau 'o kotaka 'o 'inomo yo'ija. Ge'enaka de 'o Samaria ma nyawa mimoi moboa 'o 'akere mosi'onoko, de 'o Yesus kawongosekau munaka, "Biranga, tanu ma eta noikula ta'okere?"

⁸ (4:7)

⁹ 'O ngeweka gumuna mosango, "'Aba ngona 'o Yahudi ma nyawa, ngoi 'o Samaria ma nyawa; de 'ido'oa so nomau 'o 'akere noga'asoko ngoino?" (Muna koge'ena mongose, sababu 'o Yahudioka 'ona koyomakasupuwosamuwa de 'o Samariaka.)

¹⁰ 'O Yesus wosango, "Nako ngona nanako ma Jo'oungu ma Dutu 'awi co-catu 'o nyawaka, de nanako ngoi ne'ena ma kia gee toga-ga'asoko 'o 'akere ngonaka, ma raiokau ngona ma sirete noga'asoko 'o 'akere ngoino ma ngale na'okere, de ngoi 'asa tonikula 'o 'akere gee 'o nyawa yakisiwango-wango."

¹¹ 'O ngeweka gumuna mosango, "'Aba, 'o parigi ne'ena komasorikuwa, 'ani gu-guiti ma koi'iwa, de kiano namake 'o 'akere gee 'o nyawa yosi'ahu-'ahu?

¹² 'O Yakub to ngomi 'amia topora, mikulano 'o parigi ne'ena. 'Una ma sirete ne'enakou wa'odo-'odomo; koge'enali mita 'awi ngowa-ngowaka de 'awi haewani waso-sowohi. Bolo 'Aba ngona nongose ngona 'ifoloi noamoko de 'o Yakub?"

¹³ 'O Yesus wongose, "'O nyawa gee ya'oke-'okere 'o 'akere ne'ena dua manga kibiti kaidudungokasi!

¹⁴ Ma 'o nyawa gee dua ya'okere 'o 'akere gee ngoi takikulaka, dua manga kibiti koidudunguawau kaisi'ado-'adonika. Sababu 'o 'akere gee dua ngoi takikula-kulaka ge'ena matero ka 'o booteke manga roese ma dodaka, gee ma 'akere 'i'uisi de yakikula 'o 'ahu kaisi'ado-'adonika."

¹⁵ 'O ngeweka gumuna mongose, "'Aba, noikulano 'o 'akere ge'ena, la 'ai kibiti 'uwau 'idudu-dudungu, de koiparaluuwau tainoli ne'enano ma ngale 'o 'akere tosi'onoko."

¹⁶ De 'o Yesus wongose, "Tagi 'ani rokata woni'ese, deika nainoli de de 'una ne'enano!"

¹⁷ 'O ngeweka gumuna mosango, "Ngoi 'ai rokata koi'iwa." 'O Yesus wosango, "Ia ma goungu 'ani demo ge'ena.

¹⁸ Sababu ngona nongaamoko ma motoau, de 'o nauru gee ne'ena naga nimalomuno ge'ena ko to ngonawa 'ani rokata."

¹⁹ 'O ngeweka gumuna kamongosekau, "Ne'ena ngoi tanako 'Aba ngona 'o nabii moi.

²⁰ To ngomi 'amia edete de mia dotumu yosuba ma Jo'oungu ma Dutuka 'o gigieka ne'ena. Ma 'Aba to ngona 'ani nyawa yongose 'ato, 'o nyawa salingou yosuba ma Jo'oungu ma Dutuka, ma ngii duga ka 'o Yerusalemuoka."

²¹ 'O Yesus wongose munaka, "Biranga, kanongaku bato 'okia naga tongose-ngose! Dua 'o 'orasi ma moi, 'o nyawa 'asa yosuba 'ai Deaka ko ne'ena 'o gigiekawau, de mita ko 'o Yerusalemuokawau.

²² Ngini 'o Samaria ma nyawa winisuba ma Jo'oungu ma Dutu ma kowininako 'itiaiwasi, ma ngomi 'o Yahudi ma nyawa misuba ma Jo'oungu ma Dutu gee minako-nakokau, sababu 'o habari ma ngale ma Jo'oungu ma Dutu 'o nyawa wosilaha, ma ngekomo 'o Yahudi ma nyawaka de yaino.

²³ Ma dua ma 'orasi 'asa ya'adono de naga ya'adonokau, 'o Ngomasa 'Itebi-tebini 'asa nisi'asa winisuba 'ai Dea ma Jo'oungu ma Dutu, ma ngekomo 'iti-tiai 'isoka gee 'una wodua-duaka.

²⁴ Sababu ma Jo'oungu ma Dutu ge'ena 'o Ngomasa, de duga ka de 'o Ngomasa 'Itebi-tebini so 'o nyawa 'idadi wisuba 'ai Dea ma Jo'oungu ma Dutu, de winako 'itiai."

²⁵ 'O ngeweka gumuna mongose 'o Yesusika, "Ngoi tanako ma Koana 'o Nyawa Wosilaha-laha (gee wisironga ma Kristus) 'asa woboa. Gee woboa ge'ena dua wositotara 'okia sonaa moi-moi ngomino."

²⁶ 'O Yesus wongose, "'Una gee woningose-ngose ge'ena ngoiou gee ne'ena tobi-bicara de de ngona."

²⁷ Ma 'orasi ge'ena 'o Yesus 'awi do-domoteke yolio 'o kotaka de yaino so ya'adono ge'enano. 'Ona yoherangi wimake 'o Yesus wobi-bicara de 'o ngeweka mimoi. Ma komoiwa yomoroini yosano 'ato, "'Aba, 'okiau noparaluu?" Bolo "'Ido'oa so 'Aba nobi-bicara de 'o ngeweka gumuna?"

²⁸ Ge'enaka de 'o ngeweka gumuna mamada 'ami 'akere ma ngii de motagi kamoowa-owara 'o kotaka de mosidemo 'o nyawa-nyawaka ge'enaka doka,

²⁹ "Nou powilega 'o nyawa gee wosidemo 'okia sonaa 'iodumu gee ngoi tadi-diaiokau. Poilia 'una ge'ena ma Koana 'o Nyawa Wosilaha-laha ge'ena la ma Kristus!"

³⁰ So 'o nyawa-nyawa ma kotaka ge'ena mita yotagi 'o Yesus wilega.

³¹ Ma 'orasi ge'ena 'o Yesus 'awi do-domoteke yongose, "'Aba Guru, no'odomosi."

³² 'O Yesus wongose, "'O 'inomo naga ngoioka gee ngini konianakowa."

³³ So 'awi do-domoteke yomakasano yongose 'ato, "Naga 'o nyawa 'o 'inomo widagasano?"

³⁴ Ge'enaka de 'o Yesus kawongosekau, "To ngoi 'ai 'inomo ge'ena la tadiai 'ai Dea gee woisulo-suloko 'o duniano 'awi mau, de tosiduanga 'o manarama gee wokulakau ngoino.

³⁵ Ngini niongose 'ato, ''O togutuku 'o mede soatosi.' Ma ngoi tinisidemo: Nialega 'o bira 'o bairoka 'i'umukukou, 'i'utukou!

³⁶ Yo'utu-'utuku gee 'ikuruekau yomanarama de yamake manga sewa de ma hasili ge'ena la 'o nyawa yamake 'o 'ahu 'ika-kakali. So gee yotudu-tuduku de yo'utu-'utuku yoodumu 'idadi kayomore-morene.

³⁷ De ge'ena dau ge'ena 'itiai gee 'o nyawa yongose-ngose konee: 'Moi yotuduku, moi yo'utuku.'

³⁸ Ngoi tinisuloko ngini niotagi 'o nyawaka gee yakisitotarokau 'o Habari ma Owa matero katinisuloko nio'utuku 'o bairoka gee 'o nyawa 'iregu yotuduuku. 'O nyawa 'iregu yomanarama, ma ngini niomadugutuku ma hasili."

³⁹ De manga gudai 'o Samaria ma nyawa ma kotaka ge'ena yongaku 'o Yesusika sababu 'o ngeweka gumuna mongose 'ato, "'Una wosidemo ngoino 'okia naga 'iodumu gee todi-diaiokau."

⁴⁰ So gee 'o Samaria ma nyawa go'ona yomakamake de 'o Yesus, de wibaja la womanoasi de de 'ona. So 'o Yesus womanoa ge'enaka 'o wange modidioka.

⁴¹ Ge'enaka de 'o nyawa-nyawa kayokudai monga yongaku 'o Yesusika, sababu 'okia naga gee 'una ma sirete wakisidotoko 'onaka.

⁴² 'Ona yosidemo 'o ngewekaka gumuna yongose 'ato, "Ma 'orasi ne'ena ngomi miongaku ge'ena ma sababu ko ngonawau 'okia naga nongoseno ngomino, ma 'ena sababu ngomi ma sirete mio'isenokau 'una wobi-bicara, de mianako 'una ge'ena ma goungu 'o nyawa 'o duniaka wosilaha-laha."

⁴³ 'O Yesus 'o Sikharoka wi wange modidioka, de wotagi wosikauku 'o Galileaku.

⁴⁴ 'O Yesus ma sirete wongosekau 'ato, "'O nabii moi ka to 'ona manga soanoka ge'ena koyakihoromatiwa."

⁴⁵ Ma gee wototara 'o Galileaku, de 'o nyawa-nyawa ge'enaka dau widawongo kayomore-morene, sababu Wakisisupu ma Wange ma Amoko 'ona 'o Yerusalemuoka, de yamakekau 'iodumu gee 'o Yesus wodi-diaiokau.

⁴⁶ Ge'enaka de 'o Yesus wolioli 'o Kanaka 'o Galilea ma daeraaka, gee kiaka naga 'o 'akere wadiai 'idadi 'o 'anggur. De 'o Kapernaumoka wimoi 'o pamaretaka woma-manarama 'awi ngowaka wopanyakeku.

⁴⁷ Gee wo'isenoka 'o Yesus woboano 'o Galileaka 'o Yudeaka de waino, de 'una waika 'o Yesusika woga'asoko 'o Yesus 'o Kapernaumika waika la wosi'aiki 'awi ngowaka gee rekeni wosongenoka.

⁴⁸ 'O Yesus wongose 'unaka, "Nako ngini koniamakewa 'o no-nako 'ihera-herangi, ngini koniongakuwa."

⁴⁹ De 'una wosango, "'Aba, tanu nomataitika la 'ai ngowaka kowosongenuwasi 'ena noboakau la wonisi'aikokau!"

⁵⁰ 'O Yesus wongose, "Notagiou, 'ani ngowaka wi panyake ge'ena 'i'aiki." 'O nyawa gu'una wongaku 'o Yesus 'awi demo ge'ena, ge'enaka de wotagiokau.

⁵¹ 'O ngekomo ma goronaka de 'awi ro-riwo yoboa de yosidemo 'unaka, "'Aba, 'ani ngowaka wi panyake 'i'aikokau."

⁵² Ge'enaka de 'una wosano 'onaka 'o takoro muruo de 'ikurue 'i'aiki? 'Ona yosango, "Ka'uginika poilia 'o takoro moi 'o wange 'ikoronako."

⁵³ De 'o ngowaka ma dea gu'una wonganonie 'ato ma 'orasi ge'enau 'o Yesus wongose 'unaka 'ato, "'Ani ngowaka wi panyake ge'ena 'i'aiki." So 'una de 'awi woa ma dodaku yoodumu yongaku 'o Yesusika.

⁵⁴ Ge'enau 'o no-nako 'ihera-herangi 'o Yesus wodiai ma warasa ma modidi 'o Galileaka gee woboano 'o Yudeaka de waino.

Yohanes

Video Yohanes 4

Ikuti Kami:

KONTAK | PARTISIPASI | DONASI