Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tiang tunas side pade perhatiang semetonte saq nine, Pebe, ie pelayan jemaah lẽq Kengkrea.

² Pade terimaq ie lẽq dalem Junjungan Saq Mulie, maraq saq patut jari dengan-dengan saq tehususang bagi Allah. Pade tulung ie lamun ie merluang bantuan side pade sẽngaq ie mẽsaq sampun nulung luwẽq dengan dait tiang ẽndah tetulung siq ie.

³ Sampẽang salam tiang tipaq Priskila dait Akwila, batur-batur tiang saq bareng-bareng bagawẽan kance tiang lẽq dalem Deside Isa Almasih.

⁴ Ie pade aroh matẽ lantaran mẽlẽ nyelametang tiang. Tiang ngucapang tampi asih lẽq ie pade -- dait ndẽqne tiang doang, laguq selapuq jemaah lẽman bangse-bangse lain ẽndah.

⁵ Sampẽang ẽndah salam tiang tipaq jemaah saq bekumpul lẽq balẽ ie pade. Salam tipaq Epenetus, batur saq tiang kasihin, ie dengan saq penembẽq percaye tipaq Almasih lẽq daẽrah Asia.

⁶ Salam tiang ẽndah tipaq Mariam saq matẽ-matẽan begawẽan umaq side pade.

⁷ Sampẽang salam tiang ẽndah tipaq Andronikus dait Yunias, ie pade sebangse kance tiang dait sampun tebui bareng-bareng kance tiang. Sendẽqman tiang percaye lẽq Almasih, ie pade sampun juluan percaye. Deduaqne tehormatin lẽq antare pare rasul.

⁸ Salam tipaq Ampliatus saq tiang kasihin lẽq dalem Junjungan Saq Mulie.

⁹ Sampẽang salam tiang tipaq Urbanus, batur saq bareng begawẽan dalem Almasih dait tipaq Stakis batur saq tiang kasihin ẽndah.

¹⁰ Salam tipaq Apeles saq sampun tahen uji dalem Almasih. Salam ẽndah tipaq Aristobulus dait dengan-dengan saq ndot lẽq balẽne.

¹¹ Salam tipaq Herodion. Ie sebangse kance tiang. Salam ẽndah tipaq semeton-semeton saq percaye lẽq Junjungan Saq Mulie, saq ndot lẽq balẽ Narkisus.

¹² Sampẽang salam tiang tipaq Tripena dait Triposa saq matẽ-matẽan begawẽan umaq Junjungan Saq Mulie. Salam tipaq Persis saq tiang kasihin, saq matẽ-matẽan begawẽan umaq Junjungan Saq Mulie.

¹³ Salam tipaq Rupus bareng inaqne saq sampun tiang anggep maraq inaq tiang mẽsaq. Rupus nike dengan saq tepilẽq siq Junjungan Saq Mulie.

¹⁴ Sampẽang salam tiang tipaq Asinkritus, Plegon, Hermes, Patrobas, Hermas dait selapuq semeton saq bareng kance ie pade.

¹⁵ Sampẽang salam tiang tipaq Pilologus dait Yulia; dait Nereus bareng semetonne saq nine; tipaq Olimpas dait tipaq selapuq dengan saq tehususang bagi Allah saq bareng kance ie pade.

¹⁶ Silaq side pade besalam-salaman sebagẽ semeton seiman. Selapuq jemaah Almasih nyampẽang salam tipaq side pade.

¹⁷ Semeton-semeton senamian! Sanget siq tiang tunas lẽq side pade adẽq side pade waspade tipaq dengan-dengan saq nimbulang perpecahan dait nyesatang dengan lẽman perajahan saq sampun ie pade terimaq. Jaoqang diriqde lẽman dengan-dengan saq maraq nike.

¹⁸ Sẽngaq dengan-dengan saq gawẽq maraq nike ndẽq begawẽan umaq Almasih, Junjungante Saq Mulie, sebalikne ie pade cume muasang kemẽlẽqne mẽsaq. Siq rayuan dait ucapan saq manis-manis, ie pade nipu dengan-dengan saq tulus angenne.

¹⁹ Ketaatan side pade sampun tetaoq siq selapuq dengan. Dait tiang seneng gati dengah hal nike. Laguq tiang melẽt adẽq side pade bijaksane lẽq hal-hal saq solah, dait bersi lẽman hal-hal saq jahat.

²⁰ Allah sumber damẽ sejahtere gen ngancurang Belis lẽq bawaq naẽn side pade. Rahmat Junjungante Saq Mulie Deside Isa Almasih araq bareng kance side pade.

²¹ Timotius, batur saq bareng begawẽan kance tiang nyampẽang salamne tipaq side pade, maraq nike ẽndah Lukius, Yason dait Sosipater saq sebangse kance tiang.

²² Tiang, Tertius saq nulis surat niki, ngucapang salam lẽq dalem Junjungan Saq Mulie tipaq side pade selapuq.

²³ Gayus ẽndah ngirim salam tipaq side pade. Tiang ndot lẽq balẽne dait selapuq jemaah ẽndah nyodoq lẽq balẽne. Erastus saq jari bendahare kote ẽndah nyampẽang salam tipaq side pade, maraq nike ẽndah semetonte Kuartus.

²⁴ [Rahmat Junjungante Saq Mulie Deside Isa Almasih bareng kance side pade. Amin.]

²⁵ Puji syukur tipaq hadirat Allah! Ie bekuase neguqang side pade, sesuai kance Kabar Solah saq tiang sampẽang mengenai Deside Isa Almasih, sesuai kance pernyataan rahasie saq sampun berabad-abad ngonẽqne ndẽq tetaoq siq dengan.

²⁶ Laguq mangkin siq prẽntah Allah saq kekel, rahasie nike sampun tenyatayang dait tesampẽang tipaq selapuq bangse langan kitab nabi-nabi, adẽq ie pade selapuq percaye dait taat lẽq Ie.

²⁷ Ie sopoq-sopoqne Allah Saq Mahebijaksane. Temulieang langan Deside Isa Almasih selaẽq-laẽqne! Amin.

Roma

Video Roma 16

Ikuti Kami:

KONTAK | PARTISIPASI | DONASI