Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Aefa da'õ Irõi nahia andrõ Yesu, numalõ Ia ba danõ Yudea, tanõ yefo Nungo Nidanõ Yoridano. Ato niha sowulo samasui Yesu. Ba Ifahaõ ira si mane si to'õlõ.
2 La'ondrasi gõi Yesu ira Farizai'o ba wanandraw̃aisi Ya'ia. Lasofu khõ-Nia, "Tandraigõ ombakha'õ khõma, hadia tola ifabali ndrongania niha?"
3 Itema li Yesu faoma fanofu gõi. Imane, "Hadia ni'oroi'õ Moze khõmi?"
4 Latema li, "Itehegõ Moze lafabali ndrongara niha asala ibe'e zura wabalisa khõnia."
5 Imane Yesu khõra, "Ibe'e goroisa andrõ Moze bõrõ me tebai nifahaõ ami."
6 "Ba mbõrõta, me Iwõwõi niha Lowalangi, ba law̃a'õ wa, 'Iwõwõi ira Lowalangi, ira matua ba ira alawe.
7 Da'õ mbõrõ wa irõi namania awõ ninania ira matua ba te'osambua'õ ira wo'omonia,
8 ba ha sambua zi darua andrõ.' Tobali tenga sa'ae darua, ha sambua.
9 Da'õ mbõrõ, wa hadia zi no I'orudugõ Lowalangi tebai ifabali niha!"
10 Me no mangawuli ira ba nomo ba lasofu khõ Yesu da'õ ira nifahaõ-Nia.
11 Imane khõra Yesu, "Haniha zamabali dongania ba mangowalu ia ba ndra alawe bõ'õ, ba sohorõ niha andrõ khõ ndrongania si fõfõna.
12 Si manõ gõi ndra alawe samabali fo'omonia aefa da'õ mangowalu ia ba ndra matua bõ'õ, no sohorõ gõi ia."
13 So niha solohe iraono khõ Yesu ena'õ Ifahowu'õ ira. Ba mofõnu ndra nifahaõ Yesu ba niha andrõ.
14 Me I'ila da'õ Yesu, ba mofõnu Ia, ba Imane khõ ndra nifahaõ-Nia, "Mifa'amõi khõ-Gu ndraono andrõ! Bõi mitenaw̃a ira, bõrõ me ya'ira zi tobali ono Mbanua Lowalangi.
15 Mitõngõni! Haniha zi lõ mangondrasi Lowalangi andrõ si mane iraono andre, lõ tobali ia dania ndrotondroto mbanua Lowalangi."
16 Me no aefa Iw̃a'õ zi manõ, Italagui ndraono andrõ Yesu, Itufa tanga-Nia hõgõra ba Ifahowu'õ ira.
17 Me Itohugõ wofanõ Yesu, so samõsa ndra matua si fagohigohi wangondrasi Ya'ia. Mangalulu niha andrõ fõna Yesu, ba isofu, "He Guru si sõkhi, hadia ia zi lõ tola lõ ulau ena'õ utema wa'auri si lõ aetu andrõ?"
18 Isofu Yesu, "Hana wa õw̃a'õ si sõkhi Ndra'o? Lõ hadõi si sõkhi baero Lowalangi.
19 No aboto ba dõdõu goroisa Lowalangi, 'Bõi amunu niha; bõi ohorõ; bõi anagõ; bõi bõbõgõ khõ nawõu zi lõ duhu; bõi falimo; fosumange namau awõ ninau.'"
20 Imane niha andrõ, "He Amagu Guru, no u'o'õ fefu goroisa andrõ i'otarai iraono ndra'o."
21 Ifaigi niha andrõ si fao fa'ahakhõ dõdõ Yesu ba Imane, "Ha tõ sambua tõ zoguna õfalua. Ae'e, amawa fefu zi so khõu, bõlinia be'e ba niha si numana, ba awena õsõndra harato ba zorugo. Aefa da'õ tabu, o'õ Ndra'o."
22 Me irongo niw̃a'õ Yesu andrõ ba maniasa ia, irõi nahia da'õ si fao fa'abu dõdõ bõrõ me no fondrege wa'akayonia.
23 Ifaigi ndra nifahaõ-Nia Yesu ba Imane khõra, "Wa'afõkhõ ba niha si kayo tobali ono mbanua Lowalangi!"
24 Oi ahõli dõdõ ndra nifahaõ ba wamondrongo niw̃a'õ Yesu andrõ. Ba ifuli Iw̃a'õ Yesu, "He Ya'ami iraono-Gu, duhu wa'afõkhõ tobali ono mbanua Lowalangi!
25 Abõlõ aoha ba gondra wanõrõ tõgi lala gõ nifotõi tõgi walõlõw̃a moroi na mõi ba Mbanua si Bohou khõ Lowalangi niha si kayo andrõ."
26 Oi tokea ndra nifahaõ ba niw̃a'õ Yesu andrõ. Faoma lasofu khõ nawõra, lamane "Na simanõ, haniha zi tola te'orifi?"
27 Ifaigi ira Yesu ba Imane, "Ba niha ba tebai, ba lõ si tebai khõ Lowalangi; fefu hadia ia ba oi molala khõ Lowalangi."
28 Imane Fetero, "Faigi atõ, no marõi fefu hadia ia ba wolo'õ Ya'ugõ."
29 Imane Yesu, "Sindruhu da'õ, ba tõngõni da'e: niha sondrõi soroiyomonia, ma talifusõnia ira matua, ma talifusõnia ira alawe, ma inania ba ma amania, ba ma iraononia, ma zui bolo nowinia bõrõ Ndra'o, ba ma bõrõ Duria Somuso Dõdõ andrõ soroi Lowalangi,
30 itema dania zabõlõ oya niha andrõ ba gõtõ andre. Isõndra otu kali wa'oya nomo, talifusõ ira matua, talifusõ ira alawe, ina, iraono ba bolo nowi -- ba famakao gõi. Ba dania ba luo safuria, itema niha andrõ wa'auri si lõ aetu.
31 Ba ato niha ba gõtõ andre, si fõfõna tobali safuria dania ba iada'e safuria tobali si fõfõna."
32 Ba lala we'amõi ba Yeruzalema so Yesu awõ ndra nifahaõ-Nia. Fõna ndra nifahaõ I'iagõ Yesu, ba oi araguragu dõdõ ndra nifahaõ-Nia. Niha sato solo'õ ya'ira moroi furi gõi oi ihawui fa'ata'u. Ifuli Ikaoni ndra nifahaõ-Nia Yesu ba zi lõ niha sato, ba I'ombakha'õ khõra hadia zalua khõ-Nia dania.
33 Imane, "Mifondrondrongo! Hiza, sadõlõ ba Yeruzalema ita iada'e. Ba da'õ, tebe'e ba danga ndra ere sebua awõ zangila amakhoita Nono Niha. La'etu'õ huku famunu khõ-Nia, ba labe'e Ia ba danga niha si tenga niha Yahudi.
34 La'o'aya Ia, ladidiloi, lafakao ba laforõfa. Ba na no aefa tõlu ngaluo, ifuli auri Ia."
35 Mõi Yakobo ba Yohane, ono Zebedai'o khõ Yesu, lamane: "He Ama Samahaõ, so zomasi ndra'aga Õlau khõma ena'õ."
36 Isofu khõra Yesu, "Hadia zomasi ami Ufalua khõmi?"
37 Latema li lamane, "Na no dania dumadao Ndra'ugõ ba dadaoma wa'arazo solakhõmi andrõ, omasiga na Õtehegõ khõma mudadaoga awõ-U, samõsa ba gambõlõ ba samõsa ba gabera."
38 Imane khõra Yesu, "Lõ mi'ila hadia ni'andrõmi. Hadia tola mibadu nõsi mako wamakao andrõ nibadu-Gu dania ba mõi bakha ba mbaho wamakao si mõi Ndra'o?"
39 Lamane, "Tola". Ba ifuli Iw̃a'õ khõra Yesu, "Mibadu sa dania nõsi mako wamakao andrõ nibadu-Gu, ba mõi ami gõi ba mbaho wamakao si mõi Ndra'o.
40 Ba sangahonogõi haniha zi dadao ba gambõlõ ba ba gabera-Gu, ba tenga Ya'o. Lowalangi sa dania zangahonogõi haniha zi dadao ba da'õ."
41 Me larongo da'õ ira nifahaõ Yesu tanõ bõ'õ si dafulu ba mofõnu ira khõ Yakobo awõ khõ Yohane.
42 Ikaoni ira Yesu, Imane khõra, "Mi'ila wa samatõrõ soi si lõ fa'aboto ba dõdõ Lowalangi, lafakao nono mbanuara. Ba salaw̃a khõra zangosawuyu ya'ira.
43 Ba hiza tebai si manõ ami! Niha somasi ebua ba gotaluami, lõ tola lõ'õ tobali ia ngoningonimi.
44 Ba niha somasi ni'ofõnai'õ ba gotaluami, lõ tola lõ'õ tobali ia sawuyumi fefu.
45 Bõrõ me Ono Niha gõi tenga si mõi mangoni. No si mõi enoni ba wanehegõ noso-Nia hõli zato."
46 Larugi Yerikho Yesu awõ ndra nifahaõ-Nia. Ba me larõi mbanua andrõ, awõ niha sato, so samõsa niha sau'a si dadao ba wangandrõngandrõ buala ba zinga lala. Tõinia Batimai'o, ono Dimai'o.
47 Me irongo Itõrõ lala andrõ Yesu, banua Nazareta, ba mu'ao ia imane, "He Yesu, ma'uwu Dawido! Hakhõsi tõdõ ndra'o!"
48 Lategu ia niha, law̃a'õ ena'õ bõi muhedehede ia. Ba i'abõlõgõ we'ao, "He ma'uwu Dawido, hakhõsi tõdõ ndra'o!"
49 Tebato Yesu ba Imane, "Mikaoni ia." Lakaoni niha sau'a andrõ. Lamane khõnia, "Honogõ'õ! No Ikaoni ndra'ugõ Yesu, faoso!"
50 Ifazaumba mbarunia sebua niha sau'a andrõ, i'alio'õ wezizio ba mõi ia khõ Yesu.
51 Isofu khõnia Yesu, "Hadia zomasi'õ Ulau khõu?" Imane niha sau'a andrõ, "He Ama. Omasido u'ila niha."
52 Imane khõnia Yesu, "Ofanõ, no ifadõhõ ndra'ugõ famatimõ andrõ." Ba i'anema'õ i'ila niha. Ba i'o'õ Yesu ba lala.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA