Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dangga, dan insirija, sug yen yecinaga dag Allah esedeb gomom deinaugb len gragohob, kaba, ehin yen meigdoc mes naugb yen yowun len gus meroho an meren geicara gecgu gin touei? Naro, yen yemeicara danggero. Anai sug yen yowun len gus an meren geicara gecgu, doba meijen geicara toua aninim dag len, kaba, gini aninim dag yen yeic gogom debin yenin touohob. Hang sud hom dau yen, kaba, en emaunun dougwo naugb sug en owun len gus an meren geicara gecgu dag gin toua deitero. Doba en arges dau gin namcir. Anai en emeic ara ara naugb en emaihiron dougwo enin an men geicara gina? Naro, en emeicara hom ingma touwero.
2 Dara maman macinaga dau sug Allah ogod aremer deinaugb lusud, kaba, dag en emobsara aud sud hom touwero. Doba gareg en eicara gecgu dag gin, kaba, en eic gogom dou len, aimo areg se geica dara gedag beim an len namcir.
3 Dangga hang, dan insirija, sug Allah aimo areg se geica an lusud dag gin dous, kaba, yen youdesa dag en emogod gogom deinaugb yeneroei? Doba en amsoho yen namcirei? Naro, en emarges dau gin touwero. Doba en ogod gogom medam deinaugb yen toua terimda. Anai meijen geicara toua aninim dag len gragohob.
4 Doba Allah medoc eigouhw an yen, hanoba en emeic gogom dou yen dedemeda touebma. Doba en eigtou ateteij yen an meijen geicara gecgu gin terimda. Dangga yen youdesa dagiro? Edeinyum naugb sug yen yesbes an Allah, hanoba yen yeic meijus naugb yen yaimo meijen geicara gecgu gin toua namcirei? Naro, yen yemauwam an didi danggero. Anai sug Allah ens men geicara geigouhw dou yen dag ginohob, kaba, en ouwan naugb men geicara gini arautut yen. Dauntoba yen yesga meijen sesar dareg yen yahau an dougwo toua.
5 Dobnaro, yen yemeineg dau meijen sesar dara yen yemahau an dougwo touwero. Doba yen yeic meijus naugb yen meigdoc agadgeij an gin terimda. Dangga hang, edebeij Lona Sug Allah Ogod Aremer Aga Lusud laugwan, kaba, en eic gogom medam bedreg dou yen namcir. Anai meijen geicara gin, kaba, dag yen yobdeb debinim beisaugblo naugb yeninohob. Allah eicara dag gini, anai se Lona ingga, kaba, en ens enin ainyes dou lusud dag en medoc emesgiraha an sesar hom touwero. Doba en medoc esrougb an augwan gini namcirohob.
6 Hang en emobsara aud sud hom touwero. Doba en ogod aremer augwan se geica dara gedag beim an len namcir, aimo dau astesda sud hom yom men geicara dou en toua.
7 Dangga gareg en ouwan naugb Allah ogugwo men gogouf cucugb ingma dou en, dara en ouwan naugb sug Allah eigdoumesa en moho, dara en ehilon ucina naugb sug Allah eic maireseb menau geb huhugb dou en toua, kaba, Allah eic maireseb huhugb gin dou len namcir. Anai len lemarges dau meren geicara geigouhw gin touwero. Doba len los debin gin terimda, hang Allah emeic gini naugb emauni dou len toua.
8 Doba gareg en eic mos naugb en ed enin deseino len gus terimda, hanoba en emaimo areg asesa Allah enin medoc mes touwero. Doba en aimo areg gecgu gin dous, kaba, Allah en medoc obgos an len naugb en eic gogom medam dou len toua.
9 Dangga gareg en medoc etrij icira naugb en aimo areg gecgu dara mog mog an lusud namcir, kaba, Allah eic gogom dara mog erij dou len laugwan. Aimougtut, kaba, dau emeng Yahudi dara yeng yugmahara yen yaugwan toua.
10 Doba len gedig merdoc erleij naugb leicara eigouhw an lusud terimda, kaba, Allah emeic mog erij dou len touwero. Doba en ogugwo men gogouf cucugb ingma dou len dara en eigdoumesa len meroho agas namcir. Hanoba en eic gesgigouhwesa dou len ucugb toua. Aimougtut, kaba, dou emeng Yahudi dara yeng yugmahara yen yaugwan toua.
11 Anai sug en ogod aremer aga lusud, kaba, en emeigdoumesa sud hom ingma en moho emedreg dau len gus touwero. Doba sug en ogod aremer gin, kaba, en aimo ucina hom an len laugwan toua terimda.
12 Dangga emeng Yahudi gedig Allah eic men gomnomna ogdoc Musa dou emenohob. Hanoba sug emen emebesesar bedreg dag gin, kaba, en ogod gomom dara en eic mor mor se dum smougb deinaugb emen namcir, aimo dau areg en og se men gomnomna eisaugb gini an emen toua. Anai Allah emeic gesgigouhwesa dou emen sug emen emouman men gomnomna gin dousero. Doba en eic gesgigouhwesa dou emen dau sug emen emaimo areg en arougb emen an se men gomnomna gin toua terimda. Doba yeng yugmahara, kaba, Allah emeic men gomnomna ogdoc Musa dou yenero. Dangga hang, sug yen yebesesar, kaba, en emaimo gogom areg en og se men gomnomna eisaugb gini an yen touwero. Doba en ogod gogom dara en eic mor mor se dum smougb dou yen, aimo dau meijen geicara augwougb dou yen dous.
13 (2:12)
14 Anai meijen geicara ens ainyes dag areg Allah arougb lusud an se men gomnomna, kaba, en og deb augwan se yen meigdoc mes teiteiyohob. Dara meijen gauwamara toua ouma debin gin terimda. Anai sug yen yaimo areg Allah arougb lusud an se men gomnomna augwan dag gin, kaba, meijen gauwamara gini eigdoumesa yen meijoho. Doba sug yen yedreg men gomnomna gin, kaba, meijen gauwamara owun yen meijoho an gin toua namcir. Dangga hang, yeng yugmahara, kaba, yen yemecinaga Allah men gomnomna areg en eic dou emeng Yahudi ogdoc Musa gin touwero. Doba sug yen yeic dau yenin meigdoc mes naugb yen yaimo areg Allah arougb lusud an se men gomnomna gin augwougb dag gin, kaba, yen yens yenin ainyes dag yen yecinaga areg Allah ouwan dara emouwanero augwan dag misen namcirohob. Hang gini emeperwei Allah men gomnomna ogdoc Musa dag gomnomna se yen meigdoc mes, anai yen yemecinaga men gomnomna gini men meijouhw asesa touebma.
15 (2:14)
16 Areg graga, kaba, aimo Allah men ucina naugb maman se lona sug en ogod areg maman macgoneh se maman mamdoc mes dara areg maman mauwaman augwan ogdoc Yesus Krisdus gini. Anai en esedeb lona hom naugb ginohob. Gin, kaba, aimo dau areg dan dens dou lusud sug dan desai Mer Geigouhw eisaugb Krisdus dou len sug nosa touohob.
17 Sug Allah eicara dag gin an lusud laugwan se lona ingga, kaba, dagiro naugb yeng Yahudi yenina? Anai yen yeigdoumesa yenin meijoho dag leng Yahudi misen. Hanoba yen yod meijina debsa Musa men gomnomna dag buc gototo namcir. Dara yen yeimiman yenin deseino len gus dag Allah ouci yenin dag men lusud touohob.
18 Dara men gomnomna gin, kaba, ens aremeijouhw augwan asesa dou yen. Dangga hang, yen yecinaga areg asesa Allah enin medoc mes augwan dag misen namcir. Dara eic dag yen meiju ouforoho naugb yen yed areg gecgu dau areg geigouhw gin touohob.
19 Sug yen yecinaga meijouhw augwan asesa dag ginohob, kaba, yen yeigdoumesa yenin meijoho dag yen meiju ouforoho edeinyum naugb sug yen yeinoisa leng meriresmougb, dauntoba len leiya lo asesa ucugb. Dara yen youdesa yen yedag mouf naugb yen yaisema leng leigtou se lobeigbogo, dauntoba len lecinaga ucina aud mouf gin toua.
20 Dangga hang, yen yemen dougwo leng laimo areg gecgu terimda, kaba, dag len lemeicara lemaimo gin deitero. Doba len larges dau namcir. Dara yen yedidib meijouhw dau Musa men gomnomna dou logodeh, dauntoba len lecinaga augwan asesa toua. Anai yen meigdoc eica dag se gomnomna gin, kaba, areg se geica eisaugb Allah ebsohob. Dara edeinyum naugb sug yen yecinaga aremeijouhw augwan asesa toua terimda.
21 Doba sug yen yesulou, dara yen yen dougwo, dara yen yedidib meijouhw augwan dou lusud dag gin terimda, kaba, dagiro, naugwe hang, yen yemesulou dara yen yemen dougwo yenin an meijen geicara ginero? Anai yen yen dougwo lusud dag len lemeiyoho len gus meren aremougwero. Doba yenin, kaba, yen yeiyohora namcirohob.
22 Dara yen yen dougwo lusud dag len merisira emebsa ligida gus aibibra touwero. Doba yenin, kaba, yen meisira ebsa ligida gus ucucugb terimda. Dara yen yesulou lusud dara goubesa namcir naugb sug len lemecguna dou dara lemesijaresa seiseij touwero. Doba yenin, kaba, yen yeinesa meren tuari naugb yen yesma aremougb areg lusud leic dou seiseij gin touohob.
23 Dara yen yeimiman yenin an Musa men gomnomna deseino lugmahara gin toua terimda. Doba yen yedreg en mer gin namcir. Hang yen yeic igdebes dou en touohob.
24 Augwan gini aimo dau areg sud hom, moho Yesaya, en owun yen meijemouwer len meroho an se Surad Injil Meb Mohon sug nosa touohob, endagai: Ogdoc yen gin meijen geicara, hang lugmahara leic maman Adehsud en moho lacecim terimda, anai yen yedreg men gomnomna gin mougwa einyanohob.
25 Dangga sug yen yaimo areg Allah arougb yen an se men gomnomna gin terimda, kaba, gec mos dau ousa yen deseino Allah. Anai gec mos gin, kaba, ansins dag yen meigdoc esgirahesa naugb yen yaimo en mer gin toua terimda. Doba sug yen yedreg en mer dag gin namcir, kaba, en owun yen meijoho dag lusud gedig len lemec merus dauwebma deseino en dous.
26 Doba leng lugmahara, kaba, len lemec len merus dau dag ansins debin Allah men gomnomna gin touebma. Anai en emeic men gomnomna gin dou lenbuma. Doba sug len laimo areg Allah arougb lusud an se men gomnomna augwougb dous, kaba, en owun len meroho dag lusud gedig len lemec merus dauwebma dag gin terimdei? Naro, en emeicara danggero. Doba sug len laimo en mer augwougb dag gin, kaba, en eigdoumesa len meroho dag lusud gedig len lec merus dauwohob deseino en toua namcir.
27 Dangga hang, se Lona Sug Allah Ogod Aremer Aga Lusud laugwan, kaba, leng lugmahara gini len lowun yeng Yahudi yen meijoho an meijen geicara gin toua namcir. Anai len gin, kaba, Allah emeic men gomnomna ogdoc Musa dou lenbuma. Hang len lemec merus dau lemauma debin gin touebma. Doba len laimo areg Allah arougb yen an se men gomnomna augwan augwougb namcirohob, aimo dau areg len merdoc arautut len aud gin dous. Doba yeng Yahudi, kaba, Allah eic men gomnomna ogdoc Musa dou yen. Hanoba en og areg en arougb yen an gini se igdahab naugb yen. Dara yen yec yen meijus yauma debin gin touohob. Doba yen yedreg dau en mer gin terimda. Hang se lona ingga, kaba, leng lugmahara gini len lowun yen meijoho an gin toua namcir.
28 Anai gareg en edag leng Yahudi misen. Dara en ec mos dau dag misen touohoba? Sud hom gedig en aimo Musa men gomnomna aud gousanara. Hanoba en ec mos dau en maga gin dousei?
29 Naro, sud hom gin, kaba, en emedag leng Yahudi misenero. Doba sud hom areg Mena Gogoufu ec mos dau en se en medoc mesohob, kaba, en eng edag leng Yahudi misen. Anai gec mos dau gin, kaba, emogdoc sug en aimo Musa men gomnomna ginero, doba ogdoc Mena Gogoufu men goubesa gin dous. Sud hom gin, kaba, lusud lemeigdoumesa en moho an gin touwero. Doba Allah enin eng eigdoumesa en moho an gin namcir. Anai gec mos se medoc mes gin, kaba, eic dag en emaimo areg dag sesar toua deitero. Doba en esedeb medoc mes naugb en aimo areg asesa Allah enin medoc mes dous.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA