Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sahari sabalun Ari Rayo Paskah, Isa Almasih lah tawu baraso lah tibo wakatunyo, untuak Baliau barangkek dari dunia ko babaliak kapado Bapak-Nyo. Baliau mangasiahi urang-urang nan manjadi miliak-Nyo di dunia, Baliau tatap mangasiahi urang-urang tu sampai ka kasudahannyo.

² Baliau jo pangikuik-pangikuik-Nyo sadang makan malam. Ubilih lah mamasuakkan niyaik jahek ka dalam ati si Yudas anak Simon Iskariot, untuak mangkiyanaik-i Isa Almasih.

³ Isa Almasih tawu, baraso Bapak lah manyarahkan sagalo kuwaso kabake Baliau. Baliau tawu pulo, baraso Baliau datang dari Allah, ka babaliak pulo kapado Allah.

⁴ Mako tagaklah Baliau sambia mambukak jubah, Baliau mangabekkan anduak di pinggang-Nyo.

⁵ Sasudah tu Baliau manuwangkan ayie ka dalam dulang, Baliau basuahlah kaki pangikuik-pangikuik-Nyo, sudah tu Baliau seka jo anduak nan takabek dipinggang-Nyo tu.

⁶ Tibolah dilegaran si Simon Petrus, inyo bakato, "Tuhan, masokan Tuhan nan ka mambasuah kaki ambo?"

⁷ Baliau manjawab, "Kiniko angkau indak ka mangarati doh, apo mukasuiknyo nan Ambo karajokan ko, tapi, isuak barulah angkau mangarati apo ujuik mukasuiknyo."

⁸ Si Petrus bakato, "Jan lai Tuhan. Jan lai Tuhan nan mambasuah kaki ambo!" Tapi Isa Almasih bakato, "Jikok Ambo indak mambasuah kaki angkau, mako angkau indak basangkuik pauik doh jo Ambo."

⁹ Si Simon Petrus bakato, "Jikok baitu Tuhan, janlah hanyo kaki ambo sajo nan dibasuah, tapi, tangan jo kapalo ambo iyo pulo lah!"

¹⁰ Isa Almasih bakato, "Urang nan lah sudah mandi, inyo lah barasiah. Inyo indak paralu lai dibarasiahkan; salain dari kakinyo. Angku-angku ko lah barasiah, tapi indak kasadonyo doh."

¹¹ (Isa Almasih lah tawu, siya urangnyo nan ka mangkiyanaik-i Baliau. Itu mangkonyo Baliau mangatokan, "Angku-angku ko lah barasiah, tapi indak kasadonyo doh.")

¹² Sasudah Baliau mambasuah kaki pangikuik-Nyo, Baliau manganakkan jubah, sudah tu Baliau duduak. Mako bakatolah Baliau kabake pangikuik-Nyo tu, "Layi mangarati tu angku-angku, apo mukasuiknyo nan Ambo karajokan sabanta ko?

¹³ Angku-angku mangatokan, Ambo ko Guru, kok indak angku-angku mangatokan, Ambo ko Tuhan. Batua tu, itulah nan sabananyo.

¹⁴ Jikok Ambo nan sabagai Tuhan, sabagai Guru angku-angku iyo pulo, namuah mambasuah kaki angku-angku, mako angku-angku musti pulo balega-lega mambasuah kaki.

¹⁵ Ambo mambari conto kabake angku-angku, supayo angku-angku mangarajokan pulo, apo nan lah Ambo karajokan kabake angku-angku.

¹⁶ Nan sabananyolah, nan Ambo katokan ko: Surang budak, indak labiah mulie dari induak samangnyo, baitu pulo surang pisuruah indak labiah mulie dari urang nan ma utuihnyo.

¹⁷ Jikok angku-angku lah tawu jo kasadonyo tu, mako babahagialah angku-angku, jikok lai mangarajokannyo.

¹⁸ Apo nan Ambo katokan ko, indak tantang angku-angku nan kasadonyo ko doh. Ambo tawu siya-siya nan lah Ambo piliah. Tapi apo nan tatulih dalam Alkitab, musti tajadi, iyolah 'Urang nan makan samo-samo jo Ambo, inyo ka bakiyanaik kabake Ambo.'

¹⁹ Mako Ambo sampaikan kabake angku-angku kiniko, sabalun tajadi, supayo, jikok kajadian tu tajadi isuak, mako angku-angku ka picayo, baraso Ambo lah Baliau, nan dinamokan, ADEN ADO.

²⁰ Nan sabananyolah nan Ambo kato ko: Siya nan lai picayo kabake urang nan Ambo utuih, ba arati inyo picayo kabake Ambo. Baitu pulo, siya nan lai picayo kabake Ambo, ba arati inyo picayo kabake Baliau, nan ma utuih Ambo."

²¹ Sasudah Isa Almasih bakato bakcando itu, sangaik ibonyo ati Baliau. Mako bakatolah Baliau, "Nan sabananyolah nan Ambo katokan ko: Salah surang di antaro angku-angku ko, ado nan ka mangkiyanaik-i Ambo."

²² Pangikuik-pangikuik Baliau bi caliak mancaliak sasamo inyo, inyo bi tacangang, dek karano indak tantu siya nan dimukasuikkan dek Baliau.

²³ Pangikuik nan sangaik Baliau kasiahi, duduak di sabalah Baliau.

²⁴ Si Simon Petrus ma agiah kode ka inyo, supayo inyo batanyo kabake Baliau, siya nan sabananyo urang nan dimukasuikkan dek Baliau.

²⁵ Mako pangikuik nan dikasiahi tu, marapekkan badan kabake Baliau, sambia batanyo, "Siya tu urangnyo Tuhan?"

²⁶ Manjawablah Isa Almasih, "Urang nan Ambo agiah roti nan lah barandamkan masuak mangkuak, itulah urang nyo." Mako Baliau ambiaklah roti sakarek, Baliau randamkan masuak mangkuak; sudah tu Baliau barikan kabake si Yudas anak Simon Iskariot.

²⁷ Indak lamo sasudah si Yudas manarimo roti tu, ubilih masuak ka dalam atinyo. Mako bakatolah Isa Almasih kabake inyo, "Capeklah karajokan, apo nan nak angkau karajokan."

²⁸ Indak surang juwo doh urang-urang nan bi duduak disinan nan mangarati, baa mangko Baliau bakato bakcando itu kabake si Yudas.

²⁹ Ado nan manyangko, Baliau manyuruah si Yudas mambali sasuatu untuak kaparaluan alek tu, atau mungkin mambari pitih agak saketek, untuak urang nan bansaik -- dek karano si Yudas adolah tukang pacik pitih.

³⁰ Sasudah si Yudas manarimo roti tu, inyo lansuang kaluwa. Ari lah malam.

³¹ Sasudah si Yudas payi, Isa Almasih bakato, "Kiniko Anak Manusia dimuliekan, Allah dimuliekan pulo malalui Inyo.

³² Jikok Allah dimuliekan malalui Inyo, mako Inyo pun, ka dimuliekan dek Allah malalui diri-Nyo sandiri. Malahan Allah ka sacapeknyo mamuliekan Inyo.

³³ Oih anak-anak Ambo, Ambo indak ka lamo lai tingga jo kalian. Kalian ka bi mancari Ambo, tapi, bakcando nan lah Ambo katokan kabake panguwaso-panguwaso urang Yahudi, baitu pulo nan Ambo katokan kabake kalian; kama tampaik Ambo payi, kalian indak ka dapek doh payi kasinan.

³⁴ Ikolah parentah baru nan Ambo parentahkan kabake kalian: Samo-samo mangasiahilah kalian. Samo jo bakcando Ambo mangasiahi kalian, mako kalian musti bakcando itu pulo andaknyo, samo-samo mangasiahi.

³⁵ Jikok kalian layi samo-samo mangasiahi, mako kasadonyo urang ka bi tawu, baraso kalian adolah pangikuik Ambo."

³⁶ Si Simon Petrus batanyo kabake Isa Almasih, "Tuhan, nak ka payi kama Tuhan?" Baliau manjawab, "Kok kiniko, alun ka dapek lai angkau payi ka tampaik nan Ambo tuju. Isuak, barulah angkau manuruik-i Ambo."

³⁷ Si Petrus batanyo sakali lai, "Tuhan, baa mangko ambo indak dapek payi kiniko manuruikkan Tuhan? Ambo rilah mati untuak Tuhan!"

³⁸ Baliau manjawab, "Layi nan sabananyo tu, angkau rilah mati untuak Ambo? Katawuilah, baiko, sabalun ayam bakukuak, angkau lah tigo kali mangatokan, baraso angkau indak bakatawuan doh jo Ambo!"

Yohanes

Video Yohanes 13

Ikuti Kami:

KONTAK | PARTISIPASI | DONASI