Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Selapuqne nike Tiang sampẽang lẽq side pade, adẽq side pade ndẽq murtat.

² Side pade gen tesugulang lẽman balẽ-balẽ ibadah. Dait gen dateng waktune bahwe dengan saq nyematẽq side pade gen paran diriqne ngabdi lẽq Allah.

³ Ie pade laksaneang hal nike lẽq side, sẽngaq ie pade ndẽqman kenal Bapa dait Tiang.

⁴ Laguq mangkin Tiang sampẽang hal nike lẽq side, adẽq ẽraq lamun hal nike telaksane, side pade inget bahwe sampun Tiang sampẽang tipaq side pade." "Hal niki ndẽq Tiang sampẽang lẽq side pade lẽman penembẽqne, sẽngaq Tiang masih araq bareng kance side pade.

⁵ Laguq mangkin Tiang gen lalo ojok Ie saq ngutus Tiang; dait ndẽq sopoq dengan juaq lẽq antare side pade saq beketuan ojok mbẽ lain Tiang.

⁶ Malahan mangkin side pade asẽq, lantaran Tiang sampẽang hal nike lẽq side pade.

⁷ Laguq Tiang sampẽang hal saq kenaq lẽq side pade: Solahan umaq side pade lamun Tiang lalo; sẽngaq lamun Tiang ndẽq lalo, Penulung nike ndẽq gen dateng ojok side pade. Laguq lamun Tiang lalo, Tiang gen ngutus Penulung nike ojok side pade.

⁸ Lamun Penulung nike dateng, Ie gen nyatayang tipaq dunie mengenai dose, mengenai kebenaran, dait mengenai penghakiman.

⁹ Mengenai dose, sẽngaq ie pade tetep ndẽq percaye lẽq Tiang;

¹⁰ mengenai kebenaran, sẽngaq Tiang lalo ojok Bapa dait side pade ndẽq gen serioq Tiang malik;

¹¹ mengenai penghakiman, sẽngaq penguase dunie niki sampun tehukum.

¹² Luwẽq malik saq mẽlẽ Tiang sampẽang tipaq side, laguq mangkin niki side ndẽqman sanggup nerimaq hal nike.

¹³ Laguq lamun Roh nike dateng, nike Roh kebenaran, Ie gen bimbing side pade jari nenaoq selapuq saq kenaq; sẽngaq Ie ndẽq gen bemanik lẽman diriq-Ne mẽsaq, laguq selapuq hal saq Ie pireng, nike saq gen Ie sampẽang dait Ie gen beriteang tipaq side hal-hal saq gen dateng.

¹⁴ Ie gen mulieang Tiang, sẽngaq napi saq Ie sampẽang tipaq side pade Ie terimaq lẽman Tiang.

¹⁵ Selapuq saq araq lẽq Bapa nike dowẽn Tiang. Keranaq nike, Tiang badaq bahwe napi saq tesampẽang siq Roh tipaq side pade, Ie terimaq lẽman Tiang."

¹⁶ "Karing semendaq side pade ndẽq gen serioq Tiang malik, dait karing semendaq ẽndah side pade gen serioq Tiang."

¹⁷ Pire dengan pengiring Deside Isa saling ketuan sopoq kance saq lainne, "Napi maksutne Ie bemanik lẽq ite: 'Karing semendaq side pade ndẽq gen serioq Tiang, dait karing semendaq ẽndah side pade gen serioq Tiang'? Napi ẽndah maksut-Ne bemanik, 'Tiang gen parek ojok Bapa'?"

¹⁸ Ie pade beketuan terus, "Napi artine, 'semendaq'? Ite ndẽq ngerti Ie bebaos mengenai napi!"

¹⁹ Deside Isa wikan bahwe ie pade mẽlẽ metakẽn lẽq Ie, make Ie bemanik, "Baruq Tiang sampẽang, 'Karing semendaq doang side pade ndẽq gen serioq Tiang, dait karing semendaq ẽndah side pade gen serioq Tiang.' Napi nike saq jari persoalan lẽq antare side pade?

²⁰ Setetune Tiang badaq side, side pade gen nangis dait asẽq, laguq dunie gen gembire. Side pade gen susah, laguq kesusahande nike gen berobah jari sukecite.

²¹ Lamun sopoq dengan nine gen nganak, ie susah sẽngaq mule sampun wayene ie menderite. Laguq sesampun anakne sugul, ie lupaq lẽq penderiteanne lantaran cemohne bahwe sopoq manusie sampun teanakang ojok dalem dunie.

²² Maraq nike ẽndah side pade: Mangkin side pade susah, laguq Tiang gen bedait malik kance side pade, make angende gen jari sukecite; dait ndẽq araq sopoq dengan juaq saq bau bait sukecite nike lẽman atẽnde.

²³ Lẽq jelo nike, side pade ndẽq gen beketuan napi-napi malik lẽq Tiang. Tiang badaq side: Setetune napi doang saq side pade tunas lẽq Bapa kadu aran Tiang, nike gen tekabulang siq Bapa.

²⁴ Jangke mangkin niki side pade ndẽqman tunas napi-napi kadu aran Tiang. Pade tunas, make side pade gen nerimaq, adẽq sukecitende jari sempurne."

²⁵ "Selapuqne niki Tiang sampẽang lẽq side pade kadu perumpamean. Laguq gen dateng waktune, Tiang ndẽq gen kadu perumpamean malik, laguq gen nyampẽang secare terus-terang lẽq side pade mengenai Bapa.

²⁶ Lẽq waktu nike side pade gen bedo'e tipaq Bapa kadu aran Tiang. Dait ndẽq Tiang badaq side, bahwe Tiang gen tunasang side pade lẽq Bapa,

²⁷ sẽngaq Bapa mẽsaq ngasihin side pade. Ie ngasihin side pade lantaran side pade ngasihin Tiang, dait percaye bahwe Tiang dateng lẽman Allah.

²⁸ Mule Tiang asalne lẽman Bapa, dait sampun dateng ojok dalem dunie. Laguq mangkin Tiang bilin dunie jari tulak ojok Bapa."

²⁹ Beterus pengiring-pengiring Deside Isa matur lẽq Deside Isa, "Mangkin niki Junjungan Saq Mulie bemanik secare terus-terang, nẽnten kadu perumpamean,

³⁰ dait tiang pade nenaoq bahwe Junjungan Saq Mulie wikan selapuqne. Nẽnten araq sopoq dengan juaq saq perlu ketuanang napi-napi tipaq Junjungan Saq Mulie. Keranaq nike tiang pade percaye bahwe Pelungguh rauh lẽman Allah."

³¹ Jawab Deside Isa tipaq ie pade, "Jari, napi side pade percaye mangkin?

³² Inget! Waktune gen dateng, malahan sampun dateng, side pade gen bekelin sopoq kance saq lain. Side pade gen ulẽq ojok balẽnde mẽsaq dait bilin Tiang mẽsaq-mẽsaq. Laguq Tiang ndẽq mẽsaq-mẽsaq sẽngaq Bapa araq bareng Tiang.

³³ Selapuqne niki Tiang sampẽang adẽq side pade mauq damẽ sejahtere lẽq dalem Tiang. Lẽq dunie niki side pade gen menderite. Laguq teguqang atẽnde! Tiang sampun ngalahang dunie!"

Yohanes

Video Yohanes 16

Ikuti Kami:

KONTAK | PARTISIPASI | DONASI