Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ba larongo ira Farizai'o wa abõlõ ato nibayagõ Yesu idanõ moroi khõ Yohane.

² (Sindruhunia samalua famayagõ idanõ tenga Yesu, hiza i ira nifahaõ-Nia.)

³ Me I'ila Yesu wa no larongo da'õ ira Farizai'o, numalõ Ia ba Yudea, ba mangawuli ba Galilea.

⁴ Ba wofanõ-Nia andrõ Itõrõ Zamaria.

⁵ Irugi zi sambua banua sotõi Sikhara Yesu ba danõ Zamaria, lõ arõu i'otarai danõ andrõ nibe'e Yakobo khõ nononia Yosefo.

⁶ So mba'a Yakobo ba da'õ. Bõrõ wa'erege dõdõ Yesu wofanõ, mõi Ia dumadao ba zinga mba'a andrõ. Mato laluo me inõtõ da'õ,

⁷ no numalõ ndra nifahaõ Yesu ba fasa mõi mowõli gõ. Tohare samõsa ndra alawe Zamaria wana'u idanõ. Imane khõnia Yesu, "He Ina, hadia tola U'andrõ be'e õ-Gu nidanõ?"

⁸ (4:7)

⁹ Itema li ira alawe Zamaria andrõ, imane, "Niha Yahudi Ndra'ugõ Ama; ba niha Zamaria ndra'odo; hana wa Õ'andrõ khõgu nidanõ?" (Bõrõ me lõ amakhaita ba lõ fariawõ niha Yahudi faoma niha Zamaria.)

¹⁰ Imane Yesu, "Na aboto ba dõdõu mbuala Lowalangi ba na õ'ila haniha zangandrõ khõu idanõ, ba ya'ugõ na'i zangandrõ khõ-Nia idanõ, ba Ibe'e khõu nidanõ aurifa."

¹¹ Imane ira alawe andrõ, "He Ama, lõ khõ-U timba, ba wa'abakha mba'a andre. Hezo moroi Õhalõ nidanõ aurifa andrõ?

¹² Tuama Yakobo zame'e khõma ba'a andre. Moroi ba mba'a andre ihalõ gõnia idanõ; awõ ndraononia awõ gurifõnia. Hadia, abõlõ ebua ndra'ugõ moroi khõ duama Yakobo andrõ?"

¹³ Imane Yesu, "Ifuli owõkhi dõdõ niha fefu samadu idanõ andre,

¹⁴ ba samadu idanõ nibe'e-Gu khõnia lõ isõndra wa'owõkhi dõdõ irugi zi lõ aetu. Bõrõ me idanõ andrõ nibe'e-Gu khõnia tobali umbu nidanõ sangele ba same'e fa'auri sindruhu ba si lõ aetu!"

¹⁵ Imane ira alawe andrõ, "He Ama, be'e khõgu nidanõ andrõ ena'õ lõ owõkhi sa'ae dõdõgu; ba lõ moguna mõi ndra'o ba da'e ba wangai idanõ."

¹⁶ Imane khõnia Yesu, "Ae'e kaoni wo'omou, ba fuli'õ ba da'e."

¹⁷ Itema li ira alawe andrõ imane, "Lõ hadõi fo'omogu." Imane Yesu, "Sindruhu niw̃a'õu, wa lõ fo'omou,

¹⁸ bõrõ me no dalima ndra matua sangowalu khõu, ba ira matua si fao khõu iada'e tenga fo'omou sindruhunia. Tobali, sindruhu hadia niw̃a'õmõ andrõ."

¹⁹ Imane ira alawe andrõ, "Awena aboto ba dõdõgu wa sama'ele'õ ndra'ugõ.

²⁰ Lafosumange Lowalangi ira satuama ba hili andre, ba ya'ami niha Yehuda zanguma'õ wa ha ba Yeruzalema nahia wamosumange Lowalangi."

²¹ Imane Yesu khõnia, "Ya faduhu dõdõu talifusõ, so ginõtõ dania tenga ba hili andre lafosumange Lowalangi ba tenga gõi ba Yeruzalema.

²² Mifosumange Lowalangi si lõ mi'ila ya'ami niha Zamaria, ba ma'ila nifosumangema ya'aga niha Yahudi, bõrõ me so wangorifi moroi ba niha Yahudi.

²³ So dania ginõtõnia, ba no irugi inõtõ andrõ, wa moroi ba wa'abõlõ Geheha Lowalangi, dozi niha lafosumange Nama, Lowalangi satulõ, si mane nidõnadõna Nama.

²⁴ Lowalangi andrõ ba no Eheha, ba ha moroi ba wa'abõlõ Geheha Lowalangi tola lafosumange Nama molo'õ fetaro-Nia."

²⁵ Imane ira alawe andrõ khõ Yesu, "Aboto ba dõdõgu wa tohare dania Razo Sangorifi (nifabu'u Lowalangi, nifotõi Keriso). Na tohare Ia, I'ombakha'õ khõda fefu hadia ia."

²⁶ Imane Yesu, "Ya'odo andre Ia si fahuhuo khõu."

²⁷ Me inõtõ da'õ mangawuli ndra nifahaõ Yesu. Ahõli dõdõra me fahuhuo Yesu ba ndra alawe andrõ. Samõsa lõ hadõi ba gotaluara sanofu khõ ndra alawe, "Hadia zomasi'õ talifusõ?" ma zui lasofu khõ Yesu, "Hana wa fahuhuo Ndra'ugõ ba ndra alawe andre, Ama?"

²⁸ Aefa da'õ irõi zirege nidanõ khõnia ira alawe ba da'õ ba fagohi ia numalõ ba mbanua ba wangombakha ba niha si so ba fasa,

²⁹ "Mitabu, mifaigi niha sangombakha khõgu fefu hadia gamuatagu. Ba dõdõgu, te Ya'ia andrõ Razo Sangorifi si no Ifabu'u Lowalangi!"

³⁰ Larõi mbanua niha andrõ numalõ ira khõ Yesu.

³¹ Gasagasa da'õ lakaoni manga Yesu ira nifahaõ-Nia. Lamane, "He Guru, lau manga!"

³² Itema li Yesu, "So gõ khõ-Gu ba lõ mi'ila hadia gõ andrõ."

³³ Faoma lasofu khõ nawõra ira nifahaõ andrõ, "Hadia so zolohe õ-Nia?"

³⁴ Imane Yesu, "Folo'õ somasi zamatenge Ya'o da'õ gõ-Gu, awõ wangasiwai halõw̃õ nibe'e-Nia khõ-Gu.

³⁵ Mimane wanguma'õ, 'õfa waw̃a tõ, awena baw̃a wamasi.' Ba hiza Uw̃a'õ khõmi: Mihaogõ wamaigi nowi. No asoso ba no tola nibasi!

³⁶ Latema mbua gõlõra samasi andrõ; i'owuloi mbua wangahalõ soguna ba wa'auri sindruhundruhu. Omuso dõdõ zanaru ba he samasi.

³⁷ Sindruhu gamaedola andre, 'Samõsa zananõ ba samõsa zamasi.'

³⁸ Ufatenge ami wamasi ba nowi si tenga ni'ohalõw̃õgõimi; no mohalõw̃õ niha bõ'õ ba da'õ, ba mitema mbua wohalõw̃õra."

³⁹ Ato zowanua ba Zamaria si faduhu tõdõ khõ Yesu, me imane ira alawe andrõ, "I'ombakha'õ khõgu hadia ia fefu zi no ufalua."

⁴⁰ Ba me falukha niha Zamaria andrõ khõ Yesu la'andrõ khõ-Nia ena'õ torõi Ia khõra. Torõi Yesu ba da'õ dua ngaluo wa'ara.

⁴¹ Ba ato nasa niha si faduhu tõdõ khõ Yesu ba ngawalõ nifahaõ-Nia khõra.

⁴² Lamane ba ndra alawe andrõ, "Faduhu dõdõma iada'e tenga ha bõrõ ni'ombakha'õu khõma, hiza bõrõ me no marongo samõsa, ba aboto ba dõdõma wa sindruhu sangorifi õsi gulidanõ andre Ia."

⁴³ Me no torõi Yesu ba mbanua Zikhara dua ngaluo, numalõ Ia ba Galilea.

⁴⁴ No Iw̃a'õ samõsa Yesu, "Lõ lafosumange zama'ele'õ ba mbanuania samõsa."

⁴⁵ Me Irugi Galilea, latema'õ Ia niha sato si fao fa'omuso dõdõ. Bõrõ, me so Ia ba Gowasa Fasa ba Yeruzalema, ba no la'ila hadia nilau-Nia me inõtõ da'õ.

⁴⁶ Mangawuli Yesu ba Kana ba danõ Galilea, ba nahia si no irai Ibali'õ agu nidanõ. So samõsa zohalõw̃õ ba nomo Razo. Mofõkhõ nononia ba Gafana'uma.

⁴⁷ Me irongo no mangawuli Yesu moroi ba Yudea numalõ ba Galilea, mõi ia khõ Yesu. I'andrõ khõ Yesu ena'õ Ifadõhõ nononia andrõ sarakhagõ mate.

⁴⁸ Isofu Yesu ba zohalõw̃õ ba nomo Razo andrõ, Imane, "Na lõ ni'ilau zahõlihõli dõdõ, lõ faduhu dõdõu."

⁴⁹ Imane sohalõw̃õ ba nomo Razo andrõ, "He So'aya alio'õ we'amõi fatua lõ mate nonogu andrõ."

⁵⁰ Imane Yesu, "Ofanõ manõ, no auri nonomõ andrõ." Mamati niha andrõ ba niw̃a'õ Yesu, andrõ ilau mofanõ.

⁵¹ Ba dalu lala wangawuli ba nomo, falukha ia zohalõw̃õ khõnia ba lamane, "No auri nonomõ!"

⁵² Isofu ha'uga bõzi me ibõrõtaigõ dõhõ nononia andrõ. Lamane, "Menewi, aefa laluo (mato bõzi satu) alõ wa'aukhunia."

⁵³ Itõrõ tõdõ nama nono andrõ wa me inõtõ da'õ Imane Yesu khõnia, "No auri nonou." Ba mamati ia khõ Yesu awõ zi sambua omo ya'ira.

⁵⁴ Da'õ zahõli dõdõ si mendrua nilau Yesu ba Galilea me no tohare Ia moroi ba Yudea.

Yohanes

Video Yohanes 4

Ikuti Kami:

KONTAK | PARTISIPASI | DONASI