Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Baugu malạekat'u jamaatẹ̌ su Efesus kere ini: Ini e kai tatanatan Sie mạngumbelẹ bituing pitu su l᷊iman'E koaneng'E, kụ dụdal᷊eng sutal᷊oarang dal᷊aedu sol᷊o wul᷊aeng pitumbaụ e.

² Iạ e masingkạ u apang kẹ̌koateng i kamene: I kamene měmpělẹ̌hal᷊ẹ̌ masěgadẹ̌, dingangu i kamene e makakědang tạ sihinge. Iạ masingkạ u i kamene tawe mapulu mẹ̌gagholọ u ral᷊ungu naung i kamene su taumata ral᷊akisẹ̌. Kutẹu taumata apang něngakung batangenge kawe rarolohang, kutẹu nạung bal᷊ine wue, kụ seng niwanikateng i kamene, ringangu kinaẹ̌bakeng i kamene u i sire kai tahakontiang.

³ I kamene marararagẹ̌ dingangu i kamene nasigěsạ ual᷊ingu Iạ, kai naung i kamene e tawe něngkapěndụ.

⁴ Kai ini e sěngkul᷊ẹ̌-Ku si kamene: I kamene kai seng tawe kiměndag'u Iạ kere nạung su tětạ e.

⁵ Ual᷊ingu ene pẹ̌tahěndungko, kai seng apa karal᷊ung kananawong kamene! Pěmpẹ̌tobate bọu kal᷊awọu rosang kamene ringangu pěmpẹ̌koạ e apang kẹ̌koateng i kamene kạngerẹ e. Mạeng tala ute, Iạ e sarung duměnta kụ manawụ dal᷊aedu sol᷊ong kamene e wọu tampạ e.

⁶ Kai tangu piạ bue hal᷊ẹ̌ mapia wọu i kamene, u: I kamene měbẹ̌binsị u kakakoạ u manga tumatol᷊e si Nikolaus, kụ mal᷊ain Takụ ipẹ̌bẹ̌binsị e.

⁷ I sain makạdingihẹ̌ e, daringihẹ̌ko apan nipěhengetangu Rohkẹ̌ u Ruata e suapan jamaatẹ̌! I sain nakawatạ, Takụ iapakawala měmpẹ̌kaěng buang kalum pẹ̌bawiahẹ̌ kụ su ral᷊ungu wawaelangu Ruata."

⁸ "Baugu malạekat'u jamaatẹ̌ su Smirna, bohẹko kere ini: Ini e kai tatanata wọ'i Sie kụ panẹ̌takenge ringangu pangěnsueěnge -- bọu nate kụ nẹ̌biahẹ̌ kapia.

⁹ Iạ e masingkạu kasasigěsạ i kamene; Iạ e masingkạu kakakasiang i kamene kai tuhụ hinone i kamene kai kalạ! Iạ masingkạu haghin lahodatẹ̌ ipělẹ̌hodatẹ̌ si kamene kahiạen sire apan mạngakung batangenge tau Yahudi e, kutẹu nạung bal᷊ine wue; i sire e kai kawanuang setang!

¹⁰ Abe kěngkatakụ u sigěsạ kụ kate kadodọ tempo sarung tal᷊urang i kamene. Pẹ̌tahěndung, u setange, sarung mapasuẹ̌ u sěnggạ bọu i kamene sol᷊ong dal᷊ungu tahungkụ ipěnal᷊ukạ si kamene. I kamene sarung mẹ̌tatahangu sigěsạ su ral᷊ungu mapul᷊o ěllo karěngụe. Karimạko i kamene mẹ̌těngkasatia si Siạ sarang papate, mědeạu i kamene Takụ gělirangu pẹ̌bawiahẹ̌ tutune ringangu kakalẹ̌ mẹ̌sul᷊ungu laẹ̌kingu nakauntung.

¹¹ I sain makạdingihẹ̌ e pěmpěnaungko apang kụ ilẹ̌hengetang u Rohkẹ̌ u Ruata e su apang jamaatẹ̌! I sain nakawatạ, mambeng tawe sarung mẹ̌tatahangu sigěsạ sarang kạdodọ ual᷊ingu kapapohong karuan sul᷊ene."

¹² "Baugu malạekat'u jamaatẹ̌ su Pergamus e, bohẹko kere ini: Kai ini tatanata wọ'i Sie kụ mạngumpaedẹ̌ barạ mahoro kụ horone su ruam běka.

¹³ Iạ masingkạ u su apa katatanakeng i kamene, kụ nạung kai su tampạ u kararatuangu setang. I kamene e masatia si Siạ. Ore lai piạ i Antipas, sahidiku satia e, nipate su těngong kamene, su wal᷊oarị u setang, kụ su tempo ene i kamene mamben tawe nẹ̌sunial᷊u i kamene kawe mạngimang si Siạ e.

¹⁴ Kai maningbe seng kerene mang piạ hal᷊ẹ̌ pirambaụ kụ tawe Takụ iral᷊uasẹ̌ bọu i kamene: Piạ pirang katau wọu tal᷊oarang kamene kụ tụtol᷊e apang itẹ̌těntiron Bileam. I Bileam mạněntiro si Balak dal᷊engu mapakanawon tau Israel su ral᷊ungu rosa; kụ mạngologẹ̌ si sire apạkaěng kaěng seng bọu nisěmba su mahang duata ringangu měkẹ̌koạ manga hal᷊ẹ̌ u kawawuang.

¹⁵ Kerene lai piạ bọu tal᷊oarang kamene taumata kụ mạngumpaedẹ̌ su těntiron manga tumatol᷊e si Nikolaus.

¹⁶ Ual᷊ingu ene, pěmpẹ̌tobatẹ̌ bue wọu kal᷊awọu rosang kamene! Mạeng tala, ute tamararěnna Iạ e sarung duměnta su anung kamene kụ měnekẹ si sire ringangu peda su mohong-Ku.

¹⁷ I saim makạdingihẹ̌ e pěmpěnaungko apang nipěhengetangu Rohkẹ̌ u Ruata e su apan jamaatẹ̌! I saim makawatạ sarungbe Takụ iapakawala pakaěng manna kụ mạbawuni, ringangu sěngkatau-sěngkatau e sarung makatarimạ u watu mawira pẹ̌sěmbaụ e wọu Iạ. Su watu ene kạbawohẹ areng buhu, kụ tawe kasingkateng i sai-sai su l᷊ikudu i sain nakatarimạ e."

¹⁸ "Baugu malạekat'u jamaatẹ̌ su Tiatira e, bohẹko kere ini: Kai ini e tatanata wọu Ahusu Ruata, kụ matan'E rụděllị kere putung, dingangu l᷊aed'E l᷊ụhentẹ kere tambaga nitongkạ.

¹⁹ Iạ e masingkạ u kěbị apang nịkakoạ i kamene -- Iạ e masingkạ u i kamene kụkěndagu kasanggidangu, i kamene satia, i kamene měmẹ̌munara, dingangu i kamene makakědang su sigěsạ e. Iạ e masingkạ i kamene orasẹ̌ ini e němunara limembong kasaghede wọu kangerẹ.

²⁰ Kaiso kai ini e wěhạ u naung-Ku si kamene: I kamene seng kinaologang i Izebel, tau wawine kụ něngakung batangenge rarolohangu Ruata e. Seng mal᷊awọ manga rarolohang-Ku e lẹ̌akal᷊enge ringangu nitěntiroěngu kawawuang dingangu apạkaěng kaěng seng bọu nisěmba su mahang duata.

²¹ Seng Takụ nionggotangu l᷊oahe si sie apẹ̌tẹ̌tobatẹ̌ bọu manga rosane, kaiso i sie tawe mapulu mangědo mawuang e.

²² Pẹ̌tahěndung! Iạ e sarung maměpạ i sie sarang masakị su ral᷊okaěnge. Sene i sie ringangu apang nawuang dingange e sarung mẹ̌tatahangu sigěsạ marasai. Kěbị ene e sarung Takụ koateng su orasẹ̌ ini -- tabeạu katewe i sire měngědo měmpẹ̌koạ hal᷊ẹ̌ dal᷊akị dingange.

²³ Manga tumatol᷊ene e sarung lai Takụ pateěng tadeạu kěbị dal᷊ohon jamaatẹ̌ e makahěngang u kai Iạ e makạkasěsui tiněnna ringangu ral᷊ungu naungu taumata. I kamene sarun Takụ bal᷊isang tuhụ kakanoạ i kamene sěngkatau-sěngkatau.

²⁴ Arawe i kamene wal᷊ine su Tiatira e tawe timol᷊e těntiro ral᷊akị ene, ringangu tawe němpangěndung manga kasingkạ u setang. Iạ mẹ̌bera u Iạ tawe sarung měnambang bawawaěng kụ limembong kawěhạ e si kamene.

²⁵ Kai arawe sarang darěnta-Ku e sarung, i kamene harusẹ̌be tatapẹ̌ pěmpẹ̌tol᷊e apang kụ seng těbe tẹ̌taghuaneng i kamene.

²⁶ I sire apan nakawatạ, dingangu sarang pangěnsueěnge tatapẹ̌ měkẹ̌koạ apang kụ Takụ ikẹ̌kapulu e, sarun Takụ gělikangu kawasa kụ mẹ̌sul᷊ungu Takụ tẹ̌tarimakeng bọu i Amang-Ku. I sire sarung makatarimạ u kawasa wọu anu-Ku mẹ̌parenta haghim bansa ringangu těking uase, ringangu waugu ipěnggolọ patikụ bansa e kere kuring ěntana.

²⁷ (2:26)

²⁸ I sire sarung makatarimạ u wituing Ahusu ěllo e wọu Iạ e.

²⁹ I saim makạdingihẹ̌ e, pěmpěnaungko apang nipěhengetangu Rohkẹ̌ u Ruata e suapang jamaatẹ̌!"

Wahyu

Video Wahyu 2

Ikuti Kami:

KONTAK | PARTISIPASI | DONASI