Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 “Efesusna jemaat na malaikatre homo nda wanen mae moloukonde: Nda a niyae findelau mehine beere Na me meube reufine ikileuboke nane merau oro bele isehere naeyele rambun mehine bee emasra mokaikoke u nolo u kaisa orole Kiyaelera:
2 Reyae isaeyeubokale foi yoni-yoni nane merau Raei kaliare mayae elaekei sele mokaube. Beko hubawaunge hororebe, Raei a elalere na hibi-hibi rabo haleimeyaubene, u mekai beko bele yore mayae ewaeisi. Nane merau Yesusle abu ako yae elate yore mayae umali hubaumikoke bae, naei ame-amere baete abe hubayaeukoke.
3 Raei Ro aerene beko hubawaunge hororebe, ma kena beko ebei nebeibe kena yae herawaube na hibi-hibi Raei a elelere hila rabo haleimeyaube.
4 Mayae nebei me u foi mokaube hororebe, Reyae mare ane hayaemale, na beme fomena kena buhae hewaufe ma haeungehoke.
5 Nebeinye u bene foi yae nekayengko, na bere Rare kena buhae hewaufe walira na wauwau felebe mayae balekaube. Uwa olomombombe mo bembombe, na beme fomena mokowaube foi yoni-yoni benen mokombe. Mai uwa olomoiboi Reyae wamale hului omokoinya, Reyae mai bokore merele, oro bele isehere naeyele rambun hebele anuwaufa ufenende.
6 Nebeibe mayae nda me u foi mokaubere Reyae kena kale nda niyae: Nikolausre hakainye ro miyae naei u mekai beko yoni-yoni mokatere Reyae ikele kamaele mbai, mayae ikele kaumi.
7 Nda a boraube ro miyae, Allahle Roh yae jemaat-jemaatre weumi huluinye ma wali nou hembo! Hila rabo bekore mokounge elaere melennehande ro miyaere Reyae waeremihinde walire yeumile o ha Allahle heke einya hebele ani enayanende.
8 “Jemaat Smirna na malaikatre homo nda ma yae moloukonde: Nda a niyae Hubalo Mandolera nane merau hereke nebeibe benen aunguke Kiyaelera:
9 Reyae isaeyeubokale mayae beko na bune-bune hubaimeyaunge nane merau hun ban wai ban yaeuboke. Nebeibe naeinya hesele Allahle isaei hebaende mayae hun bele wai bele! Holo mbai nauware Yahudi ro miyae yae na ame-ame elate, erabae na hele walobo yunde ei molainyele holona yo. Mai ro fere mokonayembombere a beko mahi-mahi yae huwatere Raeisaei.
10 Beko yoni-yonira hubannele naeise buhae ohokoijae. Eren, walobo yun mae umalire hubanensimbe naeise, mokonnebonde mai u nolo u kaisa ro miyae holo mbai kawane ahemmikonde. Ya me bee mo beko hubannekombe. Raei ufembe a huluinye mo nekemembe enserembombena, wali hena bona bele me buhaere isembe.
11 Nda a boraube ro miyae, Allahle Roh yae jemaat-jemaatre weumi a huluinye ma wali nou hembo! Hila rabo bekore mokounge elaere melennehande ro miyae here roko bee nendo na beko enainyehubandere eisubayeikoi.
12 “Pergamusna jemaat na malaikatre homo nda wanen mae moloukonde: Nda a niyae ramiyaeli henen reufira reufira halaeikokere mere ikileuboke Kiyaelera:
13 Mayae nekaube anuwau Reyae isaeyeubokale. Walobo yun kendan wameran nekele yone nekaube. Nebeibe Raei rore bumane kaeuboke nekaube. Nane merau, Antipas, Raei wanale a huluinye isaeiwoumi kiyae mai yone, walobo yun neuboke anuwaunge, mai ijoko bene haiboke hee erewaube hororebe, mai hila rabo Rare kusei mahei ban halewaube.
14 Nebeibe nda u mekai Reyae kenare okoi ma namman mokaube: mai u nolo u kainya hiwa yo Beliam kelewoumi u mekai suluinye hakaikoke mokate. ((Yahudi yobe naei kamahe naei nekewate heene, Israel ro miyae wali nalenaibondere nda a yae yobammile naeise, nda Beliam mae Barakre keleungekoke. Naei ame-ame kelewoumi walora Israel ro miyae nda me u beko mokowate: walobore eise molonainyele na raman anewate nane merau yoko kaeimae kowate.))
15 Nane merau mai nolona hiwa Nikolauslena are hakaikoke holona yo naei a usaeise me bobo hele ikilainyekoke mokate.
16 Nebei aerene mai uwa olomombo! Nebei u mekai eharaiboinya, na heki ban mo Reyae mai bokore merele, Raei euwa na ramiyaeli yae nebei yore merensabelembe.
17 Nda a boraube ro miyae, Allahle Roh yae jemaat-jemaatre weumi a huluinye ma wali nou hembo! Hila rabo bekore mokounge elaere melennehande ro miyaere feu manna nunna honate bele na ro nemere molaikoke ruka keleumon bele Reyae isemikonde. Nebei ro neme hi yae ha yae isaeyeiboi, yaronaikonde yo yae mo naeisaei.
18 “Tiatirana jemaat na malaikatre homo nda wanen mae moloukonde: Nda a niyae Allahle Kelulena, Na ijoko i bolo-bolo wanen, Noro perunggu yolo-yolo wanen.
19 Mai naeise nda rambunde Reyae isaeyeubokale: kalia yoni-yoni mokaube naei, kena buhae u buhae haeube naei, Rare hila rabo halaeufe naei, beko hubawaunge hororebe Raei a elalere hila rabo haleimeyaube naei, na bena kalia mokowaubera nda hee emekai bele mokaube naei.
20 Nebeibe nda u mekai Reyae kenare okoi ma namman mokaube: Miyae mbai na ro Izebel nauware Allahle yendo kayaalo yae ame-ame bembe kiyaere mayae waeungehike Raei ro miyaere nibi beko keleumi. Neyae ame-ame yae ro miyae ikelewoumi, yoko kaeimae konate nane merau hoime bahere eise molonainyele na raman yaronate anenate.
21 Reyae nare mon ikanale u mekai beko mokelera uwa olomombonde, nebeibe neyae ahi.
22 Eren, beko hubanaimilere mokoungehake ijongku honoi mbai ranne a waelin-waelinne haisekonde. Nangkele yoko kaeimae mbainye katera uwa olomoiboinya, nebei miyae nane merau nebei u mekaise hakainyekoke mokate yo bele hekelerekonde ehee bukulu weijei kaeiboi ban enainyehubande.
23 Nebei miyaele kelu omi horekonde. Nebeisa jemaat yoni-yoni isaeinyate Reyae ro miyae naei u bene wa bene na kena u ei bele ereyale Kiyae nane merau mai me u mokaube huluinye Reyae berensombe.
24 Nebeibe, mayae jemaat Tiatira yona hiwa yo nebei u mekaise ehakoikoi omokoi yo bele walobo yun yae elele isaei hebaende isaeyeikoi yo belere Reyae mare ehee bukulu eyei.
25 Nda fenbe mare riyamale, wali nibi foi isaeyaeubokere me bobo ikilennekombe nekemembe Reyae merele heene.
26 Hila rabo bekore mokounge elaere melennehande nane merau Raei kena foise mokonaisele kaliane mokonayende na wali huba enainyemokongkonde ro miyaere, Reyae nebei yore nda kani kelana nekate yo yoni-yoni me mokoi-mokoi elae nare eremikinyende.
27 Allahle homofaene Raei naeise nda a molaikoke, ‘Neyae ro miyaere mehukun besi yae me mokommile, hele helai a waelinne hakeiboyate wanen mae hakembonde nuhu nahu inyaibonde.’
28 Nane merau na hibi-hibi hakaise yo findelau yahei isemikonde.
29 Nda a boraube ro miyae, Allahle Roh yae jemaat-jemaatre weumi a huluinye ma wali nou hembo.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA