Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sejelo sendẽqman Hari Raye Paskah, Deside Isa wikan bahwe sampun waktune Ie bilin dunie niki jari tulak tipaq Bapa-Ne. Ie ngasihin dengan-dengan saq jari dowẽ-Ne lẽq dunie, dait Ie tetep ngasihin ie pade jangke penutuq.

² Sewaktu Deside Isa dait pengiring-pengiring-Ne kenyeke medaran, Belis sampun tamaqang niat lẽq dalem atẽ Yudas bije Simon Iskariot jari behianat lẽq Deside Isa.

³ Deside Isa wikan bahwe Bapa sampun nyerahang selapuq kekuasean tipaq Ie. Ie wikan ẽndah bahwe Ie rauh lẽman Allah dait gen tulak tipaq Allah.

⁴ Keranaq nike Ie ngadeg, lekaq jubah-Ne terus bebet-Ne kain lẽnen lẽq kẽng-Ne.

⁵ Sesampun nike, Ie isiq aiq ojok dalem tepaq, beterus mulai bisoq naẽn pengiring-pengiring-Ne dait lapne kadu kain lẽnen saq tebebet lẽq kẽng-Ne nike.

⁶ Sewaktu giliran naẽn Simon Petrus tebisoq, ie matur lẽq Deside Isa, "Junjungan Saq Mulie, Pelungguh gen bisoq naẽn tiang?"

⁷ Jawab Deside Isa, "Mangkin side ndẽq ngerti napi saq Tiang laksaneang niki, laguq ẽraq side gen ngerti."

⁸ Jawab Petrus lẽq Deside Isa, "Junjungan Saq Mulie, sampunang gati Junjungan Saq Mulie bisoq naẽn tiang!" Laguq jawab Deside Isa, "Lamun Tiang ndẽq bisoq naẽnde, side ndẽq mauq bagian bareng Tiang."

⁹ Simon Petrus matur, "Lamun maraq nike, Junjungan Saq Mulie, sampunang cume naẽn tiang laguq ime dait ulu tiang ẽndah!"

¹⁰ Manik Deside Isa lẽq Petrus, "Dengan saq sampun mandiq, sampun bersi selapuqne Ie ndẽq perlu tepersiq malik; kecuali naẽne. Side pade sampun bersi, laguq ndẽq selapuqne."

¹¹ (Deside Isa sampun wikan sai saq gen behianat lẽq Ie. Keranaq nike Ie bemanik, "Side pade sampun bersi, laguq ndẽq selapuqne.")

¹² Sesampun Deside Isa bisoq naẽn ie pade, Ie kadu malik jubah-Ne dait melinggih. Terus Deside Isa bemanik lẽq ie pade, "Napi side pade ngerti saq Tiang laksaneang lẽq side?

¹³ Side pade ngempoh Tiang Guru dait Junjungan Saq Mulie. Dait mule maraq nike setetune.

¹⁴ Lamun Tiang jari Junjungan Saq Mulie dait Gurunde sampun bisoq naẽn side, side pade wajib ẽndah saling bisoqang naẽ.

¹⁵ Tiang ngebẽng teladan niki lẽq side pade, adẽq side pade laksaneang ẽndah napi saq sampun Tiang laksaneang lẽq side.

¹⁶ Mule kenaq manik Tiang niki: Sopoq hambe ndẽqne belẽqan lẽman majikanne, dait sopoq utusan ndẽqne belẽqan lẽman saq ngutus ie.

¹⁷ Lamun side pade sampun nenaoq selapuqne niki, side pade gen bahagie lamun ngelaksaneang hal nike.

¹⁸ Napi saq Tiang sampẽang niki ndẽqne mengenai side pade selapuq. Tiang nenaoq sai-sai saq sampun Tiang pilẽq. Laguq napi saq tetulis dalem Kitab Suci, harus telaksane, 'Dengan saq iring Tiang medaran, gen ngelawan Tiang.'

¹⁹ Hal nike mangkin Tiang sampẽang lẽq side pade, sendẽqman telaksane, adẽq lamun laun hal nike telaksane, side pade gen percaye bahwe Tiang niki Ie.

²⁰ Setetune kenaq manik Tiang niki: Sai nerimaq dengan saq Tiang utus, ie nerimaq Tiang. Dait sai saq nerimaq Tiang, nerimaq Ie saq ngutus Tiang."

²¹ Sesampun Deside Isa bemanik maraq nike, Ie jari asẽq gati. Beterus Ie bemanik, "Tiang badaq side, setetune salaq sopoq lẽq antare side pade gen behianat lẽq Tiang."

²² Pengiring-pengiring-Ne saling ẽngat sopoq kance saq lain dait jari bingung, sẽngaq ie pade ndẽq nenaoq sai saq temaksut siq Deside Isa.

²³ Salaq sopoq pengiring saq tekasihin siq Deside Isa tokol lẽq dẽkẽt Deside Isa.

²⁴ Simon Petrus ngebẽng isarat lẽq ie adẽq ie metakẽn lẽq Deside Isa sai saq temaksut nike.

²⁵ Beterus pengiring Deside Isa nike ngerapetin Deside Isa, dait metakẽn, "Junjungan Saq Mulie, sai dengan nike?"

²⁶ Jawab Deside Isa, "Dengan saq Tiang bẽng ruti sesampun Tiang telep ruti nike ojok dalem jembung, ie dengan saq Tiang maksut." Make Deside Isa bait sepeleng ruti, telepangne ojok dalem jembung; beterus icanin-Ne tipaq Yudas, bije Simon Iskariot.

²⁷ Sesampun Yudas nerimaq ruti nike, Belis tame ojok dalem atẽne. Beterus Deside Isa bemanik lẽq ie, "Becat laksaneang napi saq mẽlẽ side laksaneang."

²⁸ Ndẽq araq sopoq dengan juaq lẽq antare ie pade saq tokol bekelor lẽq derike ngerti kembẽq Deside Isa bemanik maraq nike lẽq Yudas.

²⁹ Araq saq paran bahwe Deside Isa manikang Yudas beli napi-napi saq teperluang lẽq perayaan nike, atao ngicanin kẽpẽng tipaq dengan miskin -- sẽngaq Yudas nike jari bendahare lẽq antare ie pade.

³⁰ Sesampun Yudas nerimaq ruti nike, ie langsung sugul. Waktu nike sampun peteng.

³¹ Sesampun Yudas lumbar, Deside Isa bemanik, "Mangkin Bije Manusie temulieang dait Allah temulieang langan Ie.

³² Lamun Allah temulieang langan Ie, Ie ẽndah gen temulieang siq Allah langan diriq-Ne. Malahan Allah gelis gen ngemulieang Ie.

³³ Bije-bije Tiang, Tiang ndẽq gen ngonẽq malik ndot kance side pade. Side pade gen boyaq Tiang, laguq maraq saq sampun Tiang badaq lẽq dengan-dengan Yahudi, maraq nike ẽndah Tiang badaq side pade; ojok taoq saq Tiang laiq, side pade ndẽq bau dateng.

³⁴ Tiang ngebẽng prẽntah baru lẽq side: Pade kasihin sopoq kance saq lain. Pade maraq Tiang ngasihin side pade, maraq nike ẽndah side pade harus saling kasihin.

³⁵ Lamun side pade saling kasihin, selapuq dengan gen nenaoq bahwe side pade pengiring-pengiring Tiang."

³⁶ Simon Petrus metakẽn lẽq Deside Isa, "Junjungan Saq Mulie, Pelungguh gen lumbar ojok mbẽ?" Jawab Deside Isa, "Ojok mbẽ lain Tiang, side ndẽq bau milu mangkin. Side gen turut Tiang ẽraq."

³⁷ Petrus metakẽn malik, "Junjungan Saq Mulie, kembẽq tiang nẽnten bau turut Pelungguh mangkin? Tiang rẽde matẽ demi Pelungguh!"

³⁸ Jawab Deside Isa, "Napi tetu side rẽde matẽ demi Tiang? Tiang badaq side pacu-pacu, laun sendẽqman manuk ngungkung, side sampun telu kali tilas Tiang!"

Yohanes

Video Yohanes 13

Ikuti Kami:

KONTAK | PARTISIPASI | DONASI