Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Beterus Deside Isa bilin taoq nike, dait lumbar ojok daẽrah Yudea dait daẽrah lẽq itoqan Kokoq Yordan. Dengan luwẽq dateng malik bekerimpun lẽq sekelining Deside Isa. Dait maraq biase Deside Isa ngajah ie pade.

² Beterus araq dengan-dengan Parisi dateng ẽndah jari boyaq kesalaqan adẽqne bau nyalahang Deside Isa, ie pade metakẽn, "Napi kanggo sopoq semame sẽang seninene?"

³ Jawab Deside Isa, "Musa ngicanin prẽntah napi lẽq side pade?"

⁴ "Musa ngijinang dengan sẽang seninene asal nulis surat sẽang bejulu," jawab ie pade.

⁵ "Musa nulis prẽntah nike sẽngaq side pade sengke gati teajah," manik Deside Isa lẽq ie pade.

⁶ "Laguq lẽq penembẽqne, sewaktu Allah cipteang manusie, Allah bemanik bahwe 'Allah jariang ie pade mame dait nine.

⁷ Keranaq nike dengan mame gen bilin inaq amaqne dait besopoq kance seninene,

⁸ make deduaqne jari sopoq.' Jari ie pade ndẽqne due malik, laguq sopoq.

⁹ Keranaq nike, napi saq sampun tepesopoq siq Allah, ndẽq kanggo tesẽang siq manusie!"

¹⁰ Sesampun ie pade tame gedẽng, pengiring-pengiring Deside Isa metakẽn lẽq Deside Isa mengenai hal nike.

¹¹ Deside Isa bemanik lẽq ie pade, "Sai-sai sẽang seninene, terus merariq malik kance dengan nine lain, dengan nike idup dalem perzinahan tipaq seninene saq penembẽq nike.

¹² Maraq nike ẽndah dengan nine saq sẽang semamene terus merariq kance dengan mame saq lain, ie ẽndah bezinah."

¹³ Araq dengan-dengan jauq kanak-kanak kodẽk ojok Deside Isa adẽq Ie jamah ie pade. Laguq pengiring-pengiring Deside Isa siliq dengan-dengan nike.

¹⁴ Cingakin hal nike, Deside Isa menggah terus bemanik tipaq pengiring-pengiring-Ne, "Alurang kanak-kanak nike dateng ojok Tiang! Ndaq balaq ie pade, sẽngaq dengan-dengan saq maraq niki saq dowẽang Kerajaan Allah.

¹⁵ Tiang badaq side! Setetune sai-sai saq ndẽq nerimaq Kerajaan Allah maraq sopoq kanak kodẽq, ie ndẽq gen tame ojok dalemne."

¹⁶ Sesampun bemanik maraq nike, Deside Isa kapong kanak-kanak nike, beterus noloq gading-Ne lẽq atas ie pade dait ngicanin ie pade berkah.

¹⁷ Sewaktu Deside Isa ngelanjutang malik pemargian-Ne, araq dengan pelai tipaq Ie. Dengan nike sujut lẽq arepan Deside Isa dait metakẽn, "Paq Guru saq solah, napi saq harus tiang piaq adẽq bau nerimaq idup sejati dait kekel?"

¹⁸ Jawab Deside Isa, "Kembẽq side paran Tiang solah? Ndẽq araq saq solah kecuali Allah mẽsaq.

¹⁹ Side sampun nenaoq prẽntah-prẽntah Allah, 'Ndaq nyematẽq; ndaq bezinah; ndaq memaling; ndaq jari saksi duste; ndaq nipu; pade hormatin amaq dait inaqde.'"

²⁰ "Bapaq Guru," atur dengan nike, "selapuq prẽntah nike sampun tiang turut lẽman bajang."

²¹ Deside Isa perhatiang dengan nike siq penoq kasih terus bemanik, "Masih sopoq hal malik saq side perluang. Lumbar dait jual selapuq dowẽnde; sedekahang kẽpẽngne tipaq dengan-dengan miskin, dait side gen mauq harte lẽq sorge. Sesampun nike dateng turut Tiang."

²² Sesampun dengah manik Deside Isa maraq nike, dengan nike kecẽwe, terus bilin taoq nike siq susah angenne, sẽngaq ie sugih gati.

²³ Beterus Deside Isa perhatiang pengiring-pengiring-Ne, dait bemanik lẽq ie pade, "Sengke gati dengan sugih tame Kerajaan Allah!"

²⁴ Pengiring-pengiring-Ne bengaq dengah manik Deside Isa nike. Laguq Deside Isa bemanik malik, "Bije-bije Tiang, mule sengke tame Kerajaan Allah!

²⁵ Molahan sopoq onte tame loang jarum ketimbang dengan sugih tame ojok dalem Kerajaan Allah."

²⁶ Ucapan-ucapan Deside Isa nike miaq pengiring-pengiring-Ne bengaq sehingge ie pade beketuan sopoq kance saq lain, "Lamun maraq nike, sai saq bau selamet?"

²⁷ Deside Isa merhatiang ie pade, terus bemanik, "Bagi manusie nike mustahil, laguq nẽnten mustahil bagi Allah; selapuqne mungkin bagi Allah."

²⁸ Beterus Petrus matur, "Tiang pade sampun bilin selapuq-lapuqne jari ngiring Pelungguh."

²⁹ Manik Deside Isa, "Tiang badaq side: setetune sebilang dengan saq sampun bilin balẽne, semeton nine atao mame, inaq amaqne, atao bije-bijene, atao kebon bangketne lantaran Tiang dait lantaran Kabar Solah lẽman Allah,

³⁰ dengan nike gen mauq luwẽqan lẽq waktu mangkin niki. Ie gen mauq balẽ, semeton nine, semeton mame, inaq, bije dait kebon bangket satus kali luwẽqan -- timaq tebarengin siq macem-macem siksaqan. Dait ẽraq lẽq jaman saq gen dateng, ie gen nerimaq idup saq sejati dait kekel.

³¹ Laguq luwẽq dengan saq mangkin niki jari penembẽq gen Jari saq penutuq, dait luwẽq saq mangkin niki jari penutuq gen jari saq penembẽq."

³² Deside Isa dait pengiring-pengiring-Ne kenyeke dalem pemargian ojok Yerusalem. Deside Isa bemargi lẽq arep, dait selapuq pengiring-pengiring-Ne kuatir. Dait dengan-dengan saq turut ie pade lẽman mudi ẽndah merase takut. Beterus Deside Isa ngemanikang malik pengiring-pengiring-Ne secare husus dait nyampẽang lẽq ie pade napi saq gen telaksane laun lẽq diriq-Ne.

³³ Manik Deside Isa, "Pade dengahang. Mangkin ite lumbar ojok Yerusalem. Lẽq derike Bije Manusie gen teserahang tipaq imam-imam kepale dait ahli-ahli Taurat. Ie gen tehukum matẽ, beterus teserahang tipaq bangse-bangse saq ndẽq kenal kance Allah.

³⁴ Ie pade gen ngoloq-oloq Ie, nijuh Ie, nyiksaq Ie, dait nyematẽq Ie. Laguq sesampun telu jelo, Ie gen idup malik."

³⁵ Beterus Yakub dait Yahya, bije-bije Zebedeus parek tipaq Deside Isa, ie pade matur, "Bapaq Guru, araq sopoq hal saq tiang pade melẽt Pelungguh laksaneang lẽq tiang pade."

³⁶ Manik Deside Isa, "Napi saq side pade mẽlẽ adẽq Tiang piaq lẽq side?"

³⁷ Jawab ie pade, "Tiang pade melẽt tokol lẽq kiri dait kanan Pelungguh, lamun Pelungguh melinggih lẽq dalem kemuliean Pelungguh."

³⁸ "Side pade ndẽq nenaoq napi saq side pade tunas," manik Deside Isa lẽq ie pade, "Napi side pade sanggup nginem cawan penderitean saq harus Tiang inem dait tebaptis kadu baptisan saq harus Tiang terimaq?"

³⁹ "Sanggup," jawab ie pade. Beterus Deside Isa bemanik malik tipaq ie pade, "Mule, side pade gen nginem cawan penderitean saq harus Tiang inem dait tebaptis kadu baptisan saq harus Tiang terimaq.

⁴⁰ Laguq mengenai sai saq gen tokol lẽq kanan atao kiri Tiang, nike ndẽqne Tiang saq berhak nentuang, sẽngaq taoq nike gen teicanin tipaq dengan-dengan saq tetentuang siq Allah jari tokol lẽq derike."

⁴¹ Sewaktu sepulu pengiring Deside Isa saq lainne dengah hal nike, ie pade sili lẽq Yakub dait Yahya.

⁴² Laguq Deside Isa ngemanikang ie pade terus bemanik: "Side pade nenaoq, bahwe ie pade saq tesebut pemrẽntah bangse-bangse mrẽntah rakyatne kadu ime besi, dait pembelẽq-pembelẽqne ngelampaqang kuasene secare keras tipaq ie pade.

⁴³ Laguq side ndẽq kanggo maraq nike! Sebalikne, dengan saq mẽlẽ jari belẽq lẽq antare side pade, ie harus jari pelayande.

⁴⁴ Dait dengan saq mẽlẽ jari saq penembẽq lẽq antare side pade, ie harus jari hambe tipaq selapuqne.

⁴⁵ Sẽngaq Bije Manusie ẽndah rauh nẽnten jari telayanin laguq Ie rauh jari ngelayanin, dait nyerahang nyawe-Ne jari tebusan tipaq dengan luwẽq."

⁴⁶ Ie pade rauh lẽq Yeriko. Waktu Deside Isa kance pengiring-pengiring-Ne dait dengan luwẽq bilin kote nike, araq dengan bute kenyeke tokol nunas-nunas lẽq sedin rurung. Aranne Bartimeus, bije Timeus.

⁴⁷ Sewaktu ie dengah bahwe saq kenyeke liwat lẽq derike Deside Isa dengan Nazaret, ie bekuih, "Deside Isa, Keturunan Daud, periakang tiang!"

⁴⁸ Ie tesiliq siq dengan luwẽq dait tesuruq tedoq. Laguq sayan keras ie bekuih, "Keturunan Daud periakang tiang!"

⁴⁹ Beterus Deside Isa mentelah terus bemanik, "Empoh ie." Beterus ie pade ngempoh dengan bute nike. Ie pade bebase lẽq ie, "Tenang! Side temanikang siq Deside Isa, silaq ures!"

⁵⁰ Dengan bute nike langsung saut jubahne, terus becat-becat nganjeng dait lumbar ojok Deside Isa.

⁵¹ Deside Isa beketuan lẽq dengan bute nike, "Napi saq side melẽtang adẽq Tiang piaq lẽq side?" Jawab dengan bute nike, "Paq Guru, tiang melẽt tao nyerioq."

⁵² Beterus manik Deside Isa, "Silaq Lumbar! Imande sampun miaq side selah." Langsung waktu nike ẽndah dengan nike tao nyerioq. Beterus ie ngiring Deside Isa lẽq pemargian-Ne.

Markus

Video Markus 10

Ikuti Kami:

KONTAK | PARTISIPASI | DONASI