Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kak raduni Isa ninggalko rang udi, rik mik di daerah Yudea rik daerah seberang Way Yordan. Ulun lamon ratong lagi bekerumun di sekeliling Isa. Rik injuk biasa Isa ngajar tian.

² Pira-pira ulun Farisi ratong juga untuk ngejebak Isa. Tian betanya, "Menurut hukum agama neram, api ngasi ulun nyeraiko inggomni?"

³ Isa ngejawab, "Musa ngeni perintah api jama keti?"

⁴ "Musa ngizinko jelma nyeraiko inggomni, asal nulis pai surat cerai," jawab tian.

⁵ "Musa nulis perintah udi mani keti payah nihan diajar," ani Isa jama tian.

⁶ "Kidang pada permulaanni, pada waktu Allah ngenyiptako manusia, diucakko bahwa 'Allah ngejadiko tian bakas rik bebai.

⁷ Reno sebabni bakas haga ninggalko emak bakni rik besatu jama inggomni,

⁸ maka tian rua jadi sai.' Jadi, tian lain lagi rua jelma, melainko sai.

⁹ Udi sebabni, api sai radu disatuko ulih Allah, mak ngasi diceraiko ulih manusia!"

¹⁰ Seraduni tian kuruk lamban, jelma-jelma sai nutuk Ia betanya jama Isa tentang hal ano.

¹¹ Isa cawa jama tian, "Sapa sai nyeraiko inggomni raduni kawin jama bebai bareh, ulun udi bezinah tehadap inggomni sai mula-mula udi.

¹² Reno juga bebai sai nyeraiko kajongni raduni kawin jama bakas sai bareh, ia pun bezinah."

¹³ Wat ulun-ulun ngusung sanak-sanak jama Isa in Ia ngejamah rik ngeberkati tian. Kidang jelma-jelma sai nutuk Isa butong jama ulun-ulun udi.

¹⁴ Ngeliak hal seno, Isa butong raduni Ia cawa jama jelma-jelma sai nutuk Ia, "Tagando sanak-sanak udi ratong jama Nyak! Dang ngelarang tian, mani jelma-jelma injuk injido sai jadi anggota umat Allah.

¹⁵ Ingokdo inji! Sapa mak ngehadap injuk sai sanak, mak haga jadi anggota umat Allah."

¹⁶ Radu ngucakko injuk reno, Isa nekap sanak-sanak udi, raduni Ia ngepikko culuk-Ni di atas tian masing-masing rik ngeberkati tian.

¹⁷ Waktu Isa nerusko luot lapah-Ni, sai jelma ratong tegar-tegar jama Isa. Ulun udi sujud di hadapan Isa rik betanya, "Guru sai betik, nyak haga bebuat api in dapok nerima hurik sejati rik kekal?"

¹⁸ "Mengapi niku ngucakko Nyak mebetik?" tanya Isa. "Mak ngedok sai mebetik, selain Allah tenggalan.

¹⁹ Niku radu pandai perintah-perintah Allah, 'Dang ngebunuh, dang bezinah, dang maling, dang besaksi buhung, dang nipu, hormati bak rik emakmu.'"

²⁰ "Bapak Guru," ani ulun udi, "sunyinni perintah ano radu kututuk radu jak ngura."

²¹ Isa ngeliak ulun udi jama sayang raduni cawa, "Tinggal sai hal lagi sai niku perluko. Mikdo jual sunyinni hartamu; keniko duitni jama jelma mejerih, rik niku haga mansa harta di surga. Radu jak seno ratongdo tutuk Nyak."

²² Ngedengi Isa cawa injuk reno, ulun udi kecewa, raduni ninggalko rang udi jama susah hati mani ia batin nihan.

²³ Maka Isa ngeliak jelma-jelma sai nutuk Ia raduni cawa jama tian, "Payah nihan untuk ulun sai mebatin jadi anggota umat Allah!"

²⁴ Jelma-jelma sai nutuk Ia hiran ngedengi cawa Isa udi. Kidang Isa cawa muneh, "Anak-anak-Ku, sangun payah untuk jadi anggota umat Allah!

²⁵ Lebih mudah sai unta kuruk lubang seruk jak sai jelma mebatin kuruk Dunia Ampai Allah."

²⁶ Cawa-cawa Isa udi nyani jelma-jelma sai nutuk Ia hiran, sehingga tian betanya peperda tian, "Kik injuk reno, sapa sai dapok selamat?"

²⁷ Isa ngeliak tian rik ngejawab, "Bagi manusia ano mustahil, kidang mak mustahil bagi Allah; sunyinni mungkin bagi Allah."

²⁸ Raduni Petrus cawa, "Liakdo, sekam radu ninggalko sunyinni untuk nutuk Bapak."

²⁹ Ani Isa, "Percayado: jelma sai radu ninggalko rumah tanggani, atau puarini sai bakas atau bebai, atau emakni, atau bakni, atau anak-anakni, ataupun sabah kebunni demi Nyak rik demi Kabar Betik jak Allah,

³⁰ ulun udi haga nerima lebih lamon waktu tano inji. Ia haga mansa seratus kali lebih lamon lamban, puari bakas, puari bebai, mak, anak-anak, sabah kebun, -- rik siksaan juga. Rik kanah di zaman sai haga ratong, jelma udi haga nerima hurik sejati rik kekal.

³¹ Kidang lamon jelma sai tano inji mula-mula haga jadi sai paling akher rik lamon sai tano inji paling akher haga jadi sai mula-mula."

³² Isa rik jelma-jelma sai nutuk Ia sedang delom lapahni mik Yerusalem. Isa lapah di hadap, rik jelma-jelma sai nutuk Ia cemas sunyinni. Rik jelma-jelma sai nutuk tian jak kudan pun ngerasa merabai. Kak raduni Isa ngurau luot jelma-jelma sai nutuk Ia rik ngeni pandai tian api sai haga tejadi kanah atas diri-Ni.

³³ "Dengiko," cawa-Ni, "ram tano sedang nuju Yerusalem. Di disan Anak Manusia haga diserahko jama imam-imam kepala rik guru-guru agama. Ia haga dihukum mati, kak raduni diserahko jama ulun-ulun lain Yahudi.

³⁴ Tian haga ngulok-ngulokko Ia, ngelui Ia, nyiksa Ia, rik nyalibko Ia. Kidang waktu rani ketelu Ia haga bangkit."

³⁵ Raduni Yakobus rik Yohanes, yakdo anak-anak Zebedeus, ratong jama Isa. "Bapak Guru," ani tian, "wat suatu hal sai sekam mirak Bapak lakuko untuk sekam."

³⁶ "Api sai keti mirak Nyak perbuat bagimu?" tanya Isa.

³⁷ Tian ngejawab, "Sekam mirak mejong di kanan kiri Bapak, kik Bapak bertakhta jama mulia."

³⁸ "Keti mak pandai api sai keti kilu," ani Isa jama tian, "Sanggup kedo keti nginum jak piala penderitaan sai haga Nyak inum rik kuruk mik delom kancah penderitaan sai haga Nyak kuruki?"

³⁹ "Sanggup," jawab tian. Maka Isa cawa lagi jama tian, "Sangun keti haga nginum jak piala penderitaan sai haga Kuinum, rik kuruk mik delom kancah penderitaan sai haga Kukuruki.

⁴⁰ Kidang mengenai sapa sai haga mejong di kanan atau kiri-Ku, udi lain Nyak sai berhak nantuko. Allah sai nantuko sapa-sapa sai haga mejong di rang-rang ano."

⁴¹ Waktu puluh jelma sai nutuk Isa sai barehni ano ngedengi hal udi, tian butong jama Yakobus rik Yohanes.

⁴² Jadi Isa ngurau tian sunyinni, raduni cawa, "Keti pandai bahwa jelma-jelma sai mimpin bangsa sai mak mengenal Allah nindas rakyatni. Rik tukoh-tukoh tian nekan tian.

⁴³ Kidang keti mak ngasi injuk reno! Sebalikni, jelma sai haga jadi balak di hantara keti, haga jadi jelma sai ngebantumu.

⁴⁴ Rik jelma sai haga jadi sai mula-mula di hantara keti, haga jadi jelma sai ngebantu bagi sunyinni.

⁴⁵ Mani Anak Manusia pun mak ratong untuk dilayani. Ia ratong untuk ngelayani rik untuk nyerahko nyawa-Ni untuk ngebebasko lamon jelma."

⁴⁶ Tian sampai di Yerikho. Rik waktu Isa jama jelma-jelma sai nutuk Ia rik ulun lamon ninggalko kota udi, sai jelma buta sedang mejong ngilu-ngilu di pingger renglaya. Gelarni Bartimeus, anakni Timeus.

⁴⁷ Waktu ia ngedengi bahwa sai liwat udi yakdo Isa ulun Nazaret, ia mekik, "Isa, Anak Daud! Kesiando jama nyak!"

⁴⁸ Ia dibutong ulih lamon jelma rik dikayun hema. Kidang ia lebih keras lagi mekik, "Anak Daud, kesiando jama nyak!"

⁴⁹ Maka Isa taru raduni cawa, "Urau pai ia." Jadi tian ngurau ulun buta udi. Tian cawa jama ia, "Tenangdo! Niku diurau Isa, minjak!"

⁵⁰ Ulun buta udi pun nayarko jubahni, raduni geluk-geluk cecok rik mik jama Isa.

⁵¹ "Api sai niku mirak Nyak nyani untuk niku?" tanya Isa jama ia. Ulun buta udi ngejawab, "Pak Guru, nyak mirak ngeliak."

⁵² "Mikdo," ani Isa, "mani niku percaya jama Nyak, niku munyai." Pada saat seno juga ulun udi dapok ngeliak. Raduni ia nutuk Isa di renglaya.

Markus

Video Markus 10

Ikuti Kami:

KONTAK | PARTISIPASI | DONASI