Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sesampun rapet Yerusalem, ie pade rauh lẽq kote Betpage dait Betania lẽq tembẽrẽng Bukit Zaitun. Deside Isa ngemanikang due pengiring-Ne lampaq bejulu

² siq pesen: "Silaq lumbar ojok kampung saq araq lẽq julunde nike. Waktu side pade tame kampung nike, side pade gen ndait sopoq bagal saq masih odaq kenyeke tegeteng, saq ndẽq uwah tetunggang siq dengan. Lekaq getenganne terus jauq ojok deriki."

³ Dait lamun araq dengan beketuan lẽq side pade, "Kembẽq side lekaq getengan bagal nike?" Badaqang bahwe, "Junjungan Saq Mulie merluang bagal nike dait Ie gen becat nulakang ojok deriki."

⁴ Kedue pengiring Deside Isa nike lumbar, terus daitne sopoq bagal saq masih odaq kenyeke tegeteng lẽq lawang sopoq balẽ lẽq sedin rurung. Beterus ie pade lekaq getengan bagal nike.

⁵ Dengan-dengan saq nganjeng lẽq derike beketuan lẽq ie pade, "Napi maksutde lekaq getengan bagal nike?"

⁶ Ie pade bejawab maraq saq sampun temanikang siq Deside Isa tipaq ie pade. Make dengan-dengan nike ngalurang ie pade jauq bagal nike.

⁷ Sesampun dateng lẽq Deside Isa, bongkor bagal nike ie pade lamak siq jubah ie pade, beterus Deside Isa taẽk lẽq atasne.

⁸ Luwẽq dengan kelat jubah ie pade lẽq rurung, araq ẽndah saq noloq pẽmpang-pẽmpang lolo kayuq saq ie pade bait lẽman lendang.

⁹ Dengan-dengan saq lampaq lẽq julu dait dengan-dengan saq nurut mudi, selapuqne bekuih-kuih, "Hosana! Teberkahin Ie saq rauh dalem pesẽngan Tuhan!

¹⁰ Teberkahin kerajaan saq gen rauh -- Kerajaan Daud leluhurte! Hosana lẽq taoq saq maheagung!"

¹¹ Ahirne Deside Isa rauh lẽq Yerusalem, beterus tame ojok Gedẽng Allah. Lẽq derike Ie perhatiang sekelining-Ne. Laguq lantaran gen serep jelo, Ie terus berangkat ojok Betania bareng kance kedue olas pengiring-Ne.

¹² Lẽq jemaqne, sewaktu ie pade kenyeke lampaq sugul lẽman Betania, Deside Isa beridap seduk.

¹³ Lẽman jaoq Ie cingakin sopoq lolo are saq benes daunne. Jari Ie lumbar ojok lolo are nike sang araq buaqne. Laguq sesampun Ie rauh lẽq lolo nike, Ie nẽnten ndait napi-napi, kecuali daun-daun doang, sẽngaq waktu nike ndẽqman musim buaq are.

¹⁴ Beterus Deside Isa bemanik lẽq lolo are nike, "Mulai mangkin ndẽq araq sopoq dengan juaq saq gen kelorang buaq lẽman side malik!" Pengiring-pengiring Deside Isa dengah ucapan nike.

¹⁵ Beterus ie pade rauh lẽq Yerusalem, dait Deside Isa tame malik ojok Gedẽng Allah. Lẽq derike Ie mulai sediq selapuq dengan saq kenyeke bedagang dait belanje lẽq derike. Ie balik belah mẽje-mẽje dengan saq tekadu taoq tukah kẽpẽng, dait bangku-bangku saq tekadu bedagang kedit dare.

¹⁶ Dait Ie nẽnten ngijinang dengan jauq barang-barang liwat lelẽah Gedẽng Allah.

¹⁷ Beterus Deside Isa ngajahang dengan-dengan lẽq derike. Ie bemanik, "Lẽq dalem Kitab Suci tetulis maraq niki: Allah bemanik, 'Gedẽng Tiang gen tesebut gedẽng do'e umaq selapuq bangse.' Laguq side pade jariang ie taoqne bekumpul dengan-dengan jahat!"

¹⁸ Imam-imam kepale dait ahli-ahli Taurat pireng ucapan nike. Beterus ie pade mulai boyaq care jari nyematẽq Deside Isa. Ie pade takut lẽq Deside Isa, sẽngaq selapuq dengan takjub dengah pengajahan-Ne.

¹⁹ Lẽq waktu serep jelo, Deside Isa dait pengiring-pengiring-Ne bilin kote nike.

²⁰ Lẽmaq kelẽmaqne, waktu Deside Isa dait pengiring-pengiring-Ne liwat lẽq lolo are nike, ie pade serioq lolo nike sampun matẽ jangke akah-akahne.

²¹ Terus Petrus inget siq peristiwe sejelo sendẽqmanne. Make Petrus matur lẽq Deside Isa, "Paq Guru, silaq cingakin! Lolo are saq Pelungguh kutuk nike sampun matẽ!"

²² Jawab Deside Isa, "Percaye tipaq Allah.

²³ Tiang badaq side pade: Setetune sai juaq saq bebase tipaq gunung niki, 'Kerungkahan dait ngalih ojok segare!' make hal nike gen telaksane lẽq side pade; asal side pade percaye dait ndẽq bimbang, bahwe napi saq side pade ucapang nike gen tetu-tetu telaksane.

²⁴ Keranaq nike Tiang badaq side pade: Napi juaq saq side pade tunas dalem do'e, pade percaye bahwe Allah sampun ngicanin side pade napi saq side pade tunas, make side pade gen nerimaq ie.

²⁵ Dait lamun side pade bedo'e, laguq atẽnde ndẽq seneng lẽq sopoq dengan, ampunin dengan nike juluq, adẽq Bapa side lẽq sorge ẽndah ngampunin dose-dosende.

²⁶ [Lamun side pade ndẽq ngampunin dengan lain, Bapa side lẽq sorge ẽndah ndẽq gen ngampunin dose-dosende.]"

²⁷ Ie pade tulak malik ojok Yerusalem. Dait lẽq waktu Deside Isa bemargi lẽq lelẽah Gedẽng Allah, imam-imam kepale, ahli-ahli Taurat dait pemimpin-pemimpin Yahudi parek tipaq Ie.

²⁸ Ie pade metakẽn, "Atas dasar napi Pelungguh ngelaksaneang selapuqne niki? Sai saq aturin Pelungguh kuase nike?"

²⁹ Jawab Deside Isa, "Tiang ẽndah mẽlẽ beketuan lẽq side pade. Silaq jawab dait Tiang gen badaq side pade siq kuase sai Tiang ngelaksaneang hal-hal niki.

³⁰ Yahya baptis dengan siq kuase sai? Kuase Allah atao manusie?"

³¹ Beterus imam-imam kepale dait pemimpin-pemimpin Yahudi mulai berunding lẽq antare ie pade. Ie pade bebase, "Lamun ite jawab, 'Siq kuase Allah,' Ie gen bemanik, 'Lamun maraq nike kembẽq side pade ndẽq percaye lẽq Yahya?'

³² Laguq segerah ite jawab, 'Siq kuase manusie.'" Sẽngaq ie pade takut lẽq dengan luwẽq, lantaran selapuq dengan anggep Yahya nabi.

³³ Jari, jawab ie pade, "Mindah tiang." Beterus Deside Isa bemanik lẽq ie pade, "Lamun maraq nike Tiang ẽndah ndẽq badaq side pade siq kuase sai Tiang ngelaksaneang selapuqne niki."

Markus

Video Markus 11

Ikuti Kami:

KONTAK | PARTISIPASI | DONASI