Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Urang-urang Farisi mandanga kaba, baraso Isa Almasih labiah banyak mandapek pangikuik, labiah banyak pulo mampamandikan urang daripado Nabi Yahya.

² (Sabananyo, Baliau sandiri indak ado doh mampamandikan urang, hanyo pangikuik-pangikuik-Nyo sajo.)

³ Kutiko Baliau tawu, baraso urang-urang Farisi lah mandanga tantang kajadian tu, mako barangkeklah Baliau dari Yudea babaliak ka Galilea.

⁴ Dalam pajalanan Baliau tu, Baliau tapaso malaluwi Samaria.

⁵ Mako sampailah Baliau disabuwah kota di Samaria, nan banamo Sikhar, indak jauah dari tanah nan di agiahkan dek Nabi Yakub sa isuak untuak anaknyo Nabi Yusuf.

⁶ Disinan ado sumua Nabi Yakub. Isa Almasih sangaik latiahnyo, dek karano jauah bajalan, mako duduaklah Baliau di tapi sumua. Kutiko itu ari kiro-kiro pukua duwo baleh tangah ari,

⁷ pangikuik-pangikuik Baliau lah bi payi ka kota, untuak mambali nan ka dimakan. Kudian tibolah surang urang padusi urang Samaria, ka ma ambiak ayie. Baliau bakato ka urang padusi tu, "Amai, layi buliah Ambo mamintak ayie minun?"

⁸ (4:7)

⁹ Urang Samaria tu manjawab, "Angku urang Yahudi, ambo urang Samaria; baa mangko Angku mamintak ayie minun kabake ambo?" (Dek karano urang-urang Yahudi indak ba emaiyan jo urang Samaria.)

¹⁰ Isa Almasih manjawab, "Santano amai tawu jo pambarian Allah, layi tawu pulo jo Urang nan mamintak ayie minun kabake amai, mako lah musti, amai sandirilah nan ka mamintak ayie minun kabake Inyo, mako Inyo ka mambarikan kabake amai ayie, untuak iduik, nan sabana iduik."

¹¹ Urang padusi tu bakato, "Angku indak ado doh punyo timbo, sumua ko sangaik dalamnyo. Dari ma Angku ka mandapekkan ayie nan ka untuak iduik tu?

¹² Nabi Yakub niniak muyang kami, inyo nan mambarikan sumua ko ka kami. Inyo sandiri ma ambiak ayie minunnyo dari siko; baitu pulo anak-anaknyo sarato jo binatang taranaknyo. Apokoh Angku manyangko Angku labiah basa daripado Nabi Yakub?"

¹³ Isa Almasih manjawab, "Urang nan maminun ayie ko, inyo ka batambah auih,"

¹⁴ "tapi, urang nan maminun ayie nan ka Ambo barikan, inyo indak ka auih lai untuak salamo-lamonyo. Dek karano ayie nan ka Ambo agiahkan tu, ka manjadi mato ayie di dalam dirinyo, nan ka mamanca kaluwa, sarato mambawok dirinyo kabake iduik sajati nan kaka."

¹⁵ Mako bakatolah urang padusi tu, "Jikok baitu Angku, agiahlah ambo ayie tu, supayo ambo indak auih lai; mako indak paralu lai ambo babaliak kamari untuak ma ambiak ayie."

¹⁶ Isa Almasih bakato, "Payilah, imbaulah apak paja amai, sudah tu babaliaklah kamari."

¹⁷ "Ambo indak punyo apak paja doh," kecek urang padusi tu. "Iyo, batua tu nan amai katokan tu," kecek Isa Almasih.

¹⁸ "Dek karano, amai lah limo kali balaki, urang nan sapayi jo amai kiniko, inyo tu indak laki amai tu doh."

¹⁹ "Kiniko barulah ambo tawu, baraso Angku ko adolah surang Nabi," kecek urang padusi tu.

²⁰ "Niniak muyang kami manyambah Allah di ateh bukik ko, tapi banso Angku mangatokan, baraso, hanyo di Yerusalem sajolah tampaiknyo urang manyambah Allah."

²¹ "Picayolah," kecek Isa Almasih kabake urang padusi tu, "ka tibo masonyo isuak, urang ka manyambah Bapak indak di bukik ko lai, indak pulo di Yerusalem doh.

²² Amai, sarato jo urang-urang Samaria, manyambah sasuatu nan indak amai katawui, sadangkan kami urang Yahudi, manyambah Baliau nan kami katawui, dek karano kasalamatan datangnyo dari urang Yahudi.

²³ Tapi ka tibo masonyo, malahan lah tibo, baraso jo kuwaso Roh Allah urang ka bi manyambah Bapak, sabagai Allah nan sabana Allah, jo caro manyambah nan dikandak-i dek Bapak.

²⁴ Dek karano Allah tu, adolah Roh, hanyo jo kuwaso Roh Allah lah urang-urang ko dapek manyambah Bapak dalam ka adaan Baliau nan sasungguahnyo."

²⁵ Urang padusi tu bakato kabake Isa Almasih, "Ambo tawu, baraso Rajo Panyalamaik, (nan dinamokan Almasih) Baliau ka datang. Jikok Baliau lah tibo, Baliau ka mambaritawukan sagalo sasuatu kabake kito."

²⁶ "Ambolah Urang-Nyo," kecek Isa Almasih, "nan kiniko sadang mangecek jo amai ko."

²⁷ Kutiko itu pangikuik-pangikuik Baliau lah babaliak. Inyo bi tacangang, maliyek Baliau sadang mangecek jo surang urang padusi. Tapi indak surang juwo doh dari pangikuik Baliau tu, nan batanyo kabake urang padusi tu, "Apo nan paralu di amai?" atau nan batanyo kabake Baliau, "Baa mangko Angku namuah mangecek jo urang padusi tu?"

²⁸ Mako payilah urang padusi tu, inyo tinggakan tampaik ayienyo disinan, sudah tu inyo lari ka kota, untuak mancuritokan kabake urang-urang nan ado disinan,

²⁹ "Caliaklah kamari, ado Urang nan dapek manakok tantang sagalo sasuatu, apo nan lah ambo pabuwek. Mungkinkoh Baliau tu nan Rajo Panyalamaik?"

³⁰ Mako urang-urang tu bi maninggakan kota, inyo bi payi ka tampaik Isa Almasih.

³¹ Samantaro itu, pangikuik-pangikuik Baliau ma ajak Baliau makan. "Angku Guru," kecek pangikuik-Nyo, "makanlah Angku lai."

³² Tapi Baliau manjawab, "Layi ado di Ambo nan ka Ambo makan, nan indak angku-angku katawui."

³³ Mako pangikuik-pangikuik Baliau, bi batanyo sasamo inyo, "Apokoh ado urang nan lah mambawok makanan untuak Baliau?"

³⁴ Mako bakatolah Isa Almasih, "Makanan Ambo adolah, mangarajokan apo nan katuju dek Baliau nan ma utuih Ambo, sarato manyudahkan sagalo karajo nan lah disarahkan dek Baliau kabake Ambo.

³⁵ Angku-angku bi mangatokan, 'Baraso ampek bulan lai tibo musin manuwai.' Tapi Ambo mangatokan kabake angku-angku: Liyeklah ladang-ladang nan lah manguniang, lah patuik untuak dituwai!

³⁶ Urang nan manuwai lah muloi manarimo upahnyo, sarato lah mangumpuakan asienyo untuak manuju iduik sajati nan kaka. Mako urang nan mananam, sarato jo urang nan manuwai, buliah samo-samo basukocito.

³⁷ Batua juwo bak kato-kato pitatah, 'Nan surang mananam, nan surang lai manuwai.'

³⁸ Ambo manyuruah angku-angku payi manuwai, ka ladang nan indak angku-angku doh nan mananaminyo; urang lain nan lah bakarajo disinan, tapi kiniko angku-angku nan manarimo ka untuangan dari asie karajo urang-urang tu."

³⁹ Sambuah urang Samaria panduduak kota tu, nan picayo kabake Isa Almasih, dek karano, urang padusi nan basuwo jo Baliau di sumua tu, mancuritokan kian kumari bakcando iko, "Urang nan basuwo di ambo di sumua tu, Baliau bisa mancuritokan kabake ambo tantang sagalo sasuatu, apo nan lah ambo pabuwek dulu."

⁴⁰ Mako kutiko urang-urang Samaria tu, basuwo jo Isa Almasih, inyo bi sabana mamintak, supayo Baliau namuah tingga jo inyo disinan. Akienyo Baliau tingga disinan salamo duwo ari.

⁴¹ Kudian batambah sambuah lai urang nan picayo, kabake Isa Almasih, dek karano di pangajaran nan Baliau ajakan kabake urang-urang tu.

⁴² Urang-urang tu bi bakato kabake urang padusi tu, "Kiniko kami lah picayo, indak dek karano, apo nan amai curitokan kabake kami doh lai, tapi dek karano kami sandiri lah mandanga dari Baliau, kami lah tawu, baraso Baliau tu adolah Panyalamaik dunia."

⁴³ Sasudah duwo ari Isa Almasih tingga di Sikhar, mako payilah Baliau ka Galilea.

⁴⁴ Baliau sandiri lah mangatokan, baraso, "Nabi indak ka di aromaik-i doh di nagarinyo sandiri."

⁴⁵ Tapi kutiko Baliau tibo di Galilea, urang-urang nan disinan manyambuik Baliau jo sanang ati, dek karano urang-urang tu sadang ado di Yerusalem, kutiko Ari Rayo Paskah, inyo lah bi maliyek kasadonyo apo nan lah di pabuwek dek Isa Almasih.

⁴⁶ Kudian Baliau babaliak ka Kana di Galilea, disinan dulu panah Baliau ma ubah ayie manjadi anggur. Di kota tu ado surang pagawai pamarentah, anaknyo sadang sakik di Kapernaum.

⁴⁷ Kutiko inyo mandanga kaba, baraso Isa Almasih lah tibo di Galilea dari Yudea, inyo payi kabake Baliau sarato mamintak Baliau, datang ka Kapernaum, untuak mancegakkan anaknyo nan lah ka ampia mati.

⁴⁸ Baliau bakato kabake pagawai tu, "Jikok angku indak maliyek mukjizat-mukjizat nan Ambo pabuwek, tantu angku indak ka picayo doh kabake Ambo."

⁴⁹ "Ndeh Angku," kecek pagawai tu, "Kok dapek pintak ambo, maringanilah Angku datang, sabalun anak ambo tu mati."

⁵⁰ Bakatolah Isa Almasih kabake inyo, "Pulanglah, anak angku tu lah cegak." Urang tu sabana yakin jo kato-kato Baliau, mako payilah inyo pulang.

⁵¹ Di tangah jalan, basoboklah inyo jo palayan-palayannyo, nan tibo manyonsongkannyo untuak ma agiah kaba, palayannyo bi mangatokan, "Anak angku lah cegak."

⁵² Mako batanyolah inyo kabake palayan-palayannyo tu, pukua bara anaknyo tu cegak. Palayannyo tu bi manjawab, "Kapatang, kiro-kiro pukua satu tangah ari, panyakiknyo lah cegak."

⁵³ Mako takanalah dek inyo, baraso di kutiko nan bakcando itu pulolah, Isa Almasih mangatokan kabake inyo, "Anak angku lah cegak." Dek karano itu, inyo sarato jo kasadonyo kaluarganyo picayo kabake Isa Almasih.

⁵⁴ Itulah mukjizat nan kaduwo, nan dipabuwek dek Isa Almasih di Galilea, sajak sasudah Baliau tibo dari Yudea.

Yohanes

Video Yohanes 4

Ikuti Kami:

KONTAK | PARTISIPASI | DONASI