Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 O lun rurumku, mekuu'ké iko ngesala' nelun baken? Iko idi idé-idé pana' na miak ngor. Ngaceku kudeng iko ngesala' nelun baken, iamo' iko sebuleng nganau' kudeng ineh teh, iko ngacing ukum kuan bururmu sebuleng.
2 Idi tau kali' Allah nganau' luk matu kuan lemulun luk nganau' kudeng ineh.
3 O lun rurumku luk ngesala' nelun luk nganau' kudeng ineh, iko pana' nganau' kudeng ineh teh, inanké iko ngerawé iko ini miak mepuit ratnan ukum Allah?
4 Idi inanké iko ngebeneh katuNeh luk rayeh idi ulai niatNeh idi kadang niatNeh? Naké iko kali' ratnan katu Allah ineh ngeruid namu pad iko uren?
5 Iamo' iko metueh niat idi na sikal uren. Iko ngeberat ukum kuan bururmu sebuleng kareb Aco Useh Allah, ieh ineh kareb ukum Allah luk matu uen ngegala'.
6 Ngaceku Allah sikal ngua' anid-anid lemulun maya' kekamendeh.
7 Allah miak maré ulun luk meruked kuan lemulun luk megéi' nganau' luk do' idi luk nakap rayeh dengan ubur idi ulun luk na miak melu.
8 Iamo' kuan lemulun luk ngerawé bururdeh sebuleng idi luk na maya' luk matu, pad ideh nganau' luk dat, Allah miak ngacing useh idi gatehNeh.
9 Inan teh susa' idi dereh kuan anid-anid burur lemulun luk nganau' luk dat ineh, pun-pun kuan lun Yahudi idi kuan lun pupu baken teh.
10 Iamo' Allah miak maré rayeh, dita', idi awang kuan amung-amung lemulun luk nganau' luk do', pun-pun kuan lun Yahudi idi kuan lun pupu baken teh.
11 Ngaceku Allah na mili' ayu lemulun. P
12 Lun pupu baken na kali' Ukum Musa. Ideh nganau' sala' idi meraruh dengan na kali' Ukum ineh. Iamo' lun Yahudi kali' Ukum ineh. Ideh nganau' sala' idi miak kumin maya' Ukum ineh.
13 Ngaceku baken lemulun luk ninger Ukum luk matu pa kiung Allah, iamo' luk maya' Ukum ineh luk ruen matu peh.
14 Lun pupu baken na kali' Ukum ineh, iamo' kareb ideh nganau' kudeng Ukum ineh maya' terawédeh sebuleng, idi lemulun ineh mangun ku ukum kuan bururdeh sebuleng, sagan pana' ideh na kali' Ukum ineh.
15 Kekamendeh ngegala' ratnan lawé Ukum ineh inayud bang niatdeh. Idi teruayen niatdeh ngegala' ineh, ngaceku terawédeh sebuleng rabpu'-rabpu' ngesala' nedah, idi rabpu'-rabpu' ngamo nedeh matu.
16 Kudeng ineh teh luk mangun kareb Aco luk inan Allah dengan Yésus Keristus ngukum amung-amung kekamen lemulun luk lulem, petulu dengan Bala luk Do' luk badénku.
17 Iamo' kudeng iko titen lun Yahudi idi merapet inan Ukum idi ngedita' bururmu ngaceku sembayang inan Allah,
18 idi kali' pian Allah idi sikal ku kekamen luk matu, ngaceku iko nesibada' ratnan Ukum ineh,
19 idi kudeng iko merapet inan bururmu mangun ku lun nguyut lun mebuser idi ku acang kuan lemulun luk bang medacem,
20 idi lun mada' lemulun luk mebacé idi guru anak-anak, ngaceku bang Ukum ineh iko ngalap amung ileh idi luk matu;
21 ngaceku ineh, O iko luk mada' nelun baken, do' iko mada' bururmu sebuleng. Iko luk mada' aleg mano, iamo' iko mano.
22 Iko luk mada' aleg pasét, iamo' iko pasét. Iko luk ara' inan akang, iamo' iko mano ratnan ruma' akang.
23 Iko luk ngedita' bururmu ngaceku Ukum Allah, iamo' iko ngigu' Allah dengan ngelaba UkumNeh.
24 Pangeh inayud bang Surat Allah, "Ngaceku muyuh lun Yahudi, ngadan Allah uen lun pupu baken nguyo."
25 Ngaceku setuneh sunat ineh inan ulek kuanmu kudeng iko maya' Ukum ineh. Iamo' kudeng iko ngelaba Ukum, sunatmu pana' mangun mepad kudeng na sunat teh.
26 Kudeng lemulun luk na sinunat maya' amung luk bida' bang Ukum Musa, bakenké luk na sinunat ineh uen ngiap mepad kudeng sinunat teh?
27 Idi lemulun luk na sinunat, iamo' luk nganau' Ukum ineh, miak ngesala' namu luk ngelaba Ukum sagan pana' iko kali' bala luk inayud ineh idi iko sinunat teh.
28 Idéké seburur lun Yahudi luk matu, luk matu-matu sinunat? Baken lemulun luk tinganak rat nelun Yahudi, luk sinunat maya' adatdeh.
29 Iamo' lun Yahudi luk matu ineh, ieh ineh lun Yahudi bang niatneh. Idi sunat luk matu ineh, ieh ineh sunat bang niat, ieh ineh luk ratnan Roh, idi baken maya' urup mo'. Idi ubur lemulun ineh baken ratnan lemulun iamo' ratnan Allah.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA