Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kareb ideh malé macing bawang Yerusalim, muneng ku Baitpagi idi Baitani, luk déi' luun Pegkung Saitun, idi Yésus nengecuk dueh burur anak sekola'Neh,
2 kebalaNeh nedidueh, "Amé' medueh semuet bang bawang luk pa atun medueh. Kareb medueh macing déi', medueh miak papu' sebuleng anak keladai luk inabet, idi seburur lemulun nateh netudo luun katedneh. Do' neka abetneh, idi nguit neneh amé' Negku.
3 Kudeng seburur lemulun ngitun nemedueh, 'Anunké punneh medueh nganau' kudeng ini?' idi do' medueh mala, 'Tuhan pian ku ieh,' idi petacu ieh miak ngecuk nemedueh nguit neneh."
4 Idi didueh iné' idi nepapu' sebuleng anak keladai luk inabet munung tanga' iring dalan, idi didueh neneka abetneh.
5 Idi lemulun luk tuped déi' nepebala nedidueh, "Ngudeh medueh muit anak keladai ineh?"
6 Idi didueh nengor baladeh maya' kudeng luk bila Yésus. Idi ideh nenima' nedidueh nalan.
7 Idi didueh nenguit anak keladai ineh amé' matun Yésus, idi ideh nenganau' ayungdeh luunneh; idi ideh nenganau' Yésus tudo luun ketedneh.
8 Idi mula' lemulun nemalad ayungdeh luun dalan, idi inan teh lun baken luk nenganau' don-don luk ilapdeh déi' bang kabun luun dalan.
9 Idi lemulun luk nalan pa atun idi luk pa muci pana' nengitang, keburi'deh, "Ngubur Allah! Samal kuanNeh luk macing bang ngadan Tuhan!
10 Samal kuan imet tepun tau Daud luk nacing ini! Ubur kuan Allah!"
11 Yésus iné' Yerusalim, idi nesemuet bang Ruma' Allah. Ieh nenier amung-amung luk libut-libutNeh. Ngaceku aco pangeh malem, Ieh iné' Baitani dengan pulu' dueh anak sekola'Neh.
12 Kenebpa, kareb ideh remuat rat déi' Baitani idi Yésus melau.
13 Rat mado Ieh nenier aceh lawa gita' luk inan don, idi Ieh iné' nier kudeng inan bua'neh. Iamo' kareb Ieh iné' matun ineh, idi Ieh nenier na bua'neh, iamo' don sebuleng, ngaceku nateh nacing karebneh gita' ineh kebua'.
14 Idi kebala Yésus neneh, "Aleg seburur lemulun pana' kuman bua' rat namu rat nekini macing ruked-ruked peh." Idi anak-anak sekola'Neh neninger bala ini.
15 Kareb ideh nacing déi' Yerusalim, Yésus nesemuet bang Ruma' Allah, idi Ieh nengimun masut lemulun luk masui idi melih déi' bang Ruma' Allah ineh. Ieh nengelukeb meja lemulun luk ngelibal usin, idi kerusi lemulun luk masui sukur pana'.
16 Idi teh na Ieh nemaré seburur lemulun pana' nguit anun-anun binaweh lemaba Ruma' Allah ineh.
17 Idi Ieh nemada' nelun mula' kebalaNeh, "Pangeh inayud, 'Ruma'Ku miak tetanen ruma' luk inan sembayang kuan amung-amung pupu.' Iamo' muyuh pangeh nenganau' neneh mangun ku lubang lun mano."
18 Idi bala ineh nekali' imam-imam rayeh idi guru-guru Ukum idi ideh nenakap dalan sikal ngaté Neneh; ngaceku ideh matot Neneh, ngaceku amung lun mula' pana' mawa ku bada'Neh ineh.
19 Kareb malem aco Yésus nenalan rat bawang Yerusalim dengan anak-anak sekola'Neh.
20 Kareb ideh lemaba pekak uka-uka, idi ideh nekali' lawa gita' ineh pangeh netekering macing luun uatneh.
21 Idi Pétrus nengerawé ratnan ini, idi ieh nepebala kuanNeh, "O Guru, siruh, lawa gita' luk kidimanMu pangeh naté."
22 Idi kebala Yésus nedeh, "Manu inan Allah.
23 Ngerawé do'-do', idé-idé luk pebala kuan pegkung ini, 'Do' iko mubuh idi talan bang abpa' rayeh!' dengan na merapang bang niatneh iamo' manu idi balaneh ineh pana' mangun, kali' rungen luk kudeng ineh mangun kuanneh.
24 Ngaceku ineh Ui pebala nemuyuh: Amung-amung luk pian pituen muyuh bang sembayang, do' muyuh manu idi muyuh pangeh nengalap ineh, pad amung luk pituen muyuh miak barén nemuyuh.
25 Kareb muyuh tuped sembayang, maré do' kuan lemulun luk inan muyuh megateh, pad Taman muyuh luk déi' surga miak maré do' ratnan sala' muyuh.
26 Kudeng muyuh na maré do', idi Taman muyuh luk déi' surga pana' na miak maré do' ratnan sala muyuh."
27 Ideh nacing déi' Yerusalim teh. Idi kareb Yésus nenalan bang Ruma' Allah, imam-imam rayeh idi guru-guru Ukum dengan lun rayeh-rayeh teh iné' Neneh,
28 idi nengitun Neneh, "Dengan lalud anunké Iko nganau' kekamen ini? Idéké luk nemaré lalud ini kuanMu, pad Iko nganau' ineh?"
29 Idi Yésus nengor baladeh, "Ui pana' sikal ngitun nemuyuh, idi kudeng muyuh ngor balaKu, idi Ui teh miak mada' nemuyuh dengan lalud idéké Ui nganau' kekamen ini.
30 Rereb Yahya ineh, punneh rat surgaké, kian ratnan lemulun lek?"
31 Idi ideh pegayam seburur dengan seburur, keburi'deh, "Kudeng tau mala, 'Rat surga,' Ieh miak pebala, 'Ngudehké muyuh na manu neneh?'
32 Idi kudeng tau mala, 'Ratnan lemulun—'"; (Ideh matot nelun mula', ngaceku lun mula' nengerawé Yahya ineh seburur nabi.)
33 Idi ideh nengor bala Yésus, kebaladeh, "Kai na kali'." Idi Yésus nepebala nedeh, "Ui pana' na sikal mala kuan muyuh dengan lalud idéké Ui nganau' kekamen ini."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA