Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali yako etu, tempo i Yesu pasi anaguruNya mosu ri kota Yerusalem, sira liu mandoo nja’u kampu Betpage pasi Betania ri pu’u nTongku Saitun. Betpage pasi Betania etu tamo longko yako ri Yerusalem, wali i Yesu mampotuunaka resi dua mba’a anaguruNya,
2 to’oNya, “Intamo njo’u kampu to uyu rata etu. Tempo komi rata nja’u ria, komi mansaka damangkita ana ngkeledai to rataka. Ana ngkeledai etu tawa re’e tau mampolea. Wali lede yau taka ngkeledai etu pei keni mai.
3 Pei ane re’e tau mampotanaka, ‘Maka pei komi dua mangkeni keledai etu?’ to’oka tau etu, ‘I Pue rani mangampake, pei upu sire Ia damampawolili muni.’” Etu semo patuu i Yesu resi tau dua etu.
4 Wali anaguru dua mba’a etu yau. Pasi tempo sira rata nja’u kampu etu, sira mangarata ana ngkeledai rataka ri tango nu wombo ri wii njaya. Wali sira mangalede yau takanya.
5 Tempo sira mangalede yau takanya etu re’e bara sawei mba’a tau to makore nja’u ria, tau etu mangkita. Sira mampotanaka, “Maka pei komi dua mangalede yau taka nu ana ngkeledai etu?”
6 Wali tau dua etu manganto’oka sira gombo i Yesu, to’onya, “I Pue rani mangampake, pei upu sire Ia damampawolili muni.” Wali tau etu ojo mangabiaka sira yau.
7 Wali sira dua mangkenika i Yesu ana ngkeledai etu. Tempo sira rata muni resi i Yesu, sira mangalandasika yau bengo ngkeledai juba nsira. Panewa i Yesu matunda ri wawo nu juba etu. Wali yako etu sira polasimo ndeku Yerusalem.
8 Wali tempo sira polas etu, boros kojo tau mampago sira. Tau boros etu sangga’a to mangkambaraka juba nsira ri jaya, panewa sangga’a to mangoko ira to ewa ira nu wai pei mamposaka seja ri jaya. Ewa wetu naika nsira mangangalis jaya apa manga’angga i Yesu, apa ewa see ada nsira to Yahudi ane rata tau to bae angganya.
9 Wali tau boros to njo’u ruyu rataka tau to ri purinya sira sakaboo, sira manganto’o, “Tau si’i ma’i napokau i mPue! Wali Barong Ia!
10 Barong Ia to ma’i damawali Makole mangabolos i Makole Daud, wiyaa ngkita tempo owi! Ia ma’i napokau i mPue. Barong i Pue Allah anu to bae kojo kuasaNya!”
11 Wali yako etu, i Yesu pasi yunuNya ratamo ri kota Yerusalem. Wali sira masua ri raya ngkota etu panewa i Yesu yau masua ri tongonata banua i mPue Allah. Tempo Ia masua etu Ia mangalo’a samparia anu to re’e ri raya banua etu. Panewa roo see Ia mayoko sindara-ndara pei anaguruNya sampuyu pei dua yau lo’u kampu Betania apa rao damawurimo. Wali sira yore la’u ria.
12 Wali yako etu ojo kaeonya rao, i Yesu pasi anaguruNya sira mayoko muni yako la’u Betania, damawolili muni ndeku Yerusalem. Ri raya mpalinja nsira etu i Yesu mangepe moro kompoNya.
13 Wali tempo Ia moro etu, yako longkowa Ia mangkita kaju ara ri wii njaya, kaju etu marombo iranya see naka Ia yau mangampago apa ane kaju ara to marombo iranya ewa wetu, masipato re’emo sangkodi wuanya. Pei rata ri awe ngkaju etu Ia mangkita kaju etu tare kojo wuanya, ojo iranya semo apa tawa rata temponya mawua.
14 Wali see naka i Yesu manganto’oka kaju ara etu, “Yako tempo si’i, tau tamo damangkoni wo’u wuamu.” Wali tempo i Yesu manganto’o gombo etu, anaguruNya mangandonge seja.
15 Wali yako etu, i Yesu pasi anaguruNya polas yako ri kaju ara etu, panewa rata muni ri Yerusalem. Ojo karata nsira etu i Yesu yau masua wo’u ri tongonata banua i mPue Allah. Tempo Ia masua etu Ia mangkita tau to mampobalu binatang pasi to yusayusanya to danapake ntau mangika pampue resi i Pue Allah. Wali sira mampobalu nja’u tongonata banua etu, pei sira ojo mangantipu tau to rata. Wali tempo i Yesu mangkita etu Ia mula mangarubak yau samparia tau to mabalu pasi Ia mangarubak seja tau to mangoli yako ri tongonata etu. Panewa roo see Ia mampukampukanaka yau meja ntau to mangabolos doi pasi mampukampukanaka yau seja bangku ntau to mampobalu tagou.
16 Pasi Ia taa mangabiaka tau mangkeni ngayangayanya liu ri tongonata banua i mPue Allah etu.
17 Wali Ia mampotundeka tau to nja’u ria, Ia manganto’o, “Re’e gombo i mPue Allah to ratulis ri raya ntuntuNya, gomboNya etu manganto’o, ‘BanuangKu darato’oka banua danapokai-kai ntau samparia bansa.’ Ewa see to nato’o i mPue Allah, pei komi room mangampake yau banua si’i mawali tampa nto panipu.” Etu semo to nato’o i Yesu mampotundeka tau nja’u tongonata banua i mPue Allah.
18 Wali re’e kepala-kepala nto pampue pasi tau to mampoguru porenta i Musa, sira mangandonge mangkonong palaong etu. Pasi sira mangansani samparia tau boros ipu rayanya mangandonge anu to napotundeka i Yesu sira. Wali see naka kepala-kepala nto pampue pasi yununya etu, sira meka rayanya mampobuuka tau boros etu bara tamo damangalulu sira, jamo damangaluluka yau i Yesu. See naka sira mangaliwu jaya mampopate yau Ia.
19 Wali ojo kawenginya rao, i Yesu pasi anaguruNya sira mayoko muni yako ri kota Yerusalem.
20 Wali yako etu ojo kaeonya wo’u rao i Yesu pasi anaguruNya sira mawolili muni ndeku Yerusalem. Ri raya mpalinja nsira etu, sira liu muni ri awe ngkaju ara to natanaa i Yesu etu. Sira mangkita kaju etu mangau yau pasi kalenya.
21 Wali i Petrus mangendo muni gombo i Yesu mampogomboka kaju etu, wali ia manganto’oka i Yesu, “Pa’a Guru, lo’a! Kaju ara to natanaa ngKomi etu mangau yaumo.”
22 Wali i Yesu manganto’oka anaguruNya, “Aya i Pue Allah.
23 Apa Aku manganto’oka komi, kamonsonya i sema-sema to monso pu’u mangaya pei taa bata-bata raya, nempo ia manganto’oka tongku, ‘Palimba pei kapuka lo’u raya ntasi,’ palaong etu damawali seja.
24 Wali see naka Aku manganto’oka komi, nempo kesaa to nuporapika resi i Pue Allah tempo komi makai-kai resi Ia, ane komi monso pu’u mangaya, komi damangarata anu to nuporapika ngkomi etu.
25 Pei tempo komi makore damakai-kai resi i Pue Allah, tempo etu ane komi mangendo sala nsa’e resi komi, lapa sala nsa’e etu. Apa ane komi mangalapa sala nsa’e resi komi, ane ewa see Pa’a ngkomi to ndate saruga damangalapa seja sala ngkomi.
26 Pei ane komi taa mangalapa sala nsa’e, Pa’a ngkomi to ndate saruga taa seja damangalapa sala ngkomi.”
27 Wali yako etu i Yesu pasi anaguruNya rata muni nda’a Yerusalem. Roo see i Yesu yau wo’u ri banua i mPue Allah, panewa Ia malinja-linja nja’u tongonatanya. Tempo Ia malinja etu ma’i bara sawei mba’a kepala-kepala nto pampue pasi tau to mampoguru porenta i Musa pasi tau tu’a nto Yahudi, sira ma’i resi i Yesu.
28 Sira mampotanaka resi Ia, sira manganto’o, “Yako imbare pangarata ngKorom kuasa mangika palaong to nuika ngKorom? Bara sema mangawaika Korom kuasa mangika palaong to etu?”
29 Wali i Yesu manganto’o, “Aku re’e seja samba’a pampotanaka to Aku damampotanaka resi komi. Ane komi mangansono pampotanakangKu etu, panewa Aku damanganto’oka komi i sema mangawaika Aku kuasa mangika palaong to etu.
30 Si’i semo pampotanaka. Bara sema nangawaika i Yohanes kuasa mangabaptis tau, bara i Pue Allah, bara to lino?”
31 Wali ojo pangandonge nsira pampotanaka i Yesu etu, sira masipotanaka samba’a pei samba’a, sira manganto’o, “Wimba dataika mangansono, apa ane kita damanganto’o yako resi i Pue Allah nangawaika i Yohanes kuasa, i Yesu damanganto’o wo’u, ‘Maka pei komi manasa ngkomi i Pue Allah nangawaika ia kuasa pei komi taa mangaya anu to ia mampotundeka?’
32 Pei gete, kesaa damawali ane kita manganto’o to lino semo to nangawaika ia kuasanya?” Wali naka pei sira taa rani manganto’o kuasa i Yohanes yako resi to lino apa sira mampobuuka masipato sira mampokeka kaja’a ndaya ntau boros, apa ane ewa pampobuuka ntau boros i Yohanes monso pu’u nawaika i mPue Allah kuasa mawali to pantuntu tuntuNya.
33 Wali kepala-kepala nto pampue pasi yununya, sira manganto’oka i Yesu, “Kami taa kunsani yako sema pangarata i Yohanes kuasanya.” Panewa roo see i Yesu manganto’oka sira, “Ane komi taa manganto’oka Aku, Aku taa seja damanganto’oka komi yako sema Aku mangarata kuasa mangika palaong to inikangKu etu.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA