Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nata usiꞌik afa liak isa vali. Lanit ivavan ini ni susun ifaꞌat, na Ubu Ni sansinir ifaꞌat tali lanit ratan rdiri lanit ivavan ini ni susun ifaꞌat yai. Ira rtaha teri nait matan ifaꞌat naꞌa lanit ivavan ini, boma nait deka nean naꞌa raa te roal, ovu vali deka nean aa ra.
2 Usiꞌik vali Ubu Ni sansinir liak isa nvotuk tali lihir timur. Ia ntaha cap ntali Ubu i nvaꞌat nata ti wol ni wahan, ma notu faneak naꞌa Ubu Ni tamata ra. Sansinir yai nafwak ma vain dawan ilaꞌa verin sansinir ifaꞌat i Ubu nala karya verin ira yai, ma rot-visal lanit ivavan ini.
3 Sansinir yai nfalak ne, “Deka myot-visal afa ovi rnaꞌa roal te afa ovi rnaꞌa raa, te aa ra, wean i wol amotu Ubu Ni faneak ovu cap yai obin naꞌa Ni tamata ovi rkarya verin Ia rearira ra.”
4 Tamata isa nfalak verin yaꞌa ne, tamata sansinir ovi rtali lanit ratan rotu roak faneak naꞌa rearira ra, munuk lahir tamata rivun ratut isa rivun vutfaꞌat rahin ifaꞌat (144.000). Tamata avyai rtali arun dawan vutu rahin irua naꞌa Israel.
5 Tali arun dawan avyai munuk, na rotu faneak roak naꞌa tamata rivun avyai rearira ra. Lokat arun, ni tamata rivun vutu rahin irua. Arun avyai nararira: Yehuda, Ruben, Gad, Asyer, Naftali, Manasye, Simeon, Lewi, Isakhar, Zebulon, Yusuf ovu Benyamin.
6 (7:5)
7 (7:5)
8 (7:5)
9 Usiꞌik munuk wean inyai, na urea vali ne, tamata rivun ilaꞌa rasdovu ira ma wol trekan nala. Ira rtali negara ovi rnaꞌa lanit ivavan munuk, ovu rtali arun dawan ra munuk, bangsa ra munuk ovu vai ra munuk naꞌa lanit ivavan a. Ira rdiri wan i Ubu ndoku ma nfareta ngoran a, ovu Domba Yanan wahan ralan a. Ira roru ravit blawat ngangiar, ovu lokat ira rtaha aa palem naꞌa limarira ra al rfadawang Ia.
10 Ira rafwak ma vairira dawan ilaꞌa ne, “Amraning Ubu, tevek notu lingaꞌan ma nsikat ami tali mami salasilan ra, ma mami vavaꞌat kakiwal. Amraning mami Ubu i ndoku Ubu wan i nfareta! Amraning Domba Yanan a!”
11 Sansinir ra munuk rdir-lilit wan i Ubu ndoku ma nfareta ovu fareta dawan vutrua rahin ifaꞌat avyai, ovu afa ifaꞌat ovi rvaꞌat ma raling ma lolan watan ira yai. Ira rsangatur ma raraning Ubu naꞌa wan i ndoku ma nfareta ngoran a, ovu rfadawang Ia.
12 Ira rfalak verin Ia ne, “Kena urun! Ubu saꞌi dawan Ia. Tfadawang aꞌuk Ia, tevek Ni dawan a nlia munuk. Traning Ia, tevek Ni kakaꞌa dawan, Ni ngrebat a, ovu Ni fareta a. Tfalak ne, ‘Fara weninyai ta Ubu.’ Tfakaratat Ia ovu talang aꞌuk Ia. Kena urun.”
13 Tamata isa ntali fareta dawan avyai norat yaꞌa ne, “Tamata ovi roru ravit blawat ngangiar avyai tamata aba, ovu rtali inba rma?”
14 Ba ufalak verin ia ne, “Yaꞌa wol ukaꞌa, oa saꞌi mkaꞌa.” Nata ia nfalak verin yaꞌa ne, “Tamata avyai rbana lia roak amar ovi Ubu nfadoku a ovu malinan watan. Amar avyai rira sian a dawan urun. Ira rtofi roak rira ravit blawat ra naꞌa Domba Yanan laran a ma rangiar.
15 Wean inyai bi rdiri Ubu wan i ndoku ma nfareta ngoran a, ma rfadawang Ia ovan-amar naꞌa Ubu Ni Rahan Dawan falurut a. Ubu i ndoku fareta wan yai veka nwanar ira.
16 Ira veka wol rfarnuang balafar ovu baroa roak, ovu lera ngnea veka wol nkena roak ira.
17 Ba Domba Yanan i naꞌa wan i Ubu ndoku ma nfareta fruan a, veka novun ira ma nwanar ira. Ia veka nfabana ira ma rti wear ulun i nala vavaꞌat. Ia veka naꞌi vatuk munuk lurira ra tali matarira ra.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA