Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Saare sabellunna Are Raja Paska Isa la ngagali ja’ la napa’ baktona Salerana abali ka Ramana. Salerana taresna ka reng-oreng se daddi kaagunganna e dunnya reya, ban teptep taresna ka reng-oreng jareya sampe’ ka aherra.

² Isa ban red-moredda teppa’na adha’ar lem-malem. Iblis la mamaso’ pekkeran juba’ e dhalem atena Yudas ana’na Simon Iskariyot, kaangguy akiyanat ka Isa.

³ Isa ngagali ja’ sakabbiyanna kakobasa’an la epassra’agi ka Salerana bi’ Rama. Salerana ngagali keya ja’ Salerana asalla dhari Allah ban bakal abaliya ka Allah.

⁴ Daddi Isa laju ngadek, mokka’ jubana, ban naleyagi andhuk ka tengngana.

⁵ Saellana jareya laju nyelen aeng ka jembung, pas molae maccowe sokona red-moredda, saellana laju epakerreng bi’ andhuk se etaleyagi ka tengngana.

⁶ Sanapa’na ka giliranna Petrus, Petrus mator, "Adhu, Guste, masa’ Panjennengngan maccowana soko abdina?"

⁷ Dhabuna Isa, "Sateya ba’na ta’ ngarte apa se elakone Sengko’ reya, tape e budhi are ba’na tanto ngarte."

⁸ "Ampon, Guste," ca’na Petrus ka Isa, "Ampon ja’ maccowe soko abdina!" Tape Isa adhabu, "Mon ba’na ta’ ebaccowe bi’ Sengko’, ba’na tadha’ hubunganna ban Sengko’."

⁹ Simon Petrus mator, "Manabi kadi ka’dhinto’, Guste, ngereng baccowagi tanang sareng cethak abdina jugan, ja’ namong soko malolo."

¹⁰ "Oreng se la mandhi, la berse kabbi," dhabuna Isa ka Petrus. "Ta’ osa eberse’e pole kajabana sokona. Ba’na kabbi la padha berse, kajabana se kasorang."

¹¹ (Isa la ngagali sapa se akiyanadana Salerana. Jareyasababba arapa me’ adhabu, "Ba’na kabbi la padha berse, kajabana se kasorang.")

¹² Saellana maccowe sokona red-moredda, Isa masang jubana laju alenggi pole. Saellana jareya laju adhabu ka red-moredda jareya, "Ba’na ba’ ngarteya apa se elakone Sengko’ ka ba’na gi’ buru jareya?

¹³ Bi’ ba’na Sengko’ esebbut Guru ban Pangeran. Ban jareya pajat bendher.

¹⁴ Mon Sengko’ reya, Guru ban Pangeranna ba’na, maccowe sokona ba’na, ba’na wajib keya saleng maccowe sokona.

¹⁵ Sengko’ aberri’ conto jareya ka ba’na, sopaja ba’na nerowagi apa se la elakone Sengko’ ka ba’na.

¹⁶ Sengko’ ngoca’a sabendherra ka ba’na: tadha’ dunor se araja’an dhari lorana, ban tadha’ otosan se araja’an dhari se ngotos.

¹⁷ Mon ba’na la tao jareya kabbi, pojur onggu mon ba’na ajalannagi jareya kabbi.

¹⁸ Se ekacaca Sengko’ reya banne parkara ba’na kabbi. Sengko’ tao pa-sapa se epele Sengko’. Tape se esebbuttagi e dhalem Alketab kodu kalakon, iya areya se nyebbuttagi ‘Oreng se ngakan apolong ban Sengko’, jareya se ngamoso ka Sengko’.’

¹⁹ Parkara jareya bi’ Sengko’ ekabala ka ba’na sateya reya, sabellunna kadaddiyan jareya kalakon, me’ olle mon jareya la kalakon dhaggi’ ba’na parcaja ja’ Sengko’ reya se esebbut SENGKO’ BADHA.

²⁰ Sengko’ ngoca’a sabendherra: Sapa se narema oreng se eotos Sengko’, nyamana narema Sengko’. Ban sapa se narema Sengko’, narema se ngotos Sengko’."

²¹ Saellana adhabu kantha jareya, Isa arassa ce’ ngennessa. Laju adhabu, "Sengko’ ngoca’a sabendherra: E antarana ba’na badha settong se akiyanadana Sengko’."

²² Red-moredda padha saleng pandeng, kabbi padha heran sapa se ekamaksod.

²³ Mored se ekaase’e Isa toju’ e seddi’na Isa.

²⁴ Simon Petrus aberri’ tandha ka mored jareya, esoro atanya sapa se ekamaksod.

²⁵ Daddi mored jareya ngengsek ka seddi’na Isa, laju atanya, "Pasera, Guste?"

²⁶ Isa adhabu, "Oreng se bi’ Sengko’ eberri’ana roti se ecabbur ka piala reya, jareya orengnga." Daddi Isa mondhut roti sakerra’, ecabbur ka piala, laju eparengngagi ka Yudas ana’na Simon Iskariyot.

²⁷ Gi’ buru nampane roti jareya Yudas laju emaso’e Iblis. Dhabuna Isa ka Yudas, "Duli lakone apa se ekakarep ba’na."

²⁸ Reng-oreng se toju’ ngakan e jadhiya tadha’ settonga se ngarteya arapa Isa me’ adhabu kantha jareya ka Yudas.

²⁹ Badha se nyangka ja’ Yudas epakon le-melle kaangguy kaparlowan e pesta jareya, otabana aberri’ pesse sakone’ ka oreng mesken, sabab Yudas se neggu’ pesse ekkassa Isa ban red-moredda.

³⁰ Saellana narema roti gella’ Yudas laju kalowar. Are la malem.

³¹ Saellana Yudas kalowar, Isa adhabu, "Sateya Pottrana Manossa eagungngagi, ban Allah eagungngagi kalaban parantara’anna.

³² Mon Allah eagungngagi kalaban parantara’anna, Pottrana Manossa jareya bakal eagungngagiya Allah kalaban parantara’anna Salerana dibi’. La’-mala’ bi’ Allah bakal duliya eagungngagi.

³³ Na’, Sengko’ ta’ abida pole se apolonga ban ba’na kabbi. Ba’na bakal nyareya Sengko’, tape Sengko’ la abala ka ba’na akantha se la ekoca’agi Sengko’ ka ja-pangraja Yahudi. Ba’na ta’ bisa entar ka kennengngan se eentarana Sengko’.

³⁴ Bi’ Sengko’ ba’na eberri’ana parenta se anyar: Ba’na kodu saleng taresna. Akantha Sengko’ se taresna ka ba’na, bariya keya ba’na kodu saleng taresna.

³⁵ Mon ba’na saleng taresna, sakabbiyanna oreng bakal taowa ja’ ba’na Tang mored."

³⁶ "Meyosa ka ka’dhimma Junandalem, Guste?" ca’na Simon Petrus ka Isa. Dhabuna Isa, "Sateya reya ba’na ta’ bisa noro’ Sengko’ ka kennengngan se eentarana Sengko’."

³⁷ "Guste, aponapa abdidalem me’ ta’ kengeng ngereng Junandalem samangken?" ca’na Petrus pole. "Abdidalem ehlas mate kaangguy Junandalem!"

³⁸ Dhabuna Isa, "Ba’ ongguwa ba’na reya ehlas mate kaangguy Sengko’? Ba’na bi’ Sengko’ ebala’ana se sabendherra, ya: sabellunna ajam akongko’ dhaggi’, ba’na la tello kale ngoca’ ta’ kennal ka Sengko’!"

Yohanes

Video Yohanes 13

Ikuti Kami:

KONTAK | PARTISIPASI | DONASI