Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kupauan ngasanmo kamu' joo, anna danggi' mika'tu rannu ammitangmatappa' pole'.

² La diula'i kamu' lan mai bola passambajangan. La den too ia wattunna, na ia to tombuno kamu' nasangai kumua mpugaukki kameloan lako Puang Allataala.

³ Napugaukki susi joo lako kamu', nasaba' te'da naissenni to Ambe', na moi Aku' te'da too naissenna'.

⁴ Apa kupauanmo kamu' tee too, anna ia ke jajimi, la miingaran kumua mangka jolomo' mpauan kamu'." Mpatarruhhi kadan-Na Puang Isa nakua, "Sininna tee kupau te'dapa naden kupauan kamu' mellao jiona mai, sanga sola bang unapiki'.

⁵ Apa ia tee too, la polemo' lako tossuana'. Na moi mesa' te'da bang kamu' ngkutanaina' kumua, 'Umbora la tanii male?'

⁶ Na la memmasse penawammi tee too, nasaba' kupauanmo kamu' kumua, 'La polemo''.

⁷ Tongan tee kupauan kamu' kumua, 'La'bi den bua'na lako kamu' ke polena'', sanga ia ke la te'dai kupole, te'da nalaratu joo tomangpakatana. Apa ia ke polena', la kusuai ratu lako kalemi.

⁸ Na ia ke ratumi to Roh Allataala la napamanassai kumua sala to tolino. La napamanassai lako tolino apa to disanga dosa, pangsessa-Na Puang Allataala na kumua totangmadosana'.

⁹ La napamanassa kumua madosai to tolino, sanga te'da namatappa' lako Aku'.

¹⁰ La napamanassa too kumua totangmadosana', sanga polena' lako Ambe' natarimana', na te'damo milangkitana'.

¹¹ La napamanassa too kumua la nasessami Puang Allataala to tolino, sanga disessami to Ballisi', to ngkuasai tee lino.

¹² Budapa to la kupauan kamu', apa te'dapa mikullei mpahangngi.

¹³ Apa ianna ratumo joo Roh Allataala, Iamo la mpamanassai to katonganan-Na Puang Allataala, na Ia toomo mpatuju kamu' nnissenni to sininna pangngajaran tongan. Te'da namangkada situru' pakkaeloran-Na, apa sininna to nasa'ding jio mai Aku' iamo napau. Na la napauan too kamu' to apa la jaji keanu'.

¹⁴ La napakala'bihna', nasaba' ia to napauan kamu', natarima pole jio mai kale-Ku'.

¹⁵ Sininna to apa naampui Ambe', apang-Ku' too. Iamo kukua kumua ia to apa napauan kamu' Roh Allataala, pole jio mai kale-Ku'."

¹⁶ Mpatarruhhi kadan-Na Puang Isa nakua, "Cingga'tu'mora na te'damo mikitana', na cingga'tu' toomora ammikita pole'na'."

¹⁷ Ba'tu pira-pira to anak gurun-Na sikutana-tana nakua, "Apara battuananna joo nakuanki', 'Cingga'tu'mora na te'damo mikitana', na cingga'tu' toomora ammikita pole'na''? Na apa pole'pa battuananna joo nakua, 'La polena' lako Ambe''?"

¹⁸ Sikutana tarruhpa ia nakua, "Apara ia battuananna joo 'cingga'tu''? Te'da kita' taissenni apara ia joo napau!"

¹⁹ Naissen Puang Isa kumua madoangngi la ngkutanaii. Iamo joo nakua ngkuanni, "Kukua nena', 'Cingga'tu'mora na te'damo mikitana', na cingga'tu' toomora ammikita pole'na'.' Iamoraka joo misipangkadai?

²⁰ La miingaran tee kadang-Ku' kumua, la kumarrak kamu', mimbating too, apa la marioi to totangmatappa'. La masussa penawammi, apa ia to kamasussanmi la nasullei kamasannangan.

²¹ Ia to kamasannanganmi susi to baine la keanak. Ia ke la keanakki, liwa' sussa na mapa'dik mangnguriwa'. Apa ianna kala'paranmo, ta'pa te'damo naingaranni to pa'dikkina nena', nasaba' gaja sannangngi njajian mesa' pea tama lino.

²² Susi toomo kamu'. Masussa penawammi tee too, apa la kusiamparan pole' kamu', ammimemmasannang. Na moi mesa' tau te'da ngkullei nnalai kamu' joo kamasannanganmi.

²³ Na ia joo wattu te'damo ammilangkutanaina'. La miingaran tee kadang-Ku' kumua, moi apa mipeta'da lako Ambe' mpau sangang-Ku', la naben kamu'.

²⁴ Naratu lako too allo, te'dapa mipeta'dai to apa lako Ambe' mpau sangang-Ku'. Peta'dai ammidiben, nasukku' to kamasannanganmi!"

²⁵ Mpatarruhhi kadan-Na Puang Isa nakua, "Sininna tee kupauan kamu', kupakean ngasan pangpasusian. Apa la den wattunna nate'damo kupakeanni pangpasusian, apa kupau manassa bangmo lako kamu', mpamanassai to Ambe'.

²⁶ Ia joo wattu la meta'da kamu' lako Ambe' mpau sangang-Ku'. Te'da naparallu Aku' la mpeta'dan kamu' lako Ambe',

²⁷ sanga napakamoja'mo kamu' Ambe'. Napakamoja' kamu', nasaba' mipakamoja'na', mimatappa' too kumua topole jiona' mai Ambe'.

²⁸ Topole jiona' mai Ambe', kumentama lino. Na ia tee too la kusalaimi tee lino, kupole pole' lako Ambe'."

²⁹ Mangkadami to anak gurun-Na ngkuanni, "Oo Puang, mane'ri tapau manassa tee too. Te'damo tapake kada pangpasusian.

³⁰ Mane' kiissenri kumua Kita' nnissenni to sininna apa. Taissen jolo to apa la nakutananki' tau. Iamo joo matappa'kan kumua topole jioki' mai Puang Allataala."

³¹ Napebalii Puang Isa nakua, "Jaji matappa'mora kamu'ka tee too?

³² La nadete'mi wattunna, na sitonganna wattunnami tee too, kumua la dipasisarak-sarak kamu'. Pada la pole kamu' lako bolami, ammisalaina' mesa-mesa. Apa sitonganna te'da kumesa-mesa, sanga den Ambe' kusolan.

³³ Kupauan ngasanmo kamu' tee, ammiampa' kamasannangan nasaba' memmesa'mo kamu' sola Aku'. La maparri' kamu' dipakario-rio lan lino. Apa pemawatangngii penawammi, nasaba' mangkamo' ntaloi kuasanna lino."

Yohanes

Video Yohanes 16

Ikuti Kami:

KONTAK | PARTISIPASI | DONASI