Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Bi’ Sengko’ jareya ekabala kabbi ka ba’na sopaja ba’na ta’ sampe’a mortad.

² Ba’na bakal epakalowara dhari kennengngan-kennengnganna kabakteyan. Ban e settong bakto oreng se mate’e ba’na bakal apangrasa’a ngalakone jareya menangka pangabdiyanna ka Allah.

³ Ba’na epakantha jareya bi’ reng-oreng jareya sabab reng-oreng jareya ta’ tao ka Rama ban ta’ tao ka Sengko’.

⁴ Tape sateya bi’ Sengko’ ba’na la ebalai parkara jareya, sabab mon jareya kadaddiyan e budhi are, ba’na bakal enga’a ja’ jareya kabbi bi’ Sengko’ la ekabala ka ba’na." "Parkara reya bi’ Sengko’ ta’ ekabala ka ba’na dhari dha’-adha’na sabab Sengko’ apolong ban ba’na.

⁵ Tape sateya Sengko’ entara ka se ngotos Sengko’; tape e antarana ba’na tadha’ settonga se atanya dha’ emma’a Sengko’.

⁶ Sateya saellana jareya kabbi bi’ Sengko’ ekabala ka ba’na, ba’na la’-mala’ laju sossa atena.

⁷ Tape Sengko’ ngoca’a sabendherra ka ba’na: Ka ba’na lebbi bagus mon Sengko’ mangkat; sabab mon Sengko’ ta’ mangkat, Panolong rowa ta’ kera rabu ka ba’na. Tape mon Sengko’ mangkat, Sengko’ ngotosa Erroh jareya ka ba’na.

⁸ Erroh jareya mon la rabu bakal anyata’agiya ka dunnya reya se sabendherra artena dusa, pa-apa se bendher, ban parkara okomanna Allah.

⁹ Erroh jareya bakal anyata’agiya ja’ ta’ parcaja ka Sengko’ reya dusa;

¹⁰ ja’ Sengko’ bendher, sabab Sengko’ entara ka Rama ban ba’na bakal ta’ nangaleyana Sengko’ pole;

¹¹ ban ja’ Allah reya la molae ngokom sabab se ngobasae dunnya reya la eokom.

¹² Gi’ bannya’ se ekoca’agiya Sengko’ ka ba’na tape sateya reya ba’na gi’ ta’ sanggup narema.

¹³ Tape mon Erroh jareya la rabu, iya areya Erroh se anyata’agi barang se bendher parkara Allah, ba’na bakal etontona sopaja ba’na tao ka sakabbiyanna barang se bendher. Erroh jareya ta’ adhabuwa dhari Salerana dibi’ tape adhabuwagiya pa-apa se la epeyarsa Salerana, sarta bakal aparenga oneng ka ba’na apa se kadaddiyana e budhi are.

¹⁴ Erroh jareya bakal ngagungngagiya Sengko’, sabab apa se epanapa’a ka ba’na etarema Erroh jareya dhari Sengko’.

¹⁵ Pa-apa se badha e Rama Tang andhi’. Jareya sababba arapa Sengko’ me’ ngoca’ ja’ se epanapa’ Erroh jareya ka ba’na etarema Salerana dhari Sengko’."

¹⁶ "Sakejja’ aggi’ ba’na bakal ta’ nangaleyana Sengko’ pole, ban sakejja’ aggi’ keya ba’na bakal nangaleyana Sengko’."

¹⁷ Red-moredda Isa badha se saleng atanya kantha reya, "Apa maksodda Salerana adhabu, ‘Sakejja’ aggi’ ba’na bakal ta’ nangaleyana Sengko’ pole, ban sakejja’ aggi’ keya ba’na bakal nangaleyana Sengko’?’ Bariya keya Guru tao adhabu, ‘Sengko’ entara ka Rama.’ Apa maksodda, ya?"

¹⁸ Red-moredda jareya padha saleng atanya terros, "Apa maksodda ’sakejja’ aggi’?’ Sengko’ ban ba’na me’ ta’ ngarte apa se ekadhabu Salerana rowa!"

¹⁹ Isa ngagali ja’ red-moredda jareya atanya’a ka Salerana, daddi laju adhabu, "Gella’ Sengko’ ngoca’, ‘Sakejja’ aggi’ ba’na bakal ta’ nangaleyana Sengko’ pole, ban sakejja’ aggi’ keya ba’na bakal nangaleyana Sengko’.’ Jareya, ya, se padha ekacaca ba’na?

²⁰ Ba’na paparcaja, ya: ba’na bakal nangesa tape dunnya bakal gumbira’a. Ba’na bakal sossa’a tape kasossa’anna ba’na jareya bakal aoba’a daddi kagumbira’an.

²¹ Mon oreng babine’ para’ rembi’a, atena sossa, sabab la napa’ baktona se nanggunga sangsara. Tape mon ana’na la lahir, babine’ jareya loppa ka kasangsara’anna sabab atena perak polana badha babaji’ se lahir ka dunnya.

²² Bariya keya ban ba’na: Sateya ba’na sossa atena, tape Sengko’ tatemmowa pole ban ba’na, daddi atena ba’na bakal peraga; ban tadha’ oreng se bisa’a ngala’ kaperagan jareya dhari atena ba’na.

²³ E are jareya ba’na ta’ kera nya’-tanya’an pa-apa pole ka Sengko’. Ba’na paparcaja, ya: Apa se epenta ba’na ka Rama kalaban Tang nyama, tanto bi’ Rama eparenge.

²⁴ Sampe’ sateya ba’na gi’ ta’ tao menta pa-apa kalaban Tang nyama. Mara menta, ba’na tanto eparenge, me’ olle kagumbira’anna ba’na samporna."

²⁵ "Kabbi jareya bi’ Sengko’ etotorragi ka ba’na ngangguy parompama’an. Tape mon la napa’ baktona Sengko’ ta’ ngangguya parompama’an pole, tape Sengko’ rang-terrangana notorragiya parkara Rama.

²⁶ E bakto jareya ba’na bakal menta’a ka Rama kalaban Tang nyama; bi’ Sengko’ ba’na ebala’ana ja’ Sengko’ ta’ nyo’onnagiya ba’na ka Rama,

²⁷ sabab Rama dibi’ taresna ka ba’na. Rama taresna ka ba’na polana ba’na taresna ka Sengko’, ban parcaja ja’ Sengko’ reya dhateng dhari Allah.

²⁸ Pajat Sengko’ reya dhari Rama ban dhateng ka dunnya reya. Tape sateya Sengko’ ondura dhari dunnya reya abaliya ka Rama."

²⁹ Red-moredda Isa laju mator, "Samangken Junandalem abu-dhabu rang-terrangan ta’ mabi ngangguy parompama’an;

³⁰ samangken abdidalem sadaja oneng ja’ Junandalem ngagali ponapa’a saos. Oreng ta’ mabi atanya ka Junandalem. Daddi abdidalem sadaja padha parcaja ja’ Junandalem ka’dhinto’ dhari Allah asallepon."

³¹ Dhabuna Isa, "Daddi sateya ba’na la parcaja?

³² Kaenga’e, ya! Bakal napa’a baktona, la’-mala’ sanyatana baktona la napa’, ba’na bakal epasalebbudan. Ba’na bakal moleya ka bengkona bang-sebang, Sengko’ edina’agiya kadibi’an. Tape Sengko’ saongguna ta’ kadibi’an sabab Sengko’ apolong ban Rama.

³³ Areya kabbi bi’ Sengko’ ekabala ka ba’na sopaja ba’na taremtemma polana ba’na masettong ban Sengko’. Ba’na bakal nyangsara’a e dunnya. Tape pakellar atena ba’na! Sengko’ la makala dunnya!"

Yohanes

Video Yohanes 16

Ikuti Kami:

KONTAK | PARTISIPASI | DONASI