Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ De wongoseli, "Tagi 'o surati nolefo 'o jamati ma balu-balusika 'o Efesus ma kotaka konee: Wimoi gee wa'aono 'o ngoma 'o ngai tumudiingi 'awi giama ma giniraoka ge'ena de wotagi-tagi 'o silo ma to-todenge 'o guraci 'o ngai tumudiingi ma sigoronaka, wositotara 'o besesongo ne'ena nginika. Wongose 'ato,

² 'Ngoi tanako 'o sagala moi-moi gee niadi-diai nia 'ahu ma sigoronaka. Ngini nimariwo niosigou-gounguku de posironga niotahanioka ngaro niokasangisara ma. Ngoi tanako ngini konia'akunuwa niakilega-lega 'o nyawa yoti-tingkai. De 'o nyawa gee yongose 'ato 'ona ge'ena 'o su-suloko 'ena momongo ko'uwa, ngini niakilega ma diaiokau de nianakokau 'ato 'ona ge'ena yoelu-eluku.

³ Ngini niosabari de niosangisara sababu nimoteke ngoi, ma ngini nia singina koi'oguwa.

⁴ Ngaro koge'ena ma naga de ma 'ena kotoduakuwa nginioka: Ngini nia dora 'iso ko ma sirawau, gee ngini 'asa kaniokurue niongaku ngoino.

⁵ Sababu ge'ena salingou niongano-nganono, ngini niootaka ma gurutukou. Niolionou ngoino, niomaogoro 'o sowono niodiai de niadiai 'isoka kokia naga gee ma sira niadi-diai ma 'orasi 'asa kaikurue niongaku ngoino. Nako ko'uwa ge'ena dua toboa nginika de ta'aikoka 'ania silo ma to-todenge ma ngiioka ge'ena ma ngale tinihukumu.

⁶ Ma naga de ma 'ena 'ai singina yadaene, ge'ena la ngini niodu'uduku 'o Nikolaus wimote-moteke manga di-diai, gee ngoi mita todu'uduku.

⁷ Ngini de nia ngaukoka so tanu nio'isenika 'okia naga gee 'o Ngomasa 'Itebi-tebini 'isidemokau 'o jamati 'isinoimika! 'O nyawa gee yalaku-laku 'o dorou ma pareta, 'ona 'asa takisidabi ya'odomo 'o gota gee 'o nyawa yosi'ahu-'ahu ma sowoko. 'O gota ge'ena 'i'oode ma Jo'oungu ma Dutu 'awi Bairoka ge'ena la 'o sorogaaka.'"

⁸ Ge'enaka de wongoseli, "Salingou 'o surati nolefo 'o jamati ma balu-balusika 'o Smirnaka konee: Ne'ena 'o besesongo 'unano gee ma Di-disiraka de ma Du-du'uruoka, gee wosongenokau de wowangoli. Wongose 'ato,

⁹ 'Ngoi tanako ngini niokasangisara de niosaigalere, ma ngini niokaya 'ania ngo-ngaku ma Jo'oungu ma Dutuka. Ngoi tanako 'o nyawa gee yongose 'ato 'ona ge'ena 'o Yahudioka ma ngale ma Jo'oungu ma Dutu 'awi kawasa 'ena momongo ko'uwa. 'Onau ge'ena 'ania ronga ma dorou yodi-diai momongo 'ona ge'ena 'o Tokata ma Koana yamote-moteke!

¹⁰ Ngini dua ma raiokau niosangisara, ma 'uwa niododato. Niosi-singina! 'O Tokata ma Koana dua 'isuloko 'o nyawa-nyawaka gee koyosa-sanangiwa nginika, so dua nginioka naga munuka yakitagoko de yakisingosama 'o buika ma ngale nitaili. Ngini dua posironga niosangisaraka 'o wange mogiookino; ngini salingou 'uwa nimada ngoi ngaro 'o nyawa nito'oma ma. Ngoi 'asa tinisiparasengi 'o 'ahu 'ika-kakali.

¹¹ Ngini de nia ngaukoka so tanu nio'isenika 'okia naga 'o Ngomasa 'Itebi-tebini 'isidemo 'o jamati 'isinoimika! 'O nyawa gee yalaku-laku 'o dorou ma pareta, 'ona dua 'o songene ma warasa ma modidi ma sangisara koyakidaenuwa.'"

¹² De wongoseli, "Salingou 'o surati nolefo 'o jamati ma balu-balusika 'o Pergamus ma kotaka konee: 'Una gee 'awi wase moi ma doto de ma dudunu 'idoto-doto wositotara 'o besesongo ne'ena nginika. Wongose 'ato,

¹³ 'Ngoi tanako ngini niomanoa 'o Tokata ma Koana 'ipa-pareta ma ngiioka. Ngini konimaogoruwa nimoteke ngoi ngaro niolega-lega 'o Antipas wito'oma. 'O Antipas 'una ge'ena woma-magae woisihabari ma de wosidumu-dumutu 'awi 'ahu ma sigoronaka 'ato 'una woingaku ngoi.

¹⁴ Duga naga de ma 'ena tinisisala. Nginioka naga munuka yamoteke kokia naga 'o Bileam wosidoto-dotoko. 'O Bileam wosidotoko 'o Balakika, kokia la 'o Israeloka 'o sowono yodiai, ge'ena la yakibaja 'o Israeloka ya'odomo 'o 'inomo gee 'isisoimokau 'o barahalaka, de yomakapake kayo'itimaronga.

¹⁵ Koge'enali mita nginioka naga munuka yomasiga-gao 'o Nikolaus wimote-moteke manga do-dotokika.

¹⁶ Sababu ge'ena niomaogoro 'o sowono niodiai. Nako ko'uwa, dua tacobou taika nginika de takikudoti 'o nyawa-nyawa go'ona de 'o wase gee 'ai 'uruoka.

¹⁷ Ngini de nia ngaukoka so tanu nio'isenika 'okia naga 'o Ngomasa 'Itebi-tebini 'ingose 'o jamati 'isinoimika! Gee yalaku-laku 'o dorou ma pareta, 'ona 'asa takisidabi ya'odomo 'o manna gee 'i'iu-'iunika, de 'ona moi-moi 'asa yomadadawongo 'o teto 'i'are-'arese ngoioka. Ma tetoka ge'ena 'isilefoka 'o ronga ma sungi moi gee komoiwasi yanako, duga kayomada-dadawongo gee.'"

¹⁸ De wongoseli, "Salingou 'o surati nolefo 'o jamati ma balusika 'o Tiatiraka konee: Ne'ena ge'ena 'o besesongo ma Jo'oungu ma Dutu 'awi Ngowakoka, gee 'awi ako 'ileto-letongo 'isoka 'o 'uku, de 'awi dou 'iletongo 'isoka 'o tambaga yasarongokau ma ngale ma mediri yatebini. Wongose 'ato,

¹⁹ 'Ngoi tanako kokia to ngini 'ania gokoie de nia gogeruku. Ngoi tanako ngini 'ania dora 'iamoko, konimadawa ngoi, nioduaka nioleleani, de niotahani niosangisara. Ngoi tanako 'okia naga gee ne'ena naga niadi-diai 'ifoloi 'ikudai de ma sira gee ngini 'asa kaikurue niongaku.

²⁰ Duga neda 'ai singina koyadaenuwa nginika: Ngini minisidabika ngo Izebel gee momasironga ma Jo'oungu ma Dutu 'awi nabii. So ma rai 'o nyawa 'ile-leleani ngoino manga gudaiou makisiliba de makisidotoko yomakapake kaitimaronga yodiai de ya'odomo 'o 'inomo gee 'isisoimokau 'o barahalaka.

²¹ Tomikulakau 'o 'orasi ma ngale momaogoro 'o sowono modiai, ma muna mooluku mapidili yomakapake kaitimaronga.

²² Ge'enau so ngoi dua tacobou tomihukumu so dua mopanyake. De 'o nyawa gee yomakakapake kayo'itimaronga de de muna, 'asa takihukumu so yosangisara ma sala nako la koyomaogoruwa 'o dorou yodiai de de muna.

²³ Ngoi 'asa takito'oma 'o nyawa gee yamote-moteke 'ami do-dotoko, de 'o jamati 'iodumu 'asa yanako 'ato ngoiou ne'ena talega ma diai 'o nyawa manga singina ma dodaka, de tanako manga di-dibangi. Ngini 'asa tinisikilioro moteke kokia naga gee ngini niadi-diai.

²⁴ Ma ngini 'o Tiatiraka munuka koniodomotekuwa 'o do-dotoko 'ito-torou ge'ena de konimadotokuwa 'o Tokata ma Koana ma do-dotoko. Tinisidemo nginika, ngoi 'asa kotinido-dogowau 'ania gina,

²⁵ so duga kaniaga-gao niosidiaino 'okia naga gee nginioka sigado dua ngoi toboali.

²⁶ 'O nyawa gee yalaku-laku 'o dorou ma pareta de yadi-diai 'okia naga gee todua-duaka sigado 'o dunia ma do-dogumika, 'asa takikula 'o kuasa gee 'ai Dea wokulano ngoioka. 'Ona 'asa takisuloko yapareta 'o nyawa-nyawa 'o duniaka. De 'ona 'asa yopareta 'ikua-kuata de yakitorouoka 'o nyawa-nyawa 'o duniaka gee yomalawa-lawani ma Jo'oungu ma Dutuka matero kawimoi 'o boso tonaka wapooteke.

²⁷ (2:26)

²⁸ De ngoi 'asa takikula 'o ngoma 'o koruku ma ngale tosidumutu 'ato 'ona ge'ena yalaku-laku 'o dorou.

²⁹ Ngini de nia ngaukoka so tanu nio'isenika 'okia naga gee 'o Ngomasa 'Itebi-tebini 'ingose 'o jamati 'isinoimika!'"

Wahyu

Video Wahyu 2

Ikuti Kami:

KONTAK | PARTISIPASI | DONASI