Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Limbah te, aku mite epat biti malekat mendeng intu epat puting petak. Ewen manahan kaepat riwut hong kalunen mangat jaton riwut je manampur hunjun petak atawa intu tasik, atawa intu kare batang kayu.
2 Palus aku mite ije biti malekat je beken lembut bara hila timor. Ie mimbit segel ain Hatalla je belom. Hapan auh je hai malekat te matehau kaepat malekat je jari mandino kuasa bara Hatalla uka marusak petak tuntang tasik.
3 Malekat te hamauh, "Ela helo marusak petak atawa tasik, atawa kare batang kayu amon ikei hindai mangkepan tanda segel intu lingkau kare rewar Hatallan itah."
4 Palus insanan akangku aton 144.000 biti oloh je inanda hapan segel ain Hatalla intu lingkau ewen. Kare oloh te induan bara duewalas bangsa Israel;
5 bara genep bangsa 12.000 biti. Iete bara bangsa: Yuda, Ruben, Gad,
6 Aser, Naptali, Manase,
7 Simeon, Lewi, Isaskar,
8 Sebulon, Yosep, tuntang Benyamin.
9 Limbah te aku mite tinai, palus taragitan kawan oloh kalunen je dia taraise karee -- ije biti mahin jaton oloh tau mise karee. Ewen te iete kare oloh bara genep bangsa, suku, negara, tuntang bahasa. Sambil mangkepan jubah je uras baputi tuntang sambil mimbing kare palapah korma, kare oloh are te mendeng manaharep padadusan tuntang manaharep Anak Tabiri te.
10 Palus hapan hai auh ewen mantehau, "Eka salamat itah te dumah bara Hatallan itah, je mondok hunjun padadusan tuntang bara Anak Tabiri te!"
11 Kakare malekat mendeng mangaliling padadusan te tuntang kare pamimpin dengan epat taloh belom te. Kare malekat te mahingkep intu taharep padadusan palus manyembah Hatalla.
12 Ewen hamauh hai auhe, "Amen! Tara akan Hatallan itah je hai tuntang eka kapintar-kaharati. Kare auh tara, tarimakasih tuntang hormat patut inawon akae. Ie kuasa tuntang abas palus katatahie! Amen."
13 Ije biti bara kare pamimpin te misek dengangku, "Eweh kare oloh je mahapan jubah baputi te, tuntang bara kueh ewen te dumah?"
14 "Aku dia katawan, Tuan. Tuan kabuat je katawan," koangku tombah. Maka ie hamauh dengangku, "Jetoh ie kare oloh je jari salamat limbah mahalau wayah kapehe je paham. Ewen jari menyau jubah ewen tuntang mawie manjadi baputi hapan dahan Anak Tabiri te.
15 Jete sababe ewen mendeng manaharep padadusan Hatalla, tuntang manyembah Ie handau hamalem intu huang Human Hatalla. Tuntang Ie je mondok hunjun padadusan te kareh melai hinje ewen mangat manganjungen ewen.
16 Ewen dia akan mangkeme balau, atawa teah belai tinai; matanandau atawa pandang andau dia hindai mampalupak ewen,
17 awi Anak Tabiri je mondok intu bentok padadusan te kareh manjadi sakatik ewen. Ie kareh magah ewen akan tahasak danum je manenga pambelom. Tuntang Hatalla kareh mampuas kakare danum matan ewen."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA