Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sababu uwito, diyaluwo u mowali pongalasani lo manusiya mopotala lo tawu wuwewo mao. Wonu woluwo tawu ta hemopotala lo tawu wuwewo mao, tiyo hemopotala lo batangaliyo lohihilawo, sababu tawu ta hemopotala lo tawu boyito, tiyo olo hemohutu odelo u hepopotalaliyo boyito. Wonu odito, tiyo musi mohukumani batangaliyo olo.

² Otawanto lohihilawo wonu Allahuta'ala mohukumani to tawu ta lohutu pasa-pasaliyala u moleto, putusani lo Allahuta'ala yito banari.

³ Tawu ta hepohutuwa odelo u hepopotalaliyo to tawu wuwewo boyito, dila hepomikirangi deu tiyo mowali molopatao to hukumani lo Allahuta'ala.

⁴ Tawu ta odito boyito dila moharaga Allahuta'ala ta sabari da'a wawu ta mura da'a hila-Liyo. Wawu tantu ma otawa lo tawu ta odito boyito deu Allahuta'ala lopobiloheyi lo piyohiyo, alihu tawu ta odito boyito motobati.

⁵ Bo hila lo tawu ta odito boyito debo tatapu odelo toheto botu wawu dila mohuto motobati. Uwitolo sababuliyo ta odito boyito ma lopoyimoao lo hukumani u pohukumani lo Allahuta'ala oliyo to dulahu ukiyama tou Allahuta'ala ma mopobiloheyi lo kawasa-Liyo mohukumani wolo uadili,

⁶ sababu Allahuta'ala ma momalasi mayi ode timi'idu tawu motu'ude lo huhutuliyo.

⁷ Allahuta'ala ma mongohi mayi tutumula kakali ode timi'idu tawu ta to'otutuwa hepohutuwa piyohu hepololohe umasahuru, hurumati wawu u kakali lonto Allahuta'ala.

⁸ Bo Allahuta'ala ma mongohi mao muruka-Liyo ode timi-timi'idu tawu ta hepopouda'awa lo batangaliyo lohihilawo wawu dila ta'ati ode pongajari u banari lonto Allahuta'ala bo hepoturutiya u moleto.

⁹ Timi'idu tawu ta motohilawo lo umohutu u moleto ma modutola usikisa, tawu lo Yahudi wawu tawu lo bangusa wuwewo mao olo.

¹⁰ Bo timi'idu tawu ta motohilawo lo umohutu piyohu ma mo'otapu umasahuru, hurumati wawu udame monto Allahuta'ala, tawu lo Yahudi wawu tawu lo bangusa wuwewo mao olo.

¹¹ Sababu Allahuta'ala dila hemopobebedawo lo tawu.

¹² Nga'amila tawu ta lohutu dusa ta dila hedihima hukum lo Tawurat ma mowali binasa to diluwari lo hukum lo Tawurat wawu nga'amila tawu lo Yahudi ta hedihima hukum lo Tawurat ta lohutu dusa ma hukumaniyo lo Allahuta'ala moturuti mao hukum lo Tawurat boyito.

¹³ Dila tawu ta bo motota lo tuwango hukum lo Tawurat ta banari to talu lo Allahuta'ala bo tawu ta ta'ati to hukum lo Tawurat boyito.

¹⁴ Tawu-tawuwala lonto bangusa wuwewo dila o hukum lo Tawurat. Bo wonu monto hila limongoliyo lohihilawo timongoliyo ta'ati to tuwango hukum boyito, uwito mopopatatayi deu timongoliyo motota wolo u mowali wawu u dila mowali pohutuwo limongoliyo.

¹⁵ Wolo uodito, huhutu limongoliyo boyito mopopatatayi deu u pilomarenta lo hukum boyito hetulade to delomo hila limongoliyo. Hila limongoliyo olo ma lopobanari mayi lo pasali boti, sababu matimao hila limongoliyo hemopotala olimongoliyo lohihilawo wawu matimao olo hila limongoli hemopobanari olimongoliyo, sababu hukum boyito ma hetulade to delomo hila limongoliyo.

¹⁶ To dulahu ukiyama Allahuta'ala ma momutoa totonulala u to delomo hila lo tawu moli oli Isa Almasih motu'ude lo habari mopiyohu u hepopotunggulou.

¹⁷ Masatiya wololo wolo tawu ta hemongaku tawu lo Yahudi? Tiyo hemoharapu to hukum lo Tawurat wawu tiyo sanangi da'a deu bangusa lo Yahudi ma tilulawoto Allahuta'ala lowali umati-Liyo.

¹⁸ Wawu tiyo ma lo'otapu potunu monto hukum boyito, tunggulo ma otawaliyo wolo kohondaki lo Allahuta'ala wawu u mopiyohe pohutuwaliyo.

¹⁹ Tiyo hemoloiya wolo uyiyakini odiye, ”Wau hemopotunu lo dalala to ta pito'o wawu wau ma lowali tinela to ta hetumula to umodiolomo.

²⁰ Wau hemongajari ta sipatiliyo moleto wawu guru lo ta dila o ilimu.” Tawu boyito mowali moloiya odito, sababu tiyo paracaya deu to delomo hukum lo Tawurat o ilimu ngohuntuwa wawu o pongajari banari.

²¹ Tiyo hemongajari tawu wuwewo mao, bo u banari tiyo musi mongajaripo batangaliyo lohihilawo. Tiyo hemongajari to tawu alihu tawu dila motao, padahali bo tiyo lohihilawo ta hemotao.

²² Tiyo hemongajari tawu wuwewo dila pojina, padahali bo tiyo lohihilawo ta hemojina. Tiyo ta molonuo u ngopohiya mao lo Allahuta'ala, padahali bo tiyo lohihilawo ta momaso ode kuyil mao lohehu babarangiyala teto.

²³ Tiyo sanangi da'a deu tiyo o hukum lo Tawurat, padahali tiyo hemohina Allahuta'ala wolo udila ta'ati to hukum boyito.

²⁴ To kitabi woluwo tula-tuladu odiye, ”Sababu huhutu limongoli tawu lo Yahudi, bangusa wuwewo ma hepohentea to Allahuta'ala.” Odito u tula-tulade to kitabi.

²⁵ Hukum lo tuna yito mopiyohu. Bo wonu timongoli dila ta'ati to tuwango hukum lo Tawurat, tuna boyito dila ohunaliyo.

²⁶ Odito olo wonu tawu ngota ta dila Yahudi ta dila tutuna ta'ati to tuwango hukum lo Tawurat, Allahuta'ala tatapu mololimo oliyo odelo ta tutuna.

²⁷ Uwitolo sababuliyo timongoli tawu lo Yahudi ma popotala lo tawu ta dila Yahudi. Timongoli o hukum lo Tawurat wawu timongoli olo hetunawa, bo timongoli dila ta'ati to tuwango hukum boyito. Bo tawu ta dila Yahudi ta dila hetunawa, timongoliyo ta'ati to tuwango hukum lo Tawurat boyito.

²⁸ Ta banari tawu lo Yahudi dila bo ta tangguliyo tawu lo Yahudi wawu ta otutu tutuna dila bo ta tiluna lo tawu.

²⁹ Bo ta banari tawu lo Yahudi, deuwitoyito tiyo ta hilawo wawu jiwaliyo tawu lo Yahudi wawu ta otutu tutuna, deuwitoyito ta tiluna lo Roh lo Allahuta'ala hilaliyo. Tawu ta odito boyito ma mololimo puji monto Allahuta'ala, dila monto manusiya.

Roma

Video Roma 2

Ikuti Kami:

KONTAK | PARTISIPASI | DONASI