Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bo Ana nu Manusia nombatudu yaku motulisi ka *malaeka anu nanggeniaka todea topomparasaya ri ngata Efesus ivei: "Hitumo tesa lako nte Yaku anu nantipale pitu-angu betue ri pale ngganaKu bo nolipa ri olo pitu-nggada poindo bulava.
2 NisaniKu pura-pura pokainggumiu. Komiu natutu nokarajaa ka Yaku bo komiu nosabara tempo nipandasa sabana nomparasaya Yaku. NisaniKumo komiu ledo nasituju ante pokainggu ntona nadaa. Tona nompangaku karona suro-suroKu tano ledo nakana, niparesamiu pokainggura sampe nalantomo ira topodava.
3 Komiu mpuu-mpuu nosabara. Komiu nipandasa ntona sabana pomparasayamiu, bo ledo naupu raramiu nangoseaka Yaku.
4 Tapi naria sangaya inggumiu anu ledo nipodambaKu. Komiu domo nompotove Yaku mpo bara ipia tempo komiu dako nomparasaya.
5 Nakavao ntotomo kanavumiu! Haitu sampe Kuuli ka komiu, pakabelo-belo! Kajeamo komiu, bo poviamo mpo anu nipoviamiu ri pamulana. Ane ledo majea komiu, Kualasi kada mpoindo bulavamiu lako ri ponturona.
6 Tapi nau ivesia, naria sangaya inggumiu nipokonoKu, haitumo navuu matamiu nanggita pokainggu ntona anu nangoseaka pepatuduki i Nikolaus, anu nipovuu mataKu muni.
7 Isema-sema naria talingana epemo pakabelo-belo anu nitesa Nosa Gasa nu Alatala ka todea topomparasaya ri umba-umba ngata. Isema-sema padagi kana Kudekei mangande vua lako ri Kayu Katuvua anu naria riara Pampa nu Alatala ri suruga."
8 Naupu haitu Ana nu Manusia nombatudu yaku vai ala motulisi ka malaeka anu nanggeniaka todea topomparasaya ri ngata Smirna ivei: "Hitumo tesa lako nte Yaku anu niuli Pamulana bo Kaupuna, anu namatemo bo natuvu mpanjili.
9 NisaniKu kasusa bo kapari nirasaimiu. NisaniKu komiu mpuu-mpuu napepa, tapi kakanana komiu nakalumana riara pomparasayamiu. NisaniKu komiu nisalai ntona anu nompangaku karona *toYahudi tano ledo nakana. Ira aga todea nu Magau nu Seta.
10 Tapi nee maeka komiu mantingayo kasusa bo kapari anu domo masae kana rarasaimiu. Pariaramo! Magau nu Seta mompopesua sanu komiu hau rantarunggu bo mompesori komiu ala moura pomparasayamiu. Komiu rapandasa sapulu eo kasaena. Tapi nee maupu raramiu momparasaya Yaku nau komiu rapatesi, sabana Kudekei ka komiu hadia padagi, haitumo komiu matuvu mabelo sampe ri kasae-saena.
11 Isema-sema naria talingana epemo pakabelo-belo anu niuli Nosa Gasa nu Alatala ka todea topomparasaya ri umba-umba ngata. Isema-sema padagi ledo ntoto mambela pehuku anu niuli kamatea karongganina."
12 Naupu haitu Ana nu Manusia nombatudu yaku motulisi ka malaeka anu nanggeniaka todea topomparasaya ri ngata Pergamus ivei: "Hitumo tesa lako nte Yaku anu naria guma nomata ntimali bo natada mpuu.
13 NisaniKumo ngata niponturomiu, haitumo ri ngata ponturo Magau nu Seta. Tapi naupa ivesia, naroso pomparasayamiu nte Yaku. Tempo sabiKu nosanga i Antipas nipatesi ri ngatamiu, komiu ledo nesapu nomparasaya Yaku. I Antipas haitu sabiKu bo ia bate-batena nomparasaya Yaku sampe ia nipatesi ntona ri ngatamiu, haitumo ri ngata nikuasai Magau nu Seta.
14 Tapi da nariapa bara sako-ngaya inggumiu anu ledo nipodambaKu. Naria tona nte komiu nangoseaka pepatuduki i Bileam nggaulu. I Bileam nompatuduki Magau Balak mompakanavu *toIsrael riara dosa . Haitumo, nompakeni ira mangande kandea nipopali sabana nipakande ka tupu-tupu ntanina, bo nompatuduki ira ledo makuya mosipogau nte tona ledo berei mboto.
15 Bo naria muni nte komiu anu nangoseaka pepatuduki i Nikolaus.
16 Jadi Kuuli ka komiu, kajeamo lako ri dosamiu! Ane ledo majea komiu, Yaku masalisa makava nte komiu bo mangeva ira ante guma anu naria ri ngangaKu.
17 Isema-sema naria talingana epemo pakabelo-belo anu nitesa Nosa Gasa nu Alatala ka todea topomparasaya ri umba-umba ngata. Isema-sema padagi, Kudekei ka ira roti Manna anu nitabuniaka . Bo Kudekei muni vatu nabula simbo sangu ka ira. Ri vatu nabula haitu nitulisi sanga nabaru anu ledo ntoto nisani ntona ntanina, aga tona mantarima vatu nabula haitu mangisanina."
18 Bo nitudu Ana nu Manusia vai yaku motulisi ka malaeka anu nanggeniaka todea topomparasaya ri ngata Tiatira ivei: "Hitumo tesa lako nte Yaku, Ana nu Alatala anu nomata narega mpo apu bo nokada nenggila mpo tambaga.
19 NisaniKumo pura-pura pokainggumiu. NisaniKu tovemiu bo pomparasayamiu nte Yaku. NisaniKu bagomiu mantulungi Yaku bo komiu nosabara tempo nipandasa. Bo nisaniKu bagomiu mantulungi Yaku sii-sii nabelopa pade anu nipoviamiu tempo dako nomparasaya Yaku.
20 Tapi da nariapa sangaya pokainggumiu anu ledo ntoto nipodambaKu. Haitumo mombine anu nosanga i Izebel anu nompangaku karona *nabi. Komiu nompaloga ia nompatuduki bo nombabagiu topangoseaka-topangoseaka Yaku. Ia nompatuduki ira mosipogau ante tona ledo bereira mboto bo mangande kandea nipopali sabana nipakande ka tupu-tupu ntanina.
21 NidekeiKumo loga ka ia majea lako ri pokaingguna nadaa haitu, tapi ia ledo ntoto nadota majea.
22 Jadi epemo! Yaku mompakadua ia sampe ia aga maturu ri paturuna. Bo tona nangoseaka pokaingguna nobualo, Kupambela susa bo pari nadaa mpuu, ane ledo menonto ira nangoseaka pokaingguna.
23 Bo ana-anana Kupatesi sampe malanto ka pura-pura topomparasaya, Yakumo anu nomparesa pekiri bo rara ntai manusia, bo Yakumo anu mombabalasi komiu saito-saito nangoseaka pokainggumiu.
24 Tapi naria muni komiu toTiatira ledo nangoseaka pepatuduki nadaa haitu bo ledo nadota neguru anu niuli ntona 'pangisani Magau nu Seta anu nalonto.' Kuuli ka komiu ivei: Yaku ledo mantambai parenta-parenta ntanina ka komiu.
25 Aga kingisi pakarosomo pepatuduki anu naria nte komiu sampe Yaku makava mpanjili.
26 Isema-sema padagi bo mangoseaka dotaKu sampe ri kaupuna, Kudekeika kuasa nasimbayu mpo nitarimaKu lako nte TuamaKu. Kudekei kuasa ka ira momparenta manusia ri umba-umba ri dunia. Ira momparenta ante ase poboba. Bo rapakaropura balira nasimbayu mpo tona norupusaka kura tana.
27 (2:26)
28 Bo Kudekei ka ira betue Pompaeo.
29 Isema-sema naria talingana epemo pakabelo-belo anu nitesa Nosa Gasa nu Alatala ka todea topomparasaya ri umba-umba ngata."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA