Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pangeh ineh ui nenier apat melaikat luk tuped bang apat lidung tana', luk ngimet apat bui, pad bui na miak ngiup luun tana', abpa' rayeh, idi aceh lawa kayuh pana'.
2 Idi ui nenier teh inan seburur melaikat luk numak rat pa busat aco, dengan etu Allah luk mulun ineh. Ieh nengitang kuan apat melaikat luk inan Allah nemaré lalud ngusag tana' idi abpa' rayeh.
3 Kebala melaikat ineh, "Aleg ngusag tana', abpa' rayeh, idi aceh lawa kayuh pana', pad kai ngetu nan madu' demulun-demulun Allah tau."
4 Idi ui pangeh bida' ratnan kinula' lemulun luk pangeh itu Allah, ieh ineh 144,000, luk pangeh itu ratnan amung-amung inul lun Israil.
5 Ratnan inul Yahuda pangeh itu 12,000; ratnan inul Rubin 12,000; ratnan inul Gad 12,000;
6 ratnan inul Asir 12,000; ratnan inul Naptali 12,000; ratnan inul Manasé 12,000;
7 ratnan inul Simon 12,000; ratnan inul Liwi 12,000; ratnan inul Iskar 12,000;
8 ratnan inul Sebulon 12,000; ratnan inul Yusup 12,000; ratnan inul Beniamin 12.000.
9 Pangeh ineh ui nenier aceh tebubpun luk rayeh, luk na miak iapin seburur lemulun pana'. Ideh ineh ratnan anid-anid pupu, babpat, inul, idi buri. Ideh tuped pa atun kerusi idi pa atun Anak Dumba ineh, idi ideh nengayung ku ayung luk mebuda', idi nengimet angat piasau bang paladdeh.
10 Ideh nengitang, kebaladeh, "Ulun tau ini ratnan Tuhan tau luk tudo luun kerusi raca' ineh, idi ratnan Anak Dumba teh!"
11 Amung-amung melaikat ineh pana' netuped libut-libut kerusi, lun rayeh, idi apat pudut luk mulun ineh teh, idi ideh netekeradung pa atun kerusi ineh idi sembayang inan Allah,
12 kebaladeh, "Amin! Maré ubur, rayeh, ileh, ubur, dita', lalud, idi tueh kuan Tuhan kai, macing ruked-ruked peh! Amin!"
13 Idi kebala seburur rat arang lun rayeh-rayeh ineh negku, "Idéké lemulun luk inayung ku kuyu' mebuda' ineh, idi rat iapehké ideh?"
14 Idi keburi'ku neneh, "Na kali'ku. Iko luk kali' ratnan ineh." Idi kebalaneh negku, "Ini lemulun luk neremuat ratnan susa' luk rayeh ineh. Ideh pangeh nemupu' kuyu'deh idi nengebuda' nedeh ku dara' Anak Dumba ineh.
15 Ineh punneh ideh idi pa atun kerusi Allah, idi ngakem kuanNeh tebaco kedangan bang ruma'Neh. Ieh luk tudo luun kerusi ineh miak malad lepo kibungNeh pad ngelungung nedeh.
16 Na ideh miak melau idi meparing teh, idi na ideh ketukan lau' mateh aco idi anun-anun luk melau' pana'.
17 Ngaceku Anak Dumba luk luun uned kerusi ineh miak mangun ku Lun Matar nedeh, idi nguit nedeh amé' inan bued abpa' luk mulun. Idi Allah pana' miak miid amung-amung abpa' mateh ratnan matehdeh ineh."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA