Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "'Iodumu ge'ena tinisidemokau nginika la 'uwa 'ania singina 'i'ogu de koniongakuwau ngoino.

² Ngini 'asa niginiiki 'o lo-lomu ma woa-woaka. De dua ma 'orasi ya'adono, 'o nyawa gee nito-to'oma ngini 'asa yongose bari ge'ena ma ngale ma Jo'oungu ma Dutu wileleani.

³ 'Ona koge'ena yodiai nginika sababu kowinakowasi 'ai Dea de mita ngoi.

⁴ Ma ne'ena tinisidemo ma ngale ge'ena, la dua gee 'idadi, ngini nionganonie 'ato ngoi tosidemokau nginika." "'Iodumu ge'ena kotinisidemowa ka ma mulaenginosi, sababu ngoi ka de de nginiosi.

⁵ Ma ne'ena ngoi 'asa totagi 'ai Deaka gee woisulo-suloko; de nginioka naga ka moi ma koyosanowa kiaka ngoi totagi.

⁶ Ma 'orasi ne'ena ka 'ania singinali 'isusa, sababu ngoi tongose 'ato totagiou.

⁷ Ma ngoi tinisitotara gee ma gou-goungu: Niosanangioka ngini nako ngoi totagi; sababu nako ngoi kototagiwa, 'o Ro-riwo ge'ena dua koiboawa nginino. Ma nako ngoi totagi, ngoi 'asa tasuloko 'ena 'iboa nginino.

⁸ Nako 'ena 'iboa, 'ena 'asa yakisisahe 'o nyawa 'o duniaka ma ngale 'o sowono, 'o do-dotoko 'iti-tiai ma ngale ma Jo'oungu ma Dutu, de 'o hukumani.

⁹ 'Ena 'asa 'isidumutu 'ato koingakuwa ngoino ge'ena 'o sowono;

¹⁰ de 'isidumutu 'ato 'o do-dotoko 'iti-tiai sababu ngoi totagi 'ai Deaka, de ngini dua konimakewau;

¹¹ mita 'isidumtu ma ngale ma Jo'oungu ma Dutu dua wakihakimi 'o nyawa 'o duniaka, sababu wahukumokau 'o dunia ne'ena yapa-paretano ge'ena la 'o Tokata ma Koana.

¹² 'O gudaiosi tomau tinisidemo, duga ma 'orasi ne'ena konia'akunuawasi niadawongo.

¹³ Ma nako 'o Ngomasa ge'ena 'iboa, ge'ena la 'o Ngomasa 'Itebi-tebini gee 'isidumu-dumutu 'o do-dotoko 'iti-tiai ma ngale ma Jo'oungu ma Dutu, ngini 'asa nisi'asa ma ngale niosikanako 'o sagala moi-moi 'iti-tiai. 'Ena 'asa 'ibicara ka de to 'enawa ma sirete ma mau, ma 'ena 'asa 'isitotara 'okia naga gee 'i'isenokau. De 'ena 'asa nisidemo 'okia naga gee dua 'asa 'idadi.

¹⁴ 'Ena 'asa 'isitedene ngoi, sababu 'okia naga gee 'isitota-totara nginika, ge'ena ngoioka 'i'isenino.

¹⁵ 'Iodumu gee to 'ai Dea ge'ena to ngoi. Ge'enau ma sababu so ngoi tongose 'ato 'okia naga 'o Ngomasa 'Itebi-tebini 'isidemo-demo nginika ge'ena ngoioka 'i'isenino."

¹⁶ "Ka 'o 'orasi moiou de ngoi konimakewau, de mita ka 'o 'orasi moiou de ngoi nimakekauoli."

¹⁷ 'O Yesus 'awi do-domoteke yamuruo naga yomakasano moi de moi, "'Awi dumutu 'okia wongose ngoneno: 'Ka 'o 'orasi moiou de ngini 'asa konimakewau ngoi, de mita ka 'o 'orasi moiou de ngini 'asa nimakeli ngoi'? Mita 'okia ma dumutu: 'Ngoi totagi 'ai Deaka'?"

¹⁸ De 'ona kayomakasano koyomaogoruwa, "'Okia ma ngale 'ka 'o 'orasi moiou'? Ngone kopasahewa 'una wobicara ma ngale 'okia!"

¹⁹ 'O Yesus kawakidanakoka 'ato yomau yosano 'unaka, so kawongosekau, "Kangano tongose, 'Ka 'o 'orasi moiou de ngini 'asa konimakewau, de mita ka 'o 'orasi moiou de ngini 'asa nimakeli ngoi.' Ge'enau ngini niatiba-tibangi?

²⁰ Kaniongaku bato, ngini 'asa nio'ari de nioto-tora, ma 'o dunia 'asa 'imorene. Ngini 'asa 'ania singina 'isusa, ma 'ania singina ma susa ge'ena 'asa 'imasitagali de 'o morene.

²¹ Nako 'o ngeweka mimoi rekeni momaku'arenoka, ge'ena 'ami singina 'isusa sababu ma 'orasiou mosangisara. Ma gedagee mokuatokau, ge'ena mamongorokau 'ami sangisara ge'ena, ngano momorene sababu 'o ngowaka ma giau moi 'iboa 'o duniano.

²² Koge'enali mita ngini: Ne'ena ngini 'ania singina 'isusa, ma ngoi de de ngini 'asa pomakamakeli, so 'ania singina 'asa 'imorene; de 'o morene 'ania singinaka ge'ena komoiwa 'idadi ya'ese.

²³ Ge'ena ma wangeka ngini dua ko 'okiawau niosano ngoino. Kaniongaku bato: 'Okia naga bato nioga'asoko 'ai Deaka de to ngoi 'ai kuasa, ge'ena 'ai Dea 'asa winikula.

²⁴ Sigado ma 'orasi ne'ena ngini koniomaga'asokuawasi 'o kianikia de to ngoi 'ai kuasa. Niomaga'asoko la ngini 'asa nimadamake, la posironga de niomorenoka."

²⁵ "Ge'ena 'iodumu tinisidemo de 'o cagulu. Ma 'asa ya'adono ma 'orasi, ngoi kotopakewau 'o cagulu, ma katinisiti-tiaikau ma ngale 'ai Dea.

²⁶ Ma 'orasi ge'ena ngini 'asa nimaga'asoko 'ai Deaka de to ngoi 'ai kuasa. Ngoi kotongosewa 'ato ngoi 'asa tinidaga'asoko 'ai Deaka,

²⁷ sababu 'ai Dea ma sirete winisibosono ngini. 'Una winisibosono ngini, sababu ngini nisibosono ngoi, de niongaku 'ato ngoi toboa ma Jo'oungu ma Dutuno.

²⁸ Ma goungu ngoi 'ai 'asali 'ai Deano, de toboanou 'o duniaka. Ma ne'ena ngoi tamada 'o dunia ma ngale tolio 'ai Deaka."

²⁹ Ge'enaka de 'o Yesus 'awi do-domoteke kayongosekau 'unaka, "Ma 'orasi ne'ena Jou nobicara kanositi-tiainou de konosica-caguluwau,

³⁰ de ngomi mianako Jou ngona nosikanako 'okia sonaa. Kawimoi ma koiparaluuwau wosano 'o kianikia ngonaka Jou. Ge'enau so ngomi miongaku Jou ngona noboa ma Jo'oungu ma Dutuno."

³¹ 'O Yesus wosango 'onaka, "So ne'ena ngini niongaku?

³² Niongano-nganono, ma 'orasi 'asa ya'adono de ya'adonokau, ngini 'asa nisibiakoroka. Ngini 'asa niolio moi-moi 'ania woaka de nisidamadaku tomatengokasi. Ma ngoi kotomatengokawa sababu 'ai Dea naga de de ngoi.

³³ 'Iodumu ne'ena tinisidemo la ngini niamake 'o sanangi sababu ngini de de ngoi ka moi. 'O duniaka ngini 'asa niosangisara. Ma 'ania singina niatongosonino! Ngoi talakuokau 'o sagala moi-moi 'o duniaka gee kowidomotekuwa ma Jo'oungu ma Dutu so!"

Yohanes

Video Yohanes 16

Ikuti Kami:

KONTAK | PARTISIPASI | DONASI