Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Masanggiden soang Yerusalem, i sire nahumpạ e su soam Betfage ringangu Betania, su lengeh'u Wukid'u Zaitun. Sene piạ duang katau wọu murit'E nirolohẹ̌ kal᷊imona kahian Mawu Yesus.
2 "Dakọko sol᷊ong soa su těngone pai e," angkuěngu Mawu Yesus si rẹ̌dua. "Masuẹ̌ e su soa pai ene, i rua sarung makasilo anạ u kalide mạl᷊aikị, kụ bẹ̌dang tawẹ taumata simẹ̌sake. Lukạe kalide ene kụ bawạ e ramahi.
3 Kụ kereu piạ u makiwal᷊o si rua, kawe unụe i rua něluka ene ute paul᷊ịko, 'Mawu e měgěgausẹ̌ e, ringangu saụbe lighạ isul᷊e.'"
4 Murit'u Mawu Yesus darua e natamaịe, kụ nakahombangke anạ u kalide mạl᷊aikị su tukad'u wal᷊e su wiwih'u ral᷊eng. Tangu nilukạen dẹ̌dua kalide e.
5 I sire apam mạhundarisị sene nakiwal᷊ọ e si rẹ̌dua, "Oi, kai měkẹ̌kapura i rua e? Unụe kai měluka anạ u kalide ene?"
6 Tangu i rẹ̌dua e simimbang kerẹewe nitanatang Mawu Yesus si rẹ̌dua. Kutẹu i sire napakawalan dẹ̌dua nempẹ̌bawa kalide ene.
7 Nasongọe su anum Mawu Yesus, tal᷊ětugu kalide e niěmpaheng u l᷊akụ i sire, mase Mawu Yesus e simakẹ e su wowone.
8 Mal᷊awọ taumata němpamilạ u l᷊akụ i sire su ral᷊eng piạ l᷊ai sěnggạ němpangěmpah'u hakonda nitěntong sire wọu kěhu.
9 I sire apam mạhundal᷊eng su horone ringangu i sire samuri, kěbị e měmpẹ̌gẹ̌gio, "Pẹ̌dalo Mawu Ruata! Kaal᷊amatengko i Sie kụ diměnta su arengu Mawu.
10 Apasombọko kararatun'E sarung -- kararatun Daud i upung i kitẹ! Pẹ̌dalo Mawu Ruata su Marange!"
11 Pangěnsueěnge Mawu Yesus narěntạe su Yerusalem, ku simuẹ̌ su Wal᷊em Mawu. Nal᷊ikụ bue i Sie sene mạmepidẹ̌ kụkakělla. Kai ual᷊ingu seng bawěllo, ute i Sie wọu ene simẹ̌bangke nakoạ sol᷊ong Betania ringangkewen sire mapul᷊o dua murit'E
12 Sěngkariọěllone piạ i sire nahunsěbang bọu Betania, Mawu Yesus kai nahutung.
13 Bọu marau i Sie nakasilo kalung ara daunge mal᷊ahěbung. Tangu i Sie himaungke kalu ene tadeạu měmanda měnsang piạ buane. Kai sarạeng nahumpạ su pungene, i Sie tawe nakahombang apa-apa, kětạewen manga raukalune, u su tempo ene bal᷊inewe tempone pẹ̌buaěngu ara.
14 Mase Mawu Yesus něhengetangke su kalung ara ene, "Manětạ orasẹ̌ ini tawẹu sarang sěngkatau makateěng buanu e!" Manga murit'u Mawu Yesus e nakaringihẹ̌ hengetang ene.
15 Bọu e i sire nahumpạ su Yerusalem kụ Mawu Yesus simuẹ̌ kapia su Wal᷊em Mawu e. Sene i Sie nanětạe nanokol᷊u kěbị taumata apan mạhumbal᷊ụ dingangu měbẹ̌bawělli su tampạ ene. I Sie namal᷊intuị manga medan měnanul᷊e roitẹ̌ dingangu manga kakaianengu mẹ̌bawal᷊ụ paluma.
16 Kụ tawẹu sarang sěngkatau niapakawala mẹ̌bawa manga apal᷊iwụ kụ iparal᷊engu rěllah'u Wal᷊em Mawu e.
17 Bọu e Mawu Yesus naněntiro si sirẹewe apan sene. I Sie něhengetang, "Su ral᷊ungu Winohẹ Susi e mạbawohẹ kere ini: Mawu Ruata něhengetang, 'Bal᷊e-Ku e sarung isẹ̌bạ bal᷊e pẹ̌kakal᷊iomanengang u patikụ umatẹ̌.' Kai kahiang kamene kawe nikoạ liangu tahapěhampasẹ̌!"
18 Manga imang těmbonange ringangu manga mananěntirong agama e nakaringihẹ̌ bawera ene. Tangu i sire nanětạe němpědeạ dal᷊engu tadeạu měmate Mawu Yesus. I sire matakụ i Sie, batụu kěbị taumata e mạngaku ringangu měmpẹ̌dẹ̌dalon těntiron'E.
19 Maranịeng mahěbi Mawu Yesus dingangu manga murit'E naněntangu soa ene.
20 Ene sěngkariọěllone mal᷊uka-l᷊ukadẹ̌ piạ i sire simahe wọu kalung ara ene, i sire kimakělla kalu ene kai seng nahěgu sarang hamụe.
21 Tangu i Petrus nakatahěndungke apan seng nariadi kahěbi e. Tangu i Petrus něberạe su Mawu Yesus, "Tuang Guru, kěnangko kakělla! Ara kụ nianeng Tuang e seng nahěgu!"
22 Mawu Yesus simimbang, "Pěmpangimangke su Mawu Ruata.
23 Kahěnga-hěngang i kamene makawera su wul᷊udẹ̌ ěndaị e, 'Kasapuạko kụ kateledẹ̌ su l᷊audẹ̌!' tangu hal᷊ẹ̌ ene sarung masěhụ baug'i kamene; asal᷊eweng i kamene tawe ghumoẹ̌, dingangu i kamene mangimang u apang iwẹ̌berang kamene e těnga-těngadẹ̌ mariadi.
24 Ual᷊ingu ene pakatahěndungeko ini e: Kereu i kamene mẹ̌kal᷊iomaneng dingangu měgẹ̌gausẹ̌ apa-apa, pěmpangimangke u, Mawu Ruata e seng těbe nangonggọ u apang gẹ̌gausang i kamene, tangu i kamene sarung makahombang.
25 Kụ kereu i kamene mẹ̌kal᷊iomaneng, kai naung i kamene kawe piạ une su sěngkatau, ute ampungeko sal᷊an tau ěndaị e kal᷊imona, tadeạu i Amangu su Sorga e mal᷊aing mangampung kal᷊awọu rosanu.
26 [Kereu i kamene kawe tawe mangampung taumata wal᷊ine ute i Amang su Sorga e mal᷊aing tawe mangampung kal᷊awọu rosanu e.]"
27 I sire nẹ̌sul᷊e kapia sol᷊ong Yerusalem. Kutẹu piạ e Mawu Yesus mědẹ̌daral᷊eng su ral᷊ungu Wal᷊em Mawu e, manga imang těmbonange, manga mananěntirong agama ringangu manga pangahạ u Yahudi e himaungke si Sie.
28 I sire němpẹ̌kiwal᷊o, "Kai apa wanggile i Kau nakapẹ̌koạ patikụ ini e? Kai i sai nangoro si Kau e?"
29 Mawu Yesus simimbang, "Iạ e mal᷊aing mapulu makiwal᷊o si kamene. Simbahẹ̌ko, kụ Iạ e sarung maul᷊ị si kamene, u kai ual᷊ingu kawasan sai kụ Iạ e mẹ̌kẹ̌koạ kěbị-kěbị e.
30 I Yohanes měnẹ̌nahani e kai munaran sai tangu? Mawu Ruata arau taumata?"
31 Mase manga imang těmbonange ringangu manga mananěmbonang u Yahudi e nanětạ e němpẹ̌dal᷊ahintau l᷊awọ i sire. I sire němpẹ̌bera, "Kamageng i kitẹ e mẹ̌bera, 'Kawe ual᷊ing u kawasan Duata,' Sie sarung mẹ̌berau, 'Kawe unụe i kamene tawe měmpangimang si Yohanes?'
32 Kaiso mawěhạ l᷊ai kụ mẹ̌bera u, 'Ringangu kawasan taumata.' "Waugu i sire matakụ u taumata lawọ ual᷊ingu i sire kěbị nangěnna u i Yohanes kai sěngkatau nabi.
33 Tangu i sire simimbangke, "I kami wẹ̌ga wue." Mase Mawu Yesus něhengetang si sire, "Kamageng kerene, Iạ e tawe maul᷊ị si kamene měnsang dingangu kawasan sai Iạ e makapẹ̌koạ kěbị ene."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA