Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 “Suratkon ma bani malekat ni kuria Epesus: On do hata ni na manjolom bintang na pitu bani tangan siamun-Ni, anjaha na mardalan-dalan i tongah-tongah ni parsuluhan na pitu in:
2 Hubotoh do sagala horjamu pakon paruntolonmu ampa hasabaronmu, anjaha na so tarpataron-taron ham halak parjahat. Iuji ham do na mangkatahon, apostel sidea, hape sedo na tongon; parladung do sidea jumpah ham.
3 Marsabar ni uhur do ham, manaron do ham halani goran-Ku, anjaha seng marnaloja ham.
4 Tapi adong do pangkurangi ni uhurhu dompak ham, ai ma, ʻItadingkon ham do holong ni uhurmu na bani mungkahni ondi.ʼ
5 Ingat ma, hunja ham madabuh, paubah ham ma uhurmu, anjaha horjahon ma horjamu songon na bani mungkahni! Anggo lang, roh ma Ahu hu bamu, Hupadaoh ma parsuluhanmu in humbani iananni, anggo lang ipaubah ham uhurmu.
6 Tapi on adong do bamu, ʻIhagigihon ham do pambahenan ni halak Nikolai. Ahu pe huhagigihon do ai.ʼ
7 Itangihon na marpinggol ma na hinatahon ni Tonduy in hubani kuria in, ʻNa monang in do bereon-Ku mangan humbani hayu hagoluhan, na i Paradeiso ni Naibata.ʼ”
8 “Suratkon ma bani malekat ni kuria Simirna: On do hata ni na Parlobei pakon na Parpudi, na dob matei anjaha na dob mulak manggoluh:
9 Hubotoh do hamarsikonmu pakon hasombuhonmu, tapi na bayak do ham, ampa parpahiri ni halak na mangkatahon Jahudi sidea, hape seng tongon, tapi tumpuan ni sibolis do.
10 Ulang habiarhon sagala sitaronon, na sihol roh bamu. Tonggor ma, dabuhon ni sibolis ma atap piga nasiam hubagas tutupan, ase iuji nasiam anjaha marsik ma nasiam sapuluh ari dokahni. Sai bujur ma ham ronsi matei, dob ai berehonon-Ku ma bamu sortali hagoluhan ai!
11 Sagala na marpinggol itangihon ma na hinatahon ni Tonduy in bani kuria in. Na monang in seng anjai mahua ia bahenon ni hamatean na paduahon in.”
12 “Suratkon ma bani malekat ni kuria Pergamon: On do hata ni na manjolom podang sidua mata na marot ai:
13 Hubotoh do, ija ham marianan, ai ma dohor bani hotak ni sibolis in. Marsijoloman do ham bani goran-Ku, seng iparnalang ham haporsayaonmu Bangku, age sanggah panorang ni si Antipas, saksing-Ku hatengeran ni uhur-Hu, na dob ibunuh i lobei nasiam bani ianan ni sibolis in.
14 Tapi adong do otik pangkurangi ni uhur-Hu dompak ham, adong do deba nasiam na mangihutkon podah ni si Bileam, na mangajari si Balas mambahen jarot bani halak Israel, gabe ipangan sidea na ginalangkon bani sisombah-sombahon anjaha manriah-riahi.
15 Sonai homa, adong do deba nasiam na mangihutkon pangajaran ni halak Nikolai.
16 Paubah ham ma uhurmu! Anggo lang, podas ma Ahu roh, marmunsuh dompak sidea marhitei podang ni pamangan-Ku.
17 Sagala na marpinggol itangihon ma na hinatahon ni Tonduy in bani kuria in. Bani na monang in ma bereon-Ku manna na ponop in, anjaha bereon-Ku ma bani batu putih ampa goran na baru, na tarsurat bani batu ai, na so binotoh ni atap ise sobali na manjalosi.”
18 “Suratkon ma bani malekat ni kuria Tiatira: On do hata ni Anak ni Naibata, na marmata songon gara ni apuy anjaha nahei-Ni songon tombaga:
19 Hubotoh do sagala horjamu pakon holong ni uhurmu pakon haporsayaonmu pakon pansarihonmu pakon hasabaronmu ampa pambahenanmu na parpudi on, na bueinan humbani na parlobei ai.
20 Tapi adong do pangkurangi ni uhur-Hu dompak ham, ipaturut ham do si Isebel, naboru ai, na mangkatahon nabi ia, gabe iajari anjaha ipakahou do juakjuak-Ku, ase manriah-riahi sidea anjaha ipangan galangan, na ginalangkon bani sisombah-sombahon.
21 Domma Hubere panorang bani, ase ipaubah uhurni, tapi seng ra ia paubahkon uhur humbani panriah-riahonni ai.
22 Tonggor ma, bahenon-Ku ma ia boritan i atas podomanni, anjaha hasomanni marbangkis ai dabuhon-Ku do hu hamarsikon banggal, anggo lang ipaubah sidea uhurni manadingkon horjani ai.
23 Anjaha dakdanak ni sidea bois do bahenon-Ku matei, ase ibotoh ganup kuria in, paboa Ahu do sipareksa piah-piah pakon atei-atei, anjaha Hubalaskon bani ganup nasiam romban hubani horjani bei.
24 Tapi bani nasiam na legan ai i Tiatira, na so mangirikkon pangajaran ai, anjaha na so mambotoh rusia ni setan na bagas-bagas ai, songon na hinatahon ni sidea, Huhatahon ma bani nasiam, seng be tampeihonon-Ku siporsanon na legan bani nasiam.
25 Tapi, aha na dong bani nasiam, jolom nasiam ma ai poltik, ronsi roh Ahu.
26 Bani na monang in pakon bani na mangkorjahon horjang-Ku das hu ujung, bereon-Ku do kuasa bani, manrajai bangsa parbegu.
27 Parmahanonni ma sidea marhitei tungkot bosi anjaha rosakonni do sidea songon hudon tanoh, songon Ahu na dob manjalo kuasa in humbani Bapang-Ku,
28 anjaha berehonon-Ku do hubani bintang buhasiang.
29 Sagala na marpinggol itangihon ma na hinatahon ni Tonduy in bani kuria in.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA