Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ge'enaka de 'o Yesus woma'aiki ge'enaka, de wotagi 'o Yudea ma daeraaka de 'o Yordan ma 'akere ma songonasa. 'O nyawa manga gudai yaino 'o Yesus widolomuoli. Ge'enaka de 'o Yesus wodotokoli 'isoka biasau.

² 'O Farisioka yamuruo naga mita yoboano 'o Yesus wi sala yosinonu-nonu. 'Ona kayongosekau, "Moteke nanga 'agama ma do-dotoko, kaidadi 'o nyawa manga wekata yaoluku?"

³ 'O Yesus wosango, "'O Musa 'okia wosuloko nginika?"

⁴ De 'ona yosango, "'O Musa wongose kaidadi 'o nyawa manga wekata yaoluku, 'itilai 'isira 'o gangoluku ma surati yolefokasi."

⁵ 'O Yesus wongose 'onaka, "'O Musa wolefo koge'ena, sababu to ngini 'ania singina 'i'opini.

⁶ Duga ka ma gurue gee ma Jo'oungu ma Dutu 'o nyawa wosidadi, ge'ena 'o nauru de 'o ngeweka.

⁷ Ge'enau so 'o nauru 'asa yamada manga 'esa de manga dea de yomarimoi de manga wekata.

⁸ So yamididi go'ona yodadi ka moiou, koyamididiwau.

⁹ Ma ngale ge'ena 'okia naga ma Jo'oungu ma Dutu wosikatoomuokau, ngone 'o nyawa koidadiwa posikati-tingaka!"

¹⁰ Gee 'o Yesus de wi do-domoteke yowosangika 'o woaka, de 'awi do-domoteke yodasano 'o Yesusika ma hali ge'ena.

¹¹ 'O Yesus wongose 'onaka, "Nagu'una wi wekata waoluoka de womodoka de 'o ngeweka mimoioli, 'una wosongou 'awi wekata ma siraka.

¹² Koge'enali mita mimoi mi rokata maoluoka de momodoka de wimoioli, muna ge'ena mosongou."

¹³ Ma moi ge'ena, 'o nyawa manga ngowa-ngowaka yaki'asa 'o Yesusino, la waki'ao de wakisibarakati. Duga 'awi do-domoteke yakingamo 'onaka!

¹⁴ 'O Yesus wakimake wi do-domoteke yodiai koge'ena, de wakingamo kawongosekau, "Niakimadaka 'o ngowaka go'ona yaino ngoino. 'Uwa koniakisidabiwa, sababu 'o nyawa gee yadawongo ma Jo'oungu ma Dutu 'awi pareta 'isoka 'o ngowa-ngowaka, 'ona yodadi ma Jo'oungu ma Dutu 'awi kawasa.

¹⁵ Niosi-singina! 'O nyawa salingou yoboa ma Jo'oungu ma Dutuka 'isoka 'o ngowaka moi ne'ena; nako ko'uwa, 'ona koyodadiwa ma Jo'oungu ma Dutu 'awi kawasa."

¹⁶ 'O Yesus koge'ena wongoseka de wakikooono de wi giama wakikokidatami, de wakisibarakati.

¹⁷ Gee 'o Yesus 'awi do-dagi wadowangoli de 'o nyawa wimoi waino 'o Yesusino wido-doowarino. 'O nyawa gu'una wotalibukuku wosuba 'o Yesusika, de wosano, "'Aba Guru, 'ani singina 'isure-sure, ngoi salingou 'okia tadiai la tamake 'o 'ahu ma dutu 'ika-kakali?"

¹⁸ 'O Yesus wosano, "'Ido'oa so nongose ngoi 'ai singina 'isure? Komoiwa manga singina 'isure, duga ka ma Jo'oungu ma Dutu womatengo.

¹⁹ Ngona ma sirete ma rai nanakokau ma Jo'oungu ma Dutu 'awi besesongo koneda: ''Uwa noto'oma, 'uwa nosongou, 'uwa notosiki, 'uwa nodadi 'o sakisii ma ngeluku, 'uwa noforiki, de nakihoromati 'ani 'esa de ni dea.'"

²⁰ De 'una wongosekau, "'Aba Guru, 'o besesongo 'iodumu ge'ena tamotekokau katomadogu'urunosi."

²¹ 'O Yesus widi-diriidi ma de wi singina 'o nyawa gu'una so kawongosekau, "Duga 'o ngai moiosi konadiaiwasi. Notagi 'ani harataa nakokiwukunu; de ma pipi 'o nyawa yosusa-susaka nosibula, de ngona 'asa namake 'o harataa 'o sorogaaka. Ge'ena 'ipasa 'asa naino la noimoteke ngoi."

²² Wokaya-kaya gu'una wo'isenoka 'o Yesus koge'ena wongose, de 'awi singina 'i'ogu, so woma'aiki ge'enaka dau 'ena 'awi singina 'isusaku sababu 'una wokaya ma sala.

²³ So 'o Yesus wakidi-diriidi 'awi do-domoteika de kawongosekau 'onaka, "'Ena ma susaka 'o nyawa yokaya-kaya yodadi ma Jo'oungu ma Dutu 'awi 'umati!"

²⁴ 'O Yesus 'awi do-domoteke yoherangi yo'isenoka 'o Yesus 'awi demo ge'ena. Duga wakisidaduroli, wongose 'onaka, "'Ai ngowa-ngowaka, ma goungu 'isusa 'o nyawa yodadi ma Jo'oungu ma Dutu 'awi 'umati.

²⁵ 'Ifoloi 'igapangi 'o 'onta ngai moi 'iwosanga 'o daiti ma sukonika, positero de 'o nyawa yokaya-kaya moi yowosanga ma Jo'oungu ma Dutu 'awi paretaka."

²⁶ 'O Yesus 'awi demo ge'ena 'awi do-domoteke yoherangi, sigado yomakadongose moi de moi, "Nako koge'ena, de dua nago'ona 'idadi yamake 'o laha?"

²⁷ 'O Yesus wakidi-diriidi de kawongosekau, "Nako ka 'o nyawa manga manarama ge'ena koidadiwa, ma nako de ma Jo'oungu ma Dutu, ge'ena kaidadi. Sababu 'una ge'ena 'iodumu kaidadi."

²⁸ Ge'enaka de 'o Petrus kawongosekau, "Minimake ngomi ne'ena mia kia sonaa 'iodumu miamadakau ma ngale minimoteke ngona 'Aba."

²⁹ 'O Yesus wongose, "Tinisidemo, nago'ona manga woa yamada, bolo manga riaka dodoto, bolo manga 'esa biranga, bolo manga 'esa de manga dea, bolo manga ngowa-ngowaka bolo manga bairi sababu ngoi de 'o Habari ma Owa ma Jo'oungu ma Dutuno,

³⁰ 'ona 'asa yamake 'ifoloi 'ikudai ma 'orasi ne'ena. Manga woa 'asa 'idadi yamake sigado 'o ratusu moi, bolo manga riaka dodoto, manga 'esa biranga, manga 'esa, manga ngowa-ngowaka, manga bairi de 'o sangisara mita. De ma 'orasi ma du'uruoka dua 'ona yamake 'o 'ahu 'ika-kakali.

³¹ Ma 'o nyawa manga gudai gee ma 'orasi ne'ena yakimakeka 'o nyawa ma amoko, dua yodadi yotingoono, de gee ma 'orasi ne'ena yakimakeka yoti-tingoono, dua 'asa yodadi amoko."

³² 'O Yesus de 'awi do-domoteke manga do-dagi ma sigoronaka yosikaie 'o Yerusalemude. 'O Yesus wosira-sira, de 'awi do-domoteke yoodumu yamao manga singina 'itubuso. De 'o nyawa-nyawa gee yotu-tu'uru manga dudunino mita yamao yakimodongo. Ge'enaka de 'o Yesus waki'asokoli 'awi do-domoteke so yomatingaika ka 'onaka de wakisidemo 'okia naga gee dua 'idadi 'unaka.

³³ 'O Yesus wongose 'onaka, "Bika niosigisene! Ngone ne'ena posikaie 'o Yerusalemude. Dua kadaku paie de ngoi 'o Nyawa ma Ngowaka 'isisarakani 'o 'imam ma sae-saekika de 'o 'agamaka yodoto-dotoika. Ngoi 'asa 'ihukumu 'iso-songene, ge'enaka de 'idukulali ko 'o Yahudiwa ma nyawaka.

³⁴ 'Ona 'asa 'isisasaru, 'ikibiti, 'isikisaa, de 'isidele 'o salipoka. Ma 'o wange sa'angeka de tomomikokau."

³⁵ Ge'enaka de 'o Yakobus de 'o Yohanes 'o Zebedeus wi ngowa-ngowaka yaino 'o Yesusino de kayongosekau, "'Aba Guru, tanu 'o kianikia moi nodiaiosi ngomino!"

³⁶ De 'o Yesus wosano, "'Okia niomau todiai nginika?"

³⁷ 'Ona yosango, "Ngomi miomau miogogere 'ani giniraoka de ni gubalioka 'Aba, dua gee ma 'orasi nokoana de ni kumati."

³⁸ Ge'enaka de 'o Yesus wongose 'onaka, "Ngini konianakowa 'okia nioga'asoko. Nia'akunoka? nia'okere gee dua ngoi ta'okere-'okere? Nia'akunoka? niamoku 'o susa de 'o sangisara gee dua ngoi tamoku?"

³⁹ 'Ona yosango, "Mia'akunu!" So 'o Yesus kawongosekauoli 'onaka, "Ma goungu ngini 'asa nia'okere 'o sawokoka, gee dua ngoi ta'okere. De 'asa niamoku 'o susa de 'o sangisara 'isoka ngoioli.

⁴⁰ Duga nago'ona 'asa yogogere 'ai giniraoka bolo 'ai gubalioka, ge'ena ko to ngoiwa 'ai kuasa tositatapu. Ma Jo'oungu ma Dutu wositatapu nago'ona 'asa yogogere ge'enaka."

⁴¹ 'O do-domoteke yamogiooko go'ona yogi'isene ge'ena de yongamo 'o Yakobus de 'o Yohanesika.

⁴² So 'o Yesus wakitoomuno 'ona yoodumu de kawongosekau 'onaka, "Ngini nianakokau yopa-pareta gee kowinako-nakowa ma Jo'oungu ma Dutu, manga kawasa yakido-doko so manga 'ahu 'isangisara. De 'o nyawa yola-laagomo yakisihaga manga kawasaka.

⁴³ Ma ngini koidadiwa koge'ena. Nago'ona yomau yoamoko nginioka ne'ena, salingou yole-leleani nginika.

⁴⁴ De nago'ona yomau yodaduie naga nginioka, salingou yodadi 'o ro-riwo 'o nyawa 'iodumika.

⁴⁵ Sababu ngoi 'o Nyawa ma Ngowaka mita toboano ma ngale koileleaniwa. Ngoi taino ma ngale toleleani de tokula 'ai 'ahu ma ngale takituusu 'o nyawa manga gudai."

⁴⁶ 'Ona ya'adonika 'o Yerikhoka. So gee 'o Yesus de 'awi do-domoteke de mita 'o nyawa yoku-kudai go'ona yamada ma soana ge'ena de worau-rau wimoi wogogerie 'o ngekomo ma gagaroka womaga-ga'asoko, 'awi ronga 'o Bartimeus, 'o Timeus 'awi ngowaka.

⁴⁷ Gee wo'isene 'ato naga ge'enano wotoaka ge'ena 'o Yesus 'o Nazaretino, de 'una womasigasoko, "Ee Yesus 'o Dautu 'awi Ngowaka, tanu ngoi noidoranosi!"

⁴⁸ De 'o nyawa yoku-kudai wiringamo kayongosekau, "Nomaogoro!" Ma 'una kawodaamoko monga womapoaka, "Ee Dautu wi Ngowaka, sioko noidoranosi!"

⁴⁹ Ge'enaka de 'o Yesus womaogoro de kawongosekau, "Tagi wini'asoko." So 'ona wi'asoko 'o nyawa worau-rau gu'una. 'Ona kayongosekau, "Nomarii-riidi, to ngona 'ani duga yaowa sigado 'o Yesus woni'asoko, so noma'okodeu!"

⁵⁰ Ge'enaka de worau-rau gu'una 'awi baju ma kawosiwakoku de wosijai-jai woma'oko so wotagi 'o Yesusika.

⁵¹ 'O Yesus wosano 'o nyawa worau-rauka, "'Okia nomau todiai ngonaka?" De 'una wosango, "'Aba Guru, ngoi tomau tomasimake!"

⁵² Kage'ena de 'o Yesus wongose, "Notagiou, sababu nongaku so ge'enau nisilaha." Ka ma 'orasi ge'ena de worau-rau womasimakekau de wotagi 'o Yesus wimoteke 'o ngekomika.

Markus

Video Markus 10

Ikuti Kami:

KONTAK | PARTISIPASI | DONASI