Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lun Parisi neninger ratnan kudeng apeh Yésus ngalap idi ngerereb meluun ula' anak sekola' ratnan Yahya.

² (Setuneh baken Yésus sebuleng nengerereb lemulun, iamo' anak-anak sekola'Neh luk nengerereb nedeh.)

³ Kareb Yésus kali' baladeh ineh, idi Ieh nenecan tana' Yudia, idi nelemubed iné' Galilia.

⁴ Iamo' na miak na Ieh lemaba tana' Samaria.

⁵ Ieh nacing inan aceh bawang déi' Samaria, ngadanneh Sikar, muneng ku tana' luk pangeh biré Yakub atun kuan Yusup, anakneh ineh.

⁶ Idi déi' inan aceh subuk Yakub. Idi ngaceku Yésus merur nenalan Ieh netudo iring subuk ineh. Kareb ineh lélé muned aco.

⁷ Idi seburur decur lun Samaria nacing sikal ngalap abpa' ineh; idi kebala Yésus neneh, "Ui mutuh ngirup."

⁸ (Ngaceku anak-anak sekola'Neh pangeh iné' melih luk kenen déi' bang bawang.)

⁹ Idi kebala decur lun Samaria Neneh, "Kudeng apehké Iko ini seburur lun Yahudi mutuh luk rupen rat negku, seburur decur lun Samaria?" Ngaceku lun Yahudi na pamung akan dengan lun Samaria.

¹⁰ Idi kebala Yésus, 'Kudeng iko kali' katu Allah idi idé Lemulun luk mutuh namu maré luk rupen, na miak na iko mutuh rat Neneh, pad Ieh maré abpa' luk mulun kuanmu."

¹¹ Idi keburi' decur ineh, "O Tuan, Iko na luk ku ngook abpa', idi subuk ini medalem. Rat iapehké Iko ngalap abpa' luk mulun ineh?

¹² Tepun kai Yakub nemaré subuk ini kuan kai. Idi ieh sebuleng nengirup ratnan subuk ini dengan anak-anakneh idi sapi'neh pana'. Ikoké meluun rayeh ratnan tepun kai Yakub?"

¹³ Kebala Yésus, "Idé-idé luk ngirup abpa' ini, ieh miak meparing teh:

¹⁴ iamo' idé-idé luk ngirup abpa' luk barénKu neneh, na ieh miak meparing ruked-ruked, ngaceku abpa' luk barénKu ineh, miak mangun bang bururneh ku aceh bued abpa' luk manud macing inan ulun luk meruked."

¹⁵ Idi kebala decur ineh, "O Tuan, maré negku abpa' ineh, pad ui na meparing idi na merur amé' tungé ngook abpa'."

¹⁶ Kebala Yésus neneh, "Amé' iko nawar awanmu, idi lemubed amé' tungé'."

¹⁷ Kebala decur ineh, "Ui na awan." Idi kebala Yésus neneh, "Matu balamu, iko na awan.

¹⁸ Limeh burur deléi pangeh mangun ku awanmu, idi luk nekini baken awanmu. Matu balamu ineh."

¹⁹ Kebala decur ineh, "O Tuan, ui kali' Iko seburur nabi.

²⁰ Tepun kai nesembayang luun surud ini iamo' kebala muyuh, Yerusalim ineh luk do' inan lemulun sembayang."

²¹ Keburi' Yésus neneh, O decur, do' iko manu Negku, karebneh miak macing idi lemulun na miak sembayang inan Taman ineh luun surud ini idi déi' Yerusalim pana'.

²² Muyuh lun Samaria na kali' idé luk inan muyuh sembayang; kai lun Yahudi kali' luk inan kai sembayang, ngaceku ulun macing rat nelun Yahudi.

²³ Iamo' karebneh miak macing, idi nekini pana' pangeh nacing idi amung-amung lemulun luk sembayang luk matu ineh miak sembayang inan Taman dengan lalud Roh Allah idi luk matu; ngaceku Taman ineh petulu dengan lemulun luk kudeng ineh sembayang Neneh.

²⁴ Allah ineh Roh; idi lemulun luk sembayang Neneh, na miak na ieh sembayang dengan lalud RohNeh idi luk matu."

²⁵ Idi keburi' decur ineh Neneh, "Ui kali' Mesias luk titen Keristus miak macing. Kareb Ieh macing, Ieh miak mada' netau ratnan luk amung-amung."

²⁶ Kebala Yésus neneh,"Ui ini Ieh luk pegayam denganmu."

²⁷ Kareb ineh teh anak-anak sekola'Neh nacing; idi ideh mawa, ngaceku Yésus nepegayam dengan seburur decur. Iamo' seburur pana' na nengitun Neneh, "Anunké luk tekapenMu?" idi "Ngudehké Iko pebala neneh?"

²⁸ Idi decur ineh nenecan sidangurneh, idi iné' bang bawang idi nepebala nelun mula' déi',

²⁹ "Amé' muyuh nier lemulun luk mada' negku ratnan amung-amung luk inau'ku. Bakenké Ieh ini Keristus?"

³⁰ Idi lun mula' ineh nenalan rat bang bawang iné' nier Yésus.

³¹ Kareb ineh teh kebala anak-anak sekola' ineh nan Yésus, "O Guru, kuman Iko."

³² Iamo' keburi'Neh nedeh, "Ui inan luk kenen luk Ui sikal kuman luk na kali' muyuh."

³³ Idi anak-anak sekola' nepebala seburur dengan seburur, "Inanké lemulun nenguit luk kenen kuanNeh?"

³⁴ Idi kebala Yésus nedeh, "AkanKu, ieh ineh nganau' luk pianNeh luk nengecuk Negku, idi ngeriput kekamenNeh.

³⁵ Muyuh pebala, idi apat bulan teh idi miak ngeranih. Matu Ui pebala nemuyuh, Do' muyuh tukag, idi nier lati'-lati', ngaceku nekini lati' ineh pangeh melak miak uen ngeranih.

³⁶ Idi lemulun luk ngeranih ineh ngalap tabpar, idi ngamung bua' luk kuan ulun luk meruked, pad lemulun luk nibu idi lemulun luk ngeranih, pad-pad mawang niat.

³⁷ Matu bala ini, "Seburur nibu, idi seburur luk baken ngeranih.'

³⁸ Ui nengecuk nemuyuh ngeranih bang lati' luk na inau' muyuh; luk baken nenganau' ineh, idi muyuh ngalap uli'neh."

³⁹ Mula' lun Samaria bang bawang ineh manu inan Yésus, ngaceku ratnan bala decur luk nepebala, "Ieh nemada' negku ratnan amung-amung luk inau'ku."

⁴⁰ Idi kareb lun Samaria ineh nacing inan Yésus ideh nemutuh Neneh tudo dengandeh; idi Ieh netudo déi' dueh aco kinioneh.

⁴¹ Idi meluun ula' lemulun manu teh, ngaceku bala Yésus.

⁴² Idi kebaladeh nan decur ineh, "Nekini kai manu, baken ngaceku luk bilamu mo', iamo' kai sebuleng pangeh neninger balaNeh idi kai nekali', idi Ieh ineh Lun Nengulun tana' ini."

⁴³ Idi pangeh dueh aco Yésus nenalan rat déi' iné' Galilia.

⁴⁴ Ngaceku Yésus sebuleng nepebala, "Seburur nabi na miak ruen ngedita' bang bawangneh sebuleng."

⁴⁵ Kareb Ieh nacing déi' Galilia, idi Ieh tinawar lun Galilia, ngaceku ideh pangeh iné' ku Irau Paska déi' Yerusalim, idi ideh nenier amung-amung luk inau'Neh kareb irau ineh.

⁴⁶ Idi Yésus nelemubed iné' Kana déi' tana' Galilia, su luk inan abpa' inisu'Neh mangun ku abpa' anggur ineh. Idi inan seburur lun tareh raca' luk inan aceh anak luk mét déi' Kapernaum.

⁴⁷ Kareb ieh neninger ratnan Yésus pangeh nacing rat tana' Yudia amé' Galilia, idi ieh iné' papu' Yésus, idi nemutuh Neneh amé' ngedo' anakneh luk lélé maté.

⁴⁸ Kebala Yésus neneh, "Kudeng na muyuh nier tanu' idi kekamen luk nan mawa, na tu muyuh manu."

⁴⁹ Idi kebala lun tareh raca' ineh, "O Tuan, amé' Iko kareb nateh anakku maté."

⁵⁰ Kebala Yésus neneh, "Amé' iko, anakmu ineh mulun." Idi lemulun ineh manu ku bala Yésus ineh, idi ieh iné'.

⁵¹ Kareb ieh arang dalan, demulunneh iné' papu' neneh, kebaladeh, "Anakmu ineh pangeh do'."

⁵² Idi ieh nengitun nedeh ratnan idan karebneh ieh nedo'. Idi kebaladeh, "Nalem kareb mepulid aco dademneh pangeh nedo'."

⁵³ Idi tamanneh nengerawé kareb ineh teh Yésus nepebala neneh, "Anakmu ineh mulun." Idi ieh manu dengan amung uang tetek ruma'neh.

⁵⁴ Idi ini tanu' luk kedueh inau' Yésus kareb pangeh Ieh nacing rat tana' Yudia amé' Galilia.

Yohanes

Video Yohanes 4

Ikuti Kami:

KONTAK | PARTISIPASI | DONASI