Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kai wọu apa asal᷊u patikụ pẹ̌sasilontahẹ̌ dingangu pẹ̌bawawul᷊o sutal᷊oarang kamene? Kai wal᷊inewe wọu kal᷊awọu ěnning i kamene kụ měngkai hanesẹ̌ měsẹ̌sekẹ su watangeng i kamene mědeạu makawatụ kapulun dunia!
2 I kamene mẹ̌měnning, kaiso i kamene tawe nakahombang, hakịu i kamene tawe makahombang apa rẹ̌deakeng i kamene hakịu i kamene měmpẹ̌bẹ̌bul᷊o ringangu měmpẹ̌kẹ̌kakoka. I kamene tawe makahombang apa-apa, watụ u i kamene tawe němpẹ̌gausẹ̌ su Mawu Ruata.
3 Dingangu manimbe lai i kamene sembeng němpẹ̌gausẹ̌ e, kaiso i kamene mambeng ta nakahombang, batụu timonang gaghaus'i kamene e kai nẹ̌sal᷊a; batụu apang gẹ̌gausang i kamene e kai ipạhimatụ ěnning i kamene hala.
4 I kamene e kai taumata tạ satiane! I kamene kai wěga mạeng u i kamene mẹ̌dal᷊ahapị u dunia e, ute i kamene kawe rumokạ Duata? Kụ i saing mẹ̌dalahapị u dunia ini, i sie mapakariading batangenge rokạ u Ruata.
5 Abe pěngumbala u kai tawẹ mangal᷊ene baweram Bukẹ̌ Susi e angkuěng, "Su ral᷊ungu watangeng i kitẹ e Mawu Ruata e napẹ̌tanạu Rohkẹ̌ ěnninge matoghasẹ̌ e."
6 Manilaing kerene, kai tatal᷊ěntụu Mawu e kụ nionggọ si kitẹ e něngalembong katoghase wọu ěnning rohkẹ̌ i kitẹ e. Kai ual᷊ingu ene hakịu su ral᷊ungu Bukẹ̌ Susi e mal᷊aing kạbawohẹ, "Duata e rụdokạ taumata maobotẹ̌, arawe waugu apang masasanạ naunge tangu Ruata e kụkěndag'i sie."
7 Ual᷊ingu ene tangu, pěmpẹ̌těngkasěllungko su Mawu Ruata dingangu rokateko setang e, kụ i sie sarung tumal᷊ang bọu anung kamene.
8 Lẹ̌haungko su Mawu Ruata kụ Duata e mal᷊aing sarung humaung si kamene. Burěsiko l᷊imang kamene e, ei kamene taumata waradosa e! Dingangu pakatilangko ral᷊ungu naung i kamene e, apang naunge mělẹ̌lelang!
9 Pěmpẹ̌sasěsilẹ̌ko kahěnga-hěngang, pěmpẹ̌sangị dingangu lẹ̌lahunsusa; pal᷊ahul᷊ěgeng kamene wal᷊uiko koạ dal᷊umpasiang!
10 Pěmpẹ̌těngkasanạkon batangeng i kamene su těngon Mawu, tangu Mawu sarung mapakarangẹ i kamene.
11 Manga anạ u sěmbaụ, kumbahang měngkai mědẹ̌dal᷊aheghesẹ̌ arau mapẹ̌sal᷊ang sěmbaụ dingangu wal᷊ine. I sain měngkawe mělẹ̌heghesẹ̌ dingangu mapẹ̌sal᷊ang anạ u sěmbaụ e lawọ tau Sahani e, ute i sie mělẹ̌heghesẹ̌ dingangu mapẹ̌sẹ̌sal᷊ang hengetangu Mawu e. Dingangu kereu i kamene mapẹ̌sal᷊ang hengetang u Mawu, mangal᷊ene ute, i kamene tawe tumatuhụ manga hengetang ene, ringangu katewe makoạ mělahukungu hengetange.
12 Sěmbal᷊iau kai kětạeweng sěngkatau piạ kawasane měhukungu taumata ringangu měnggaghuta taumata e. I Sie kai Ruata kawasa mapakasal᷊amatẹ̌ dingangu mapakawinasa. Kụ kai i sai i kamene tangu, hakịu i kamene mapulu mapẹ̌sal᷊ang lawọ sěndinganengu e?
13 Manga anạ u sěmbaụ apang němpẹ̌berang: "Ěllo ini arau rịěllo i kami e sarung mẹ̌buạ sol᷊ong soa ini-ini, kụ deng mẹ̌tanạ sene sěntaung karěngụ e mahumbal᷊ụ, mẹ̌deạewe roitẹ̌" -- kụ pěmpẹ̌daringihẹ̌ko sasasaku ini.
14 Apang kụ mariadi su ral᷊ungu pẹ̌bawiahi kamene riěllo e, i kamene hala e mal᷊aing běga! I kamene e tumbạeng kere tipu ikasilo sěngkarial᷊ẹ̌, bọu ene mapuạ tadịe.
15 Hinone i kamene kai mẹ̌bera kerei, "Kereu Mawu mapakawala i kami e sarung mẹ̌biahẹ̌ kụ mẹ̌koạ ini arau ene."
16 Kai arawe orasẹ̌ ini e i kamene kai maobotẹ̌ dingangu mal᷊ansị. Kěbị bisarang lansị kerene e, kai nẹ̌sal᷊a.
17 Ual᷊ingu ene taumata masingkạ u apang mapia e kụ hinong koatenge kutẹu kawe tawe kakoatenge, tangu tau ene nẹ̌dosa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA