Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Tipaq malaẽkat jemaah lẽq Epesus, tulis maraq niki: Niki manik lẽman Ie saq negel pituq bintang lẽq gading-Ne saq kanan, dait bemargi lẽq antare kepituq naẽ dilah emas nike.

² Tiang nenaoq selapuq pegawẽande, selapuq usahende, dait kesabarande. Tiang nenaoq bahwe side pade ndẽq tao sabar tipaq dengan jahat, dait bahwe side pade sampun nguji dengan-dengan saq ngaku diriqne rasul padahal setetune ndẽq, dait side pade mauq bukti bahwe ie pade penduste.

³ Side pade sabar dait side pade menderite lantaran aran Tiang, dait side pade ndẽq putus ase.

⁴ Laguq niki keberatan Tiang tipaq side pade: Side pade ndẽq ngasihin Tiang maraq kasih side pade saq semule.

⁵ Keranaq nike pade inget berembẽ dalemne side pade sampun geriq! Pade tobat lẽman dose-dosende, dait laksaneang napi saq semule side pade laksaneang. Lamun ndẽq, make Tiang gen dateng tipaq side dait bait naẽ dilahde nike lẽman taoqne.

⁶ Laguq araq saq solah lẽq side: Side pade meriq lẽq perbuatan pengiring-pengiring Nikolaus, saq Tiang meriq ẽndah.

⁷ Sai bedowẽ kentok, harus ie dengahang napi saq temanikang siq Roh Allah tipaq jemaah-jemaah! Sai-sai saq menang, gen Tiang bẽng kelorang buaq lẽman lolo kehidupan saq tiwoq lẽq Taman Pirdaus Allah."

⁸ "Tipaq malaẽkat jemaah lẽq Smirna tulis maraq niki: Niki manik lẽman Ie saq penembẽq dait saq penutuq -- saq sampun ninggal dait idup malik.

⁹ Tiang nenaoq kesusahan-kesusahan side pade; Tiang nenaoq keadaan side pade saq miskin -- laguq setetune side pade sugih! Tiang nenaoq pitnah-pitnah saq tetujuang tipaq side pade siq dengan-dengan saq ngaku diriqne Yahudi, padahal ndẽq; ie pade jemaah Belis!

¹⁰ Ndaq takut lẽq penderitean saq ndẽq pire ngonẽq malik side gen alamin. Inget, Belis gen namaqang separo lẽman side pade ojok dalem bui jari cobe side pade. Side pade gen menderite sepulu jelo ngonẽqne. Side pade harus setie lẽq Tiang jangke ninggal, make Tiang gen ngicanin side mahkote kehidupan.

¹¹ Sai-sai saq iniq dedengah, harus perhatiang napi saq temanikang siq Roh Allah tipaq jemaah-jemaah! Sai-sai saq menang, ndẽq gen menderite napi-napi lantaran kematẽan saq kedue."

¹² "Tipaq malaẽkat jemaah lẽq Pergamus, tulis maraq niki: Niki manik lẽman Ie saq negel klẽwang bemangan due saq merang gati.

¹³ Tiang nenaoq lẽq mbẽ side ndot, nike lẽq taoqne Belis betahte. Side pade setie lẽq Tiang, malahan sewaktu Antipas, saksi Tiang saq setie nike, tematẽq lẽq julunde lẽq taoq Belis ndot, side pade ndẽq nilas bahwe side percaye lẽq Tiang.

¹⁴ Laguq timaq maraq nike, araq pire hal saq Tiang ndẽq suke lẽman side pade: Araq separo dengan lẽq antare side pade saq turut napi saq teajahang siq Bileam, saq ngebẽng nasẽhat tipaq Balak jari nyesatang dengan Israel ojok dalem dose, sehingge ie pade ngelorang keloran saq sampun teaturang tipaq berhale dait gawẽq perbuatan saq cabul.

¹⁵ Maraq nike ẽndah araq lẽq antare side pade dengan-dengan saq percaye lẽq pengajahan pare pengiring Nikolaus.

¹⁶ Keranaq nike, side pade harus tobat lẽman dose-dosende! Lamun ndẽq, karing semendaq Tiang gen dateng tipaq side pade dait perang kance dengan-dengan nike kadu klẽwang saq araq lẽq biwih Tiang.

¹⁷ Sai bedowẽ kentok, harus ie dengahang napi saq temanikang siq Roh Allah tipaq jemaah-jemaah! Sai-sai saq menang, gen Tiang bẽng kelorang manna saq teseboq, dait Tiang gen bẽng ie pade batu putẽq. Lẽq batu nike tetulis sopoq aran saq baru, saq ndẽq tetaoq siq sai-sai, selain siq dengan saq nerimaq batu putẽq nike."

¹⁸ "Tipaq malaẽkat jemaah lẽq Tiatira, tulis maraq niki: Niki manik lẽman Bije saq asalne lẽman Allah, saq penyermin-Ne nyale maraq api, dait cokor-Ne maraq rue tembage tetunuq.

¹⁹ Tiang nenaoq selapuq saq side pade laksaneang, kasihde, imande, pengabdiande, dait kesabarande. Tiang nenaoq bahwe mangkin side pade begawẽan luwẽqan lẽman saq laẽq.

²⁰ Laguq Tiang wade side, lantaran side pade ngalurang Izebel, dengan nine saq ngaku diriqne utusan Allah nike. Sampun luwẽq hambe-hambe Tiang saq tesesatang siq ie adẽq gawẽq perbuatan saq cabul dait ngelorang keloran saq sampun teaturang tipaq berhale.

²¹ Sampun Tiang bẽng ie kesempatan adẽq tobat lẽman dose-dosene, laguq ie ndẽq mẽlẽ engkah gawẽq perbuatan-perbuatan saq cabul nike.

²² Pade inget! Tiang gen nimpak ie jangke sakit lẽq petindoqanne. Lẽq derike ie dait dengan-dengan saq bezinah kance ie gen menderite gati. Selapuqne nike mangkin gen Tiang laksaneang -- kecuali lamun ie pade engkah gawẽq hal-hal saq jahat bareng-bareng kance ie.

²³ Pare pengiringne gen Tiang matẽq ẽndah adẽq selapuq jemaah sadar bahwe Tiang saq nguji pikiran dait atẽ manusie. Tiang gen bales side pade menurut perbuatande sopoq-sopoq.

²⁴ Laguq side pade saq lainne lẽq Tiatira ndẽq turut pengajahan saq jahat nike, dait ndẽq berajah ilmu-ilmu Belis. Tiang bemanik bahwe Tiang ndẽq gen ngeromboqang bandean saq lain lẽq side pade.

²⁵ Laguq jangke waktu Tiang dateng ẽraq, side pade harus tetep tegel napi saq sampun side pade ẽpẽang.

²⁶ Ie pade saq menang, dait saq jangke penutuq tetep ngelaksaneang napi saq Tiang mẽlẽang, gen Tiang bẽng kuase saq pade maraq saq Tiang terimaq lẽman Bapa Tiang. Ie pade gen nerimaq kuase lẽman Tiang jari mrẽntah bangse-bangse siq tunjang besi, dait jari ngancurang bangse-bangse nike maraq dengan ngancurang kemẽq tanaq.

²⁷ (2:26)

²⁸ Ie pade gen nerimaq bintang timuq lẽman Tiang.

²⁹ Sai bedowẽ kentok, harus ie dengahang napi saq temanikang siq Roh Allah tipaq jemaah-jemaah!"

Wahyu

Video Wahyu 2

Ikuti Kami:

KONTAK | PARTISIPASI | DONASI