Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Keranaq nike semeton senamian, sai setetune side pade sehingge hakimin dengan lain? Side mẽsaq ndẽqne bẽbas lẽman kesalaqan, sẽngaq lamun side pade hakimin dengan lain padahal side mẽsaq ngelaksaneang hal saq pade maraq dengan-dengan nike, make side pade mutusang hukuman tipaq diriqde mẽsaq.

² Ite nenaoq bahwe Allah mutusang hukuman tipaq dengan-dengan saq ngelaksaneang perbuatan-perbuatan saq maraq nike, keputusan Allah nike kenaq.

³ Laguq selapuq side pade, semeton-semeton, side mẽsaq ngelaksaneang ẽndah hal-hal saq selapuq side pade tuduhang tipaq dengan-dengan lain! Dait side pade pikir selapuq side pade gen bau luput lẽman hukuman Allah?

⁴ Atao side pade ngerẽmẽhang kemurahan Allah dait kesolahan kance kesabaran Allah saq belẽq nike? Pasti side pade selapuq nenaoq bahwe Allah nyatayang kesolahan angen-Ne sẽngaq Allah kayun adẽq side pade selapuq betobat lẽman dose-dose side pade.

⁵ Laguq side pade pagah dait ndẽq mẽlẽ betobat. Keranaq nike side mẽsaq saq miaq hukuman side pade jari sayan berat, sewaktu Allah nyatayang murke-Ne dait mutusang hukuman saq adil.

⁶ Sẽngaq Allah gen bales sebilang dengan pade maraq perbuatanne.

⁷ Allah ngicanin idup sejati dait kekel tipaq ie pade saq pacu-pacu ngelaksaneang napi saq solah, adẽq ie mauq saq mulie dait saq terhomat, dait saq kekel.

⁸ Laguq dengan-dengan saq mentingang diriqne mẽsaq dait ndẽq mẽlẽ taat lẽq kebenaran, laguq turut hal-hal saq jahat, make Allah gen murke gati lẽq dengan-dengan nike.

⁹ Sebilang dengan saq demen gawẽq jahat gen sengsare dait menderite, penembẽqne dengan Yahudi, dait dengan bangse-bangse lain ẽndah.

¹⁰ Laguq selapuq dengan saq demen ngelaksaneang napi saq solah gen teicanin kemuliean dait kehormatan dait damẽ sejahtere lẽman Allah. Penembẽqne tipaq dengan Yahudi maraq nike ẽndah tipaq dengan bangse-bangse lain.

¹¹ Sẽngaq perlakuan Allah pade tipaq selapuq dengan.

¹² Dengan bangse-bangse lain bedose, ie pade ndẽq ngerti Hukum Taurat, jari ie pade tehukum siq Allah lẽq luah hukum nike. Laguq dengan-dengan Yahudi bedose sesampun ie pade ngerti hukum nike, keranaq nike ie pade gen tetuntut ẽndah siq dasar hukum nike.

¹³ Ndẽqne dengan saq dengah Hukum Taurat saq tenyatayang sebagẽ dengan kenaq lẽq arepan Allah, laguq dengan saq taat lẽq hukum nike, saq gen tenyatayang kenaq.

¹⁴ Dengan bangse-bangse lain ndẽqne kenal kance Hukum Taurat, laguq lamun siq kemẽlẽqne mẽsaq ie pade mẽlẽ ngelaksaneang napi saq teprẽntahang siq Hukum Taurat nike, make atẽne mẽsaq saq jari hukum tipaq ie pade, timaq ie pade ndẽq kenal kance Hukum Taurat.

¹⁵ Tingkah laku ie pade nyatayang bahwe napi saq teprẽntahang siq hukum nike tetulis lẽq dalem atẽ ie pade. Dait ẽndah atẽ nurani ie pade buktiang hal nike, sẽngaq pikiranne mẽsaq saling tuduh atao saling bẽle.

¹⁶ Maraq nike saq gen telaksane lẽq jelo saq sampun tetentuang nike. Lẽq jelo nike -- menurut Kabar Solah saq tiang sampẽang, Allah langan Deside Isa Almasih gen hakimin selapuq hal saq teseboq lẽq dalem atẽ dait pikiran selapuq dengan.

¹⁷ Laguq mangkin berembẽ side pade niki? Side pade ngaku dengan Yahudi, side pade beharep sepenoq angen lẽq Hukum Taurat dait side pade bangge siq hubungan side pade kance Allah.

¹⁸ Side pade nenaoq pekayunan Allah. Dait lantaran teajah kadu Hukum Taurat, side pade nenaoq mbẽ saq solah dait mbẽ saq ndẽq solah.

¹⁹ Side pade yakin bahwe side pade jari pemimpin dengan bute dait cahaye tipaq dengan-dengan saq araq lẽq dalem peteng.

²⁰ Side pade bimbing dengan-dengan saq ndẽqman dẽwase pikiranne dait guru-guru dengan saq bodo. Side pade yakin bahwe lẽq dalem Hukum Taurat side pade bedowẽ penenaoq dait kebenaran.

²¹ Side pade ngajah dengan lain, nah kembẽq side pade ndẽq ngajah diriqde mẽsaq? Side pade ngajah dengan adẽqne ndẽq memaling, laguq kembẽq side mẽsaq memaling?

²² Side pade ngajah dengan adẽq ie ndẽq bezinah, laguq kembẽq side mẽsaq bezinah? Side pade meriq tipaq berhale, laguq kembẽq side mẽsaq ngerampok barang-barang lẽman balẽ-balẽ berhale.

²³ Side pade bangge-banggeang bahwe side pade bedowẽ Hukum Taurat, laguq kembẽq side mẽsaq menghine Allah siq care ngelanggar Hukum Taurat nike.

²⁴ Lẽq dalem Kitab Suci tetulis maraq niki, "Lantaran side, dengan-dengan Yahudi, make pesẽngan Allah jari tehine lẽq antare bangse-bangse lain."

²⁵ Lamun side pade taat lẽq Hukum Taurat, make sunat side pade nike araq ẽndah manpaatne. Laguq lamun side pade ndẽq taat lẽq hal-hal saq teprẽntahang dalem Hukum Taurat nike, make sunat side pade nike ndẽq araq manpaatne malik.

²⁶ Lamun sopoq dengan saq ndẽq Yahudi saq ndẽq tesunat, laguq ie taat lẽq Hukum Taurat, napi ie ndẽq teanggep siq Allah sebagẽ dengan saq sampun tesunat?

²⁷ Dait dengan-dengan saq ndẽq tesunat laguq saq ngelaksaneang Hukum Taurat, gen hakimin side pade saq bedowẽ hukum saq tetulis dait sunat, laguq ngelanggar hukum nike. Dengan-dengan Yahudi timaqne bedowẽ Hukum Taurat dait tesunat, laguq malahan dengan-dengan saq ndẽq tesunat saq taat lẽq Hukum Taurat.

²⁸ Sẽngaq dengan Yahudi saq sejati ndẽqne dengan saq cume aranne doang dengan Yahudi, dait dengan saq tetu-tetu tesunat ie ndẽqne dengan saq tesunat secare lahiriah doang.

²⁹ Laguq dengan Yahudi sejati nike, dengan saq ndẽq penggitan keyahudianne dait sunat saq sejati nike perobahan lẽq dalem atẽ siq Roh Allah. Dengan saq maraq nike nerimaq pujian lẽman Allah, ndẽqne lẽman manusie.

Roma

Video Roma 2

Ikuti Kami:

KONTAK | PARTISIPASI | DONASI