¹ Ki zebe hwena Alap mo dam taha nakore zini dan-ner dan-nerkam hlauludak. Ahana okama yakla hata sezan topnak zauꞌunka, hen ahana yakla nikin anen topnak zauꞌunka. Aha darena hen eihya-lip eihya-lip top-top san yaun daka. Zeno mae mo syala, zen asese de zeno mae mo irik gin nikon tain srem hap– sap eik sin, hi san, ahaksa te-te syan.
² Hen Alap mes dekam zebe mae hap sosonna golzimki– dekam de kama naban hi naban karek son hap dena. Hwena ki zebe Alap mo dam taha nakore zini ahana hla tak– yakla hatase gwezan nakon kim hatase zaka. Zen Ngaya Zini Alap onakore capsa golhatase zaka. Ki zep ol mamkam takenbirida zaka– dan-ner dan-nerkam de wenya insa,
³ “Na-en bahem kama naban hi naban timbwas son, hen tenya. Anik nonol Alapsa de betek gweblan zisi mirenak capkam al tasibik. Zen mana hen etimbwas gwenank.”
⁴ Dekam zep asa nenblak, “Zini 144 ribu enkam sa mirenak al dasibir– Alap mo capkamye. Zen kitak dua-blas enkam de Israel mo auyan-aza nakorena.
⁵ Aha-ere auyan-aza nakore zini, 12-ribu 12-ribu enkam sa capkam al dasibir. Israel mo auyan-aza mo bosem-sena, a zeno mae mo ausu nakore naka moye: Yehuda, Ruben, Gat, Asyer, Naftali, Manasye, Simeon, Lewi, Isakar, Zebulon, Yusup, hen Benyamin.”
⁶ (7:5)
⁷ (7:5)
⁸ (7:5)
⁹ Hyanak ki zebe etan kara gwek. Ëe serkam de zi tra beyam-byasae hlauludak. Aha-erenak tagal gwesik. Zeno mae mo beyana aitbinkim toton nara dep? – sul sonenna. Zen Alap ne Domba Tane nik mo dang nakon pakean ngap-ngap alala tan naban ezauꞌuk, hen tahakam kawang ala maum hasesa isrip-sri hap deirensiꞌik. Zen tingare irik gin nikorena, tingare zi ausu nakorena, tingare sop zi ausu nakorena, hen tingare ol ton gwibin zi ausu nakorena.
¹⁰ Zen man ol mam-mamkam anakan etaken gweꞌak, “Nere mae mo Bian Alap Zen teipsin tangannak nikinꞌira. Neno mae mo engaya gwenna an, zen Zebon en onakon hen Domba Tanena in onakon.”
¹¹ Tingare Alap mo dam taha nakore zini zen ezaunkum man Alap mo komal tumna insa dot nososuk. 24kam de teipsin-teipsinni in hen dan-ner dan-nerkam de otweran nwe-mase makare zini in hen zeno mae mo ngirinnik lowe heꞌak. Zen dekam zep kitak nol ik gin niban boklena kom dak, hen anakan Alapsa boltere daꞌak,
¹² “In eiwa! Dikire Alap en hon kitak lwa gwek– dawemna, ngatanna, enlala blala, heꞌho gwibinni, bose dawemna, hen tingare sosonna, hendep denaban. In eiwa tangan.”
¹³ Ki zep 24kam de teipsin-teipsin wenya in kon ahanik asa takensiblika, “Pakean ngap-ngap alala tan wenya an, banakare wenya? Hen enda kon yaing gwezak?”
¹⁴ Ki zebe ding gulbluk, “Bian, ee tawa naka hom. Diki tawana em.” Ki zep hwena asa ding gulbluka, “Zen an men zen serkam de karekna insa nyaubikke– in kim Yesus hup de jal hap zini karek da gwibikke. Zen mes zere mae mo pakeanna ngan dasibik– Domba Tanena in mo kalkam. Zen dekam zep zeno mae mo pakeanna engap-ngap gwek.
¹⁵ Zen in zep Alap mo komal tum alp nakon lowehe gwenan, hen Zeno bosena mam nul tine gwenan– yaklam denaban kam denaban. Desa Zen sa golelowehe gwera, zep zen karekna molya etan noltowek.
¹⁶ Zen dekam molya etan usak naban ho-hole naban neiszimk. Yakla sal-sala hen molya etan nesblak.
¹⁷ Sap Domba Tanena in Zen Alap mo alp nakon gweꞌara, Zen Zen sa domba zaho ta gwibin zi makan zaho ta gwibiri. Zen Zen sa zebe mae hap hendep de engaya gwen hap de aili hona zertreizimdi. Hen Alap sa zeno mae mo nwe go-hona ngan tasibir-zimdi.”