Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ui maré kuan muyuh Pibi, kinanak tau luk decur ini, luk mangun ku lun ngasa' sidang déi' Kenkria ineh.
2 Do' muyuh nganak neneh bang Tuhan petulu dengan lawé lun manu, idi nengan neneh bang anun-anun luk pianneh rat nemuyuh. Ngaceku ieh ineh teh pangeh mangun ku lun rurum kuan tuda'-tuda' lemulun, idi kuan bururku sebuleng pana'.
3 Do' maré tabi' kuan Priskila idi Akila, lun denganku bang kekamen Keristus Yésus.
4 Didueh ineh pangeh nemaré ulun didueh ngaceku bururku, idi baken ui ini mo', iamo' amung-amung sidang rat arang lun pupu baken pana' ngubur nedidueh.
5 Maré tabi' teh kuan sidang luk bang ruma' didueh ineh. Tabi' kuan lun rurumku Epenitus, ieh ineh lemulun luk pun nemanu inan Keristus déi' tana' Asia.
6 Tabi' kuan Mariam luk pangeh nengakem tu-tu kuan muyuh.
7 Tabi' kuan Andronikus idi Yunias, pupuku lun Yahudi idi lun denganku bang tutup, luk buren rat arang rasul-rasul, idi luk atun rat negku manu inan Keristus.
8 Tabi' kuan Ampliatus, lun rurumku bang Tuhan.
9 Tabi' kuan Urbanus, luk lun dengan kai bang kekamen Keristus, idi lun rurumku Istakus.
10 Tabi' kuan Apelis luk lutep bang Keristus. Tabi' kuan lun bang ruma' Aristobulus.
11 Tabi' kuan Herodion, pupuku ineh. Tabi' kuan lun bang ruma' Narkisus luk maya' Tuhan.
12 Tabi' kuan Tripina idi Triposa, ieh ineh decur luk nengakem kuan Tuhan. Tabi' kuan Persis, decur luk inan mawa ineh, luk nengakem do'-do' kuan Tuhan.
13 Tabi' kuan Rupus, luk pebala do' kekamen bang Tuhan, idi kuan tinanneh, luk pangeh mangun ku tinanku teh.
14 Tabi' kuan Asinkritus, Peligon, Hermis, Patrobas, idi Hermas, idi amung-amung kinanak luk dengandeh ineh.
15 Tabi' kuan Pilologus, Yulia, Nerius idi kinanakneh luk decur, idi Olimpas, idi amung-amung lun manu luk dengandeh ineh.
16 Do' muyuh petabi' seburur dengan seburur dengan pebuen luk meligan. Idi tabi' ratnan amung-amung sidang Keristus kuan muyuh.
17 Ui mutuh nemuyuh, O kinanak-kinanakku, ngerawé amung-amung lemulun luk ngacing kedaluh, idi luk ngeraruh lemulun ratnan bada' luk inan muyuh nesibada'. Do' muyuh teketed rat nedeh ineh.
18 Ngaceku lemulun luk nganau' kudeng ini baken mangun ku demulun Keristus Tuhan tau, iamo' mangun ku demulun pinian bururdeh sebuleng, idi dengan bala luk mepaci' idi luk do', ideh naluk lun luk mesiri niat.
19 Ngaceku baya' muyuh nan Tuhan pangeh megala' kuan amung-amung lemulun. Ngaceku ineh ui mawang niat nemuyuh, iamo' ui pian pad muyuh mangun mileh bang anun-anun luk do', idi na mesala' ratnan luk dat.
20 Idi Allah, luk lawa awang ineh, sikal ngeradu' Sétan ineh dengan mesaget pa liang lengayan kukud muyuh. Idi do' katu Tuhan tau Yésus Keristus ngedengan nemuyuh.
21 Tabi' rat ni Timotius, lun denganku bang kekamenku kuan muyuh, idi tabi' ratnan pupuku Lukius, Yason, idi Sosipater.
22 Ui ini Tertius, luk nengayud surat ini, maré tabi' kuan muyuh bang Tuhan.
23 Idi tabi' kuan muyuh rat ni Gayus, luk nengasa' negku idi amung-amung sidang ineh. Idi tabi' kuan muyuh rat ni Erastus, lun ngimet usin bawang ini, idi rat ni Kuartus, kinanak ineh.
24 [Do' katu Tuhan tau Yésus Keristus ngedengan amung-amung muyuh. Amin.]
25 Do' tau ngerayeh Allah. Ieh ngepicet anu muyuh, maya' Bala luk Do' luk badénku, idi maya' bada' ratnan Yésus Keristus ineh, idi maya' luk linio ratnan bala luk inalum rat mon.
26 Iamo' nekini bala ineh pangeh megala' ratnan surat nabi-nabi, idi maya' ukum Allah luk meruked ineh, pangeh linio kuan amung-amung pupu, pad ideh miak manu idi maya'.
27 Idi kuan Allah luk inan amung-amung ileh, inan rayeh ngaceku ratnan Yésus Keristus, macing ruked-ruked peh! Amin.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA