Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O wange moiosi de Wakisisupu ma Wange ma Amoko, 'o Yesus wanakokau 'ato ma 'orasi ya'adonokau 'una wamada 'o dunia ne'ena ma ngale wolio ma Deade. 'Una wakisibosono 'o nyawa-nyawa gee yodadiokau to 'una 'awi do-domoteke de tatapu wakisibosono sigado ma do-dogumika.

² 'O Yesus de 'awi do-domoteke yo'odomo ma gu-gudaioka 'o obiruku, de 'o Tokata ma Koana ma niati 'ito-torou 'isingosangokau 'o Yudas 'awi singina ma dodaka, ma ngale 'o Yesus wiwukunu. 'O Yudas gu'una 'o Simon Iskariot 'awi ngowaka.

³ 'O Yesus wanakokau 'ato 'awi Dea wosito-togumokau 'o pareta 'iodumu 'unaka. De 'una wanakokau mita 'una ge'ena ma Jo'oungu ma Dutuoka de waino, de dua wolioli ma Jo'oungu ma Dutuka.

⁴ Sababu ge'ena 'una woma'oko de wa'aiki 'awi juba, de 'awi handuk womasipusukino 'awi goronano.

⁵ Ge'enaka de 'o 'akere wodarisuku 'o giama ma gi-gisoko ma ngiioka, de womasitero 'isoka 'o gilaongo so 'awi do-domoteke manga dou wa'isoko. Wa'isokoka 'asa de wosi'ikiri de 'o handuk gee 'awi goronaka wosipusu-pusukino.

⁶ Gee wototara 'o Simon Petrusika, de 'o Simon Petrus kawongosekau, "'Etei Jou, 'ato ngona de 'ai dou na'isoko?"

⁷ 'O Yesus wosango, "'Okia naga todiai ne'ena, ma 'orasi ne'ena ngona konasahewasi, ma dua 'asa nasahe."

⁸ 'O Petrus wongose 'o Yesusika, "'Uwa Jou! Ka ma eta ma koidadiwa na'isoko 'ai dou!" Ma 'o Yesus wosango, "Nako kotoni'isokuwa, ge'ena ngona de de ngoi kopomarimoiwa."

⁹ 'O Simon Petrus kawongosekau, "Jou, nako koge'ena, de 'uwa duga ka 'ai dou, ma 'ai giama de 'ai saeke mita!"

¹⁰ 'O Yesus wongose 'o Petrusika, "'O nyawa gee yoma'osikokau, ge'ena manga roese 'iodumu 'ikokitebinokau. 'Ona koiparaluuwau yaki'osikoli; duga ka manga douou gee yotagi de 'imedirokau, ge'ena salingou ya'isoko. Ngini ne'ena niotebinokau, duga konioodumuwa."

¹¹ ('O Yesus wanakokau nagu'una dua wiwukunu. Ge'enau so wongose 'ato, "Ngini ne'ena niotebinokau, ma konioodumuwa.")

¹² 'O Yesus wakoki'isokoka manga dou, de womasinoali 'awi juba 'asa de woliokali wi rioka. Ge'enaka de kawongosekau 'onaka, "Niasahe? 'okia naga gee 'asa katodiaioka nginika?

¹³ Ngini nio'asoko ngoino 'Aba Guru de ma Jou. De ge'ena ma goungu.

¹⁴ Nako ngoi to ngini 'ania Jou de nia Guru ma ta'isokokau 'ania dou, ngini mita salingou 'ania dou nimakadigisoko.

¹⁵ Ngoi tosidumutokau nginika 'okia salingou niadiai, la ngini mita niadiai 'isoka kokia naga gee ngoi tadi-diai nginika.

¹⁶ 'Ai demo ne'ena ma gou-goungu 'itiai: 'O yongosi koyofoloidewa de manga tuangi. De 'o su-suloko koyofoloidewa de gee wosulo-suloko.

¹⁷ Ne'ena ngini nianakokau 'iodumu ge'ena. Niosanangioka ngini nako niamoteke.

¹⁸ 'Okia naga gee ngoi tosidemo ne'ena, ge'ena ma ngale ko ngini nioodumuwa. Ngoi takinako 'iti-tiai nago'ona gee takiirikokau. Ma 'okia naga gee 'isilefokau 'o Buku 'Itebi-tebinoka salingou 'idadi, ge'ena la: ''O nyawa wimoi gee mimasido'odomo de de ngoi, 'asa woiwukunu.'

¹⁹ Ge'ena koidadiwasi 'ena tinisitotarokau nginika ma 'orasi ne'ena, la dua gee 'idadi, ngini 'asa niongaku 'ato, 'Ngoi ne'ena 'una gee 'isironga NGOI NAGA.'

²⁰ Ma gou-goungu 'itiai 'ai demo ne'ena: Nago'ona yakidawongo 'o nyawa gee takisulo-suloko, ge'ena 'idawongo ngoi. De nago'ona 'idawongo ngoi, ge'ena widawongo 'una gee woisulo-suloko."

²¹ 'O Yesus koge'ena wongoseka, de 'awi singina 'isusa ma sala. Ge'enaka de 'una kawongosekau, "Ma gou-goungu 'itiai 'ai demo ne'ena: Wimoi naga nginioka gee dua woiwukunu."

²² 'Awi do-domoteke yomakaungini moi de moi de yoherangi ma sala, sababu 'ona koyanakowa 'awi dumutu nagu'unaka.

²³ 'O do-domoteke gee 'o Yesus wisiboso-bosono de yogiamanai ma sala ge'ena 'o Yesus 'awi dateoka.

²⁴ 'O Simon Petrus wiakotawi 'unaka, la wosano 'o Yesusika 'ato 'awi dumutu nago'onaka.

²⁵ So 'o do-domoteke gu'una womasisori-sorika monga de wosano 'o Yesusika, "Nagu'una ge'ena Jou?"

²⁶ 'O Yesus wosango, "'O nyawa gee towikula 'o roti todawaruoka 'o sawokuku, 'unau ge'ena." So 'o Yesus wa'ese 'o roti 'o eta moi de wodawaruoka 'o sawouku; deika wokula 'o Yudasika 'o Simon Iskariot 'awi ngowaka.

²⁷ 'O Yudas wa'eseka 'o roti ge'ena, de 'o Tokata ma Koana 'awi singina yaparetanou. Ge'enaka de 'o Yesus kawongosekau 'o Yudasika, "Nomatai-taiti nadiai 'okia naga gee nomau nadiai."

²⁸ Gee yo'odo-'odomo ge'enaka dau komoiwa yasahe 'ido'oa so 'o Yesus koge'ena wongose 'o Yudasika.

²⁹ Munuka 'ona yongose 'o Yesus wosuloko 'o Yudas 'o kianikia wo'ija ma ngale manga paraluu 'o rame-rameka ge'ena, bolo 'o pipi ma eta wakikula 'o nyawa yosusa-susaka, sababu 'una ge'ena manga pipi ma ga-gao.

³⁰ 'O Yudas kawa'eseka 'o roti ge'ena, de kawogila-gilaka wosupu 'ena 'iobirokau.

³¹ 'O Yudas wopasaka de 'o Yesus kawongosekau, "Ne'ena ma 'orasi ya'adonokau ngoi 'o Nyawa ma Ngowaka 'isitedene, de ma Jo'oungu ma Dutu wisitedene ma ngekomo ngoi.

³² Nako ma Jo'oungu ma Dutu wisitedene ma ngekomo ngoi, ngoi mita 'asa ma Jo'oungu ma Dutu woisitedene ma ngekomo 'una ma sirete. De ma Jo'oungu ma Dutu 'asa wacobou woisitedene.

³³ Ngini gee matero ka 'ai ngowa-ngowaka, ngoi dua koito'ingowau tomanoa de de ngini. Ngini 'asa ninonu ngoi, ma 'isoka gee tosidemokau 'o Yahudioka manga balu-balusika, koge'enali mita tosidemo nginika, 'o ngii kiaka naga ngoi totagi, ngini konia'akunuwa niaika.

³⁴ Ngoi tinikulakau 'o besesongo ma sungi ge'ena la, nimasikabosono moi de moi. 'Isoka ngoi tinisibosono ngini, koge'enali mita ngini salingou nimasikabosono.

³⁵ Nako ngini nimasikabosono, 'o nyawa 'iodumu 'asa yanako 'ato ngini ge'ena to ngoi 'ai do-domoteke."

³⁶ 'O Simon Petrus wosano 'o Yesusika, "Jou, kiaka notagi?" 'O Yesus wosango, "Kiaka naga ngoi totagi ngona koidadiwa nomoteke ma 'orasi ne'ena. Ma dua ngona 'asa noimoteke ngoi."

³⁷ 'O Petrus wosanoli, "Jou, 'ido'oa so ngoi koidadiwa tonimoteke ma 'orasi ne'ena? Ngoi katomodeke tosongene ma ngale ngona Jou!"

³⁸ 'O Yesus wosango, "Ma goungu? nomodeke nosongene ma ngale ngoi? Nosi-singina, dua 'o namoro koisorenuawasi 'ena nomadidumu ma sa'angeu nongose 'ato konoinakowa!"

Yohanes

Video Yohanes 13

Ikuti Kami:

KONTAK | PARTISIPASI | DONASI