Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali si’i-si’i aku manganto’oka komi mangkonong i Pebe. Ia semo samba’a tau we’a to madota mangansawang tau to mangaya to siromu nja’u kota Kengkrea.
2 Ia darata resi komi, wali aku mamporapika resi komi see komi damangantima ia ri kasanang ndaya apa ewa wetu to masipato naika ntau to i Pue Allah Puenya mangantima a’inya to samba’a seja pei i Pue. Pasi kuporapika seja see ane bara re’e to taa gana resi ia, komi damangansawang ia, apa ia room mangansawang boros tau. Pasi ia seja mangansawang aku.
3 Wali to’oka i Priskila sira dua i Akwila aku taa mangkalingan sira. Sira dua sindara-ndara pei aku seore mangika palaong i ngKerisitu Yesu.
4 Pasi tempo seore nempo re’e tau to rani mampopate yau sira dua, pei sira tiroo mangansawang aku. Wali aku manganto’oka sira tarima matao. Pei si’a ojo aku, samparia tau to mangaya to si’a to Yahudi, paka manganto’oka seja sira dua tarima matao.
5 Pasi aku taa seja mangkalingan samparia tau to mangaya to siromu nja’u banua nsira dua. Pasi re’e wo’u sawei mba’a tau to aku taa mangkalingan. Wali porata gombongku etu resi sira. Wali tau to etu, samba’a i Epenetus to kuporayang. Ia semo to uyunya mangaya i Kerisitu nja’u Asia.
6 Pasi re’e seja i Maria. Ia madota kojo mapalaong ri oyo ngkomi.
7 Pasi re’e wo’u i Andronikus sira dua Yunias, pua’ingku to Yahudi to ratarungku seja seore sindara-ndara pei aku. Sira dua paka pomakau i mPue Yesu to na’angga ntau boros. Pasi tempo aku tawa mawali samba’a pei i Kerisitu seore, tempo etu sira dua roomo mawali samba’a pei Ia. Wali to’oka tau to etu aku taa mangkalingan sira.
8 Pasi aku taa seja mangkalingan i Ampliatus to kuporayang apa saba ia samba’a seja pei i Pue. Wali to’oka ia aku taa mangkalingan ia.
9 Pasi to’oka seja i Urbanus to mangika palaong i ngKerisitu sindara-ndara pei kita. Pasi to’oka seja i Stakhis to kuporayang.
10 Pasi to’oka seja i Apeles. Ia re’e mangarata pansoba, pei tare pandoonya mangalulu i Kerisitu. Pasi to’oka seja tau to maroo ri banua i Aristobulus.
11 To’oka seja i Herodian, a’ingku to Yahudi. Pasi to’oka seja samparia tau to samba’a pei i Pue to maroo ri banua i Narkisus.
12 Pasi to’oka seja i Tripena sira dua Triposa to madota mangika palaong i mPue. Pasi i Persis to raporayang, to madota kojo mangika palaong i mPue.
13 Pasi to’oka seja i Rupus. Ia seja tau to samba’a pei i Kerisitu, pasi ia na’angga ntau boros. Pasi to’oka seja indonya. Ia ewa indo ngkorongku seja.
14 Pasi re’e wo’u sawei mba’a tau wo’u to aku taa mangkalingan. Etu semo i Asinkritus, Plegon, Hermes, Patrobas, Hermas, pasi samparia pua’i ngkita to siwaka pei sira.
15 Pasi to’oka seja i Pilologus pasi Yudia, i Nereus sira dua pua’inya to we’a, pei i Olimpas pasi samparia tau to i Pue Allah Puenya to siwaka pei sira. Wali aku taa kojo mangkalingan samparia tau to etu.
16 Wali tempo komi simparata samba’a pei samba’a, masinengu ri kasanang ndaya ewa to masipato naika ntau to i Pue Allah Puenya. Wali samparia tau to mangaya to siromu ri lipu-lipu rire paka taa mangkalingan komi.
17 Wali a’i-a’i, re’e to aku rani mampatiendoka komi. Etu semo jagai kojo tau to ojo rani mangarotai katuwu ngkomi to mangaya see bara re’e tau to mawali masimpayu raya, pasi tamo maroso pangayanya resi i Pue. Gete, palaong to etu ojo mangewa anu to room rapotundeka resi komi, wali pakalongko yako resi tau to mangika palaong to ewa wetu.
18 Apa tau to ewa wetu taa kojo mangika palaong i ngKerisitu, Pue ngkita. Sira ojo mangika palaong to mangabanang pamporani ndaya nsira semo. Pasi sira mangampake gombo to magaya pasi to mangamomis raya ntau see mangantipu tau to taa pande mampasisala anu to monso pasi to taa monso.
19 Pei ane mangkonong komi, aku masanang kojo rayangku, apa nansani ntau boros komi mampalaika kojo i Pue. Pei tiroowa re’e pamporaningku resi komi. Etu semo, ane mangkonong anu to matao, aku rani see komi mawali pande kojo mangaluluka. Pei ane anu to maja’a, ne’e komi mawali pande mangaluluka. Etu semo pamporaningku.
20 Apa ane kita mangika ewa see, tamo masae i Pue Allah, anu mangawaika kita karodo ndaya, damampakapura kuasa ngKepala Measa see kita maya manganangi ia. Wali aku mamporapika resi i Yesu Kerisitu, Pue ngkita, see Ia mampaponsanika komi kanotoNya.
21 Wali i Timotius, to mapalaong sindara-ndara pei aku, ia taa mangkalingan komi. Pasi ewa see seja i Lukius, i Yason pasi i Sosipater. Sira togo paka pua’ingku to Yahudi.
22 Pasi aku seja, i Tertius, to mangantulis gombo i mPaulus si’i, aku taa seja mangkalingan komi apa kita samba’a pei i Pue.
23 Pasi i Gayus taa seja mangkalingan komi. Wali aku, i Paulus, re’e maroo ri banua i Gayus, pasi tau to mangaya ri lipu si’i re’e siromu nja’u banuanya etu. Pasi re’e wo’u dua mba’a tau to taa mangkalingan komi. Etu semo i Erastus to mampasilonga doi ngkota si’i pasi a’i ngkita, i Kwartus.
24 (Wali aku mamporapika resi i Yesu Kerisitu, Pue ngkita, see Ia damampaponsanika komi samparia kanotoNya. Amin.)
25 Wali barong i Pue Allah. Ia nakurang mampakaroso pangaya ngkomi ewa to room aku manganto’o tempo aku mampakarebaka komi kareba matao mangkonong i Yesu Kerisitu. Kareba matao etu semo songka i mPue Allah to rawuni yako ri temponya lino si’i tawa rapapowali.
26 Pei tempo si’i songkaNya etu room rapaponsanika pasi rapakarebaka resi tau samparia bansa yako tuntu i mPue Allah to natulis nto pantuntu tuntuNya tempo owi. Palaong etu mawali apa etu semo porenta i mPue Allah anu to tuwu singkasaenya, see samparia bansa tau damangaya pasi mampolaika Ia.
27 I Pue Allah Ia samba’aja pasi ojo Ia semo to nakare’e kasamparianya kapande. Wali masipato kita mangabarong Ia rataka ri singkasaenya, apa saba palaong to naika i Yesu Kerisitu. Amin. Ungkanyamo ruyu gombongku si’i.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA