Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ki zebë hwëna Alap mo dam taha nakore zini dan-nër dan-nërkam hlauludak. Ahana okama yakla hata sezan topnak zauꞌunka, hen ahana yakla nikin anen topnak zauꞌunka. Aha darena hen eihya-lip eihya-lip top-top san yaun daka. Zëno mae mo syala, zen asese de zëno mae mo ïrïk gïn nïkon taïn srëm hap– sap eik sin, hi san, ahaksa te-te syan.
2 Hen Alap mes dekam zëbe mae hap sosonna golzimki– dekam de kama naban hi naban karek son hap dena. Hwëna ki zebë Alap mo dam taha nakore zini ahana hla tak– yakla hatase gwezan nakon kim hatase zaka. Zen Ngaya Zini Alap onakore capsa golhatase zaka. Ki zep ol mamkam takenbirida zaka– dan-nër dan-nërkam de wenya insa,
3 “Na-en bahem kama naban hi naban timbwas son, hen tenya. Anik nonol Alapsa de betek gweblan zisi mirenak capkam al tasibik. Zen mana hen ëtimbwas gwenank.”
4 Dekam zep asa nenblak, “Zini 144 ribu enkam sa mirenak al dasibir– Alap mo capkamye. Zen kïtak dua-blas enkam de Israel mo auyan-aza nakorena.
5 Aha-ere auyan-aza nakore zini, 12-ribu 12-ribu enkam sa capkam al dasibir. Israel mo auyan-aza mo bosem-sena, a zëno mae mo ausu nakore naka moye: Yehuda, Ruben, Gat, Asyer, Naftali, Manasye, Simeon, Lewi, Isakar, Zebulon, Yusup, hen Benyamin.”
6 (7:5)
7 (7:5)
8 (7:5)
9 Hyanak ki zebë etan kara gwek. Ëe sërkam de zi tra beyam-byasaë hlauludak. Aha-erenak tagal gwesïk. Zëno mae mo beyana aïtbinkim toton nara dep?– sul sonenna. Zen Alap ne Domba Tane nik mo dang nakon pakean ngap-ngap alala tan naban ëzauꞌuk, hen tahakam kawang ala maum hasesa isrip-sri hap deirensïꞌïk. Zen tïngare ïrïk gïn nïkorena, tïngare zi ausu nakorena, tïngare sop zi ausu nakorena, hen tïngare ol ton gwibin zi ausu nakorena.
10 Zen man ol mam-mamkam anakan ëtaken gweꞌak, “Nëre mae mo Bian Alap Zen teipsïn tangannak nikinꞌira. Nëno mae mo ëngaya gwenna an, zen Zëbon en onakon hen Domba Tanena in onakon.”
11 Tïngare Alap mo dam taha nakore zini zen ëzaunkum man Alap mo komal tumna insa dot nososuk. 24kam de teipsïn-teipsïnnï in hen dan-nër dan-nërkam de otweran nwe-mase makare zini in hen zëno mae mo ngïrïnnïk lowe heꞌak. Zen dekam zep kïtak nol ïk gïn nïban boklena kom dak, hen anakan Alapsa boltere daꞌak,
12 “In eiwa! Dikire Alap en hon kïtak lwa gwek– dawemna, ngatanna, enlala blala, hëꞌho gwibinni, bose dawemna, hen tïngare sosonna, hëndep denaban. In eiwa tangan.”
13 Ki zep 24kam de teipsïn-teipsïn wenya in kon ahanik asa takensïblïka, “Pakean ngap-ngap alala tan wenya an, banakare wenya? Hen enda kon yaïng gwezak?”
14 Ki zebë ding gulbluk, “Bian, ëe tawa naka hom. Diki tawana em.” Ki zep hwëna asa ding gulbluka, “Zen an men zen sërkam de karekna insa nyaubikke– in kim Yesus hup de jal hap zini karek da gwibikke. Zen mes zëre mae mo pakeanna ngan dasibik– Domba Tanena in mo kalkam. Zen dekam zep zëno mae mo pakeanna ëngap-ngap gwek.
15 Zen in zep Alap mo komal tum alp nakon lowehe gwenan, hen Zëno bosena mam nul tine gwenan– yaklam denaban kam denaban. Desa Zën sa golëlowehe gwera, zep zen karekna molya etan noltowek.
16 Zen dekam molya etan usak naban ho-hole naban neiszimk. Yakla sal-sala hen molya etan nësblak.
17 Sap Domba Tanena in Zen Alap mo alp nakon gwëꞌara, Zen Zen sa domba zaho ta gwibin zi makan zaho ta gwibiri. Zen Zen sa zëbe mae hap hëndep de ëngaya gwen hap de aïlï hona zertreizimdi. Hen Alap sa zëno mae mo nwe go-hona ngan tasibir-zimdi.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA