Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sada wari ope Wari Raya Paskah, nggo ieteh Jesus maka seh PaksaNa ItadingkenNa doni enda janah mulih Ia ku BapaNa. Keleng kal AteNa teman-TemanNa i doni enda janah seh ku kedungenna tetap AteNa keleng.

² Jesus ras ajar-AjarNa sangana man berngi. Iblis nggo erdahin i bas ukur Judas anak Simon Iskariot guna ndayaken Jesus.

³ Ieteh Jesus maka nggo ibereken Dibata kuasa kai pe man BaNa. Ieteh Jesus pe maka Ia reh i bas Dibata nari janah nandangi mulih ku Dibata.

⁴ Emaka tedis Jesus, itangtangina JubahNa, jenari IbentingkenNa uis.

⁵ ItamakenNa lau ku bas sambung, jenari IburihiNa nahe ajar-AjarNa janah IelapNa alu uis si IbentingkenNa.

⁶ Asum seh giliren Simon Petrus nina Simon Petrus man Jesus, "O Tuhan, Kam kin arusna si murihi nahengku?"

⁷ Erjabap Jesus man Simon Petrus, "Si Kubahan genduari e, la iangkandu, tapi pagin tangkas kap man bandu."

⁸ Ngaloi ka Petrus, "Asa ndigan pe la kubere IburihiNdu nahengku!" Tapi nina Jesus man bana, "Adi la Kuburihi nahendu lanai kam ajar-ajarKu."

⁹ Ngaloi Simon Petrus, "O Tuhan, adi bage kin ola nahengku saja burihi! Tapi burihilah tanku ras takalku pe!"

¹⁰ Nina Jesus, "Kalak si nggo ridi nggo kap bersih kerina kulana, emaka lanai bo perlu ia ridi; nahena saja ngenca perlu iburihi."

¹¹ Kam nggo bersih kerina, sekalak ngenca lang. (Nggo ieteh Jesus ise si nandangi ndayaken Ia; perbahan si e me maka nina, "Kam nggo bersih kerina, sekalak ngenca lang.")

¹² Kenca dung iburihi Jesus kerina nahe ajar-AjarNa e, IpakeNa ka mulihi JubahNa ndai, jenari kundul Ia ku InganNa. Kenca bage nungkun Jesus nina, "Iangkandu kin kai tujunna si Kubahan man bandu enda ndai?

¹³ Ikatakenndu Aku Guru bage pe Tuhan. Payo kap si ikatakenndu e; sabap tuhu me Aku Guru dingen Tuhan.

¹⁴ Dage adi Aku, Guru dingen Tuhanndu nggo murihi nahendu, patut pe maka kam siburih-burihen nahe.

¹⁵ Nggo Kubahan si man usihenndu gelah banci ibahanndu bagi si nggo Kubahan man bandu e.

¹⁶ Kukataken man bandu: Situhuna la lit budak belinen asangken tuanna. Labo lit suruh-suruhen belinen asangken si nuruh ia.

¹⁷ Genduari nggo ietehndu kerna si enda; malem tuhu-tuhu atendu adi idalankenndu i bas geluhndu.

¹⁸ Aku ngerana enda labo kerna kam kerina. Kueteh nge ise nggo Kupilihi. Tapi kai si tersurat i bas Pustaka Si Badia arus seh. I bas Pustaka Si Badia lit tersurat, 'Kalak si man ras Aku, ia me si ngelawan Aku.'

¹⁹ Si enda Kukataken man bandu ope denga jadi, gelah kenca jadi, tek kam maka 'Aku me Aku.'

²⁰ Kukataken pe man bandu: Kalak si ngaloken persuruhenKu, ialokenna pe Aku, janah kalak si ngaloken Aku, ialokenna pe Dibata si nuruh Aku."

²¹ Kenca ikataken Jesus si e, megogo kal AteNa. Emaka ngerana Ia alu terus terang nina, "Kukataken man bandu, si tuhuna sekalak i bas kam nandangi ndayaken Aku."

²² Tumpat kal ukur ajar-ajar, emaka sinihenen ia sapih-sapih ia, sabap la ietehna ise kata Jesus e.

²³ Sekalak ajar-ajar si lebih ikelengi Jesus kundul rembak ras Ia.

²⁴ Emaka ikuit Simon Petrus ia, jenari nina, "Sungkun ise kin KataNa e?"

²⁵ Emaka ajar-ajar si kundul rembak ras Jesus ndai ngerembaki Jesus tole jenari nina nungkun, "O Tuhan, ise kin KataNdu e?"

²⁶ Erjabap Jesus, "Kucalehken me roti enda ku bas mangkuk jenari man ise kari kubereken, ia me katangKu." Kenca IcalehkenNa roti e, IberekenNa man Judas anak Simon Iskariot.

²⁷ Asum ialoken Judas roti e minter ibengketi Iblis ia. Jenari nina Jesus man bana, "Kai si nggo irencanakenndu e, minterlah bahan!"

²⁸ Sekalak pe ajar-ajar la ngangkasa kai si ikataken Jesus e.

²⁹ Piga-piga ajar-ajar erpengakap maka Judas isuruh Jesus nukur keperlun guna perayan Paskah; ntah isuruh Jesus ia mereken penampat man kalak musil, sabap Judas me si njemak duit.

³⁰ Kenca ialoken Judas roti e, minter ia lawes ndarat; paksa si e wari nggo gelap.

³¹ Kenca Judas lawes nina Jesus, "Genduari ipetangkas me kemulian Anak Manusia si isuruh Dibata janah kemulian Dibata pe ipetangkas arah Ia.

³² Adi kemulian Dibata ipetangkas arah Ia maka Dibata pe mpetangkas kemulian Anak Manusia e i bas DiriNa, janah minter me IbahanNa.

³³ O anakku, kentisik nari ngenca Aku ras kam. Idaramindu me pagi Aku. Tapi genduari Kukataken man bandu bagi si nggo Kukataken man kalak Jahudi e, 'Kam labo banci lawes ku inganKu e.'

³⁴ Kubereken man bandu pedah si mbaru, e me: Sikeleng-kelengenlah kam. Bagi Aku nggo engkelengi kam, kam pe min arus sikeleng-kelengen.

³⁵ Adi sikeleng-kelengen kam, kerina kalak meteh maka kam ajar-ajarKu."

³⁶ Jenari nungkun Simon Petrus man Jesus nina, "O Tuhan, ku ja kin AteNdu lawes?" Erjabap Jesus, "Genduari labo banci Aku ikutkenndu ku inganKu lawes e, tapi denggo ikutkenndu nge Aku."

³⁷ Emaka nungkun ka Petrus nina, "O Tuhan ngkai maka la banci Kam kuikutken genduari? Aku pang mate man GunaNdu."

³⁸ Ngaloi Jesus, "Tuhu-tuhu kin kam nggo pang mate man gunangKu?" Kukataken man bandu, "Si tuhuna ope denga tekuak manuk nggo ipersokenndu pagi Aku telu kali."

Yohanes

Video Yohanes 13

Ikuti Kami:

KONTAK | PARTISIPASI | DONASI