Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lapatao lonteto mao ti Isa lonao ode lipu lo Yudeya wawu ode ngotuwali lo dutula lo Yordan. Tawu ngohuntuwa lonao mayi poli lotitiambu pali-palita to o-Liyo wawu timongoliyo ilajari-Liyo poli debo odelo u biyasaliyo Tiyo hemongajari olimongoliyo.

² Tawu-tawuwala ta o pahamu Parisi lonao mayi olo ohila mohimontala oli Isa. Timongoliyo lohintu ode o-Liyo odiye, ”Moturuti mao hukum lo agama, mowali meyalo dila ta lolai ngota motalaki mao dileliyo?”

³ Ti Isa lolametao ode olimongoliyo odiye, ”Wololo u pilomarenta li nabi Musa ode limongoli?”

⁴ Tameti mongoliyo odiye, ”Ti nabi Musa longohi ijini ode ta lolai ngota motalaki mao dileliyo asali tiyo mohutu mao tuladu talaki ode dileliyo boyito.”

⁵ Lapatao ti Isa loloiya ode olimongoliyo odiye, ”Bo sababu hila limongoli ma odelo totoheto botu, tunggulo ti nabi Musa loluladeyi parenta boyito ode limongoli.

⁶ Bo lonto awwali mayi lo duniya boti dila odito. Woluwo tula-tuladu to kitabi odiye, ’Allahuta'ala lopowali mayi limongoliyo ta lolai wawu tabuwa.

⁷ Sababu uwito, ta lolai ngota ma molola mao oli papaliyo woli mamaliyo wawu mota motituwawu wolo dileliyo,

⁸ sambe timongoliyo dulota mowali batanga tuwawu.’ Odito u tula-tulade to kitabi.” Lapatao ti Isa loloiya odiye, ”Timongoliyo dilalo dulota bo tuwawu.

⁹ Sababu uwito, u pilopotuwawu lo Allahuta'ala keke, dila mao popobuaya.”

¹⁰ Tou ledungga mota ode bele, mongomuri li Isa lohintu poli ode o-Liyo tomimbihu pasali boyito.

¹¹ Loiya li Isa ode olimongoliyo odiye, ”Titalotita ta motalaki mao dileliyo wawu mao monika wolo tabuwa wuwewo, tiyo lojina sababu tiyo dila lodaha hiyalaliyo wolo dileliyo bohuliyo.

¹² Odito olo wonu tabuwa ngota motalaki mao hiyaliyo wawu mao monika wolo ta lolai wuwewo, tiyo olo lojina sababu tiyo dila lodaha hiyalaliyo wolo hiyaliyo bohuliyo.”

¹³ Lapatao woluwo tawu lodelo mayi ode li Isa ta ukekeingo, alihu Tiyo modedetao wawu mongohi barakati ode olimongoliyo. Bo tawu-tawuwala boyito iloyingowa lo mongomuri-Liyo.

¹⁴ Ti Isa loyingo lo'onto mao u odito boyito, uwa-Liyo mao, ”Dila mao diniya timongoliyo wawu hulimao ta ukekeinga boyito monao mayi de ola-U. Sababu ta odelo timongoliyo botiye ta o haku momaso ode Yiladiya lo Allahuta'ala.

¹⁵ Tutuliyotutu polele-U mayi ode olimongoli: Titalotita ta dila mololimo Yiladiya lo Allahuta'ala odelo ta ukekeinga botiye, openu boli wololo tiyo dila mowali momaso ode delomiyo lo Yiladiya boyito.”

¹⁶ Lapatao ta ukekeinga boyito ma ilo'ode-Liyo mota wawu olu'u-Liyo hepilopodutu-Liyo mao to lunggongi mongoliyo ngota-ngota. Ta ukekeinga boyito dilua-Liyo yilohiya-Liyo barakati.

¹⁷ Tou ti Isa luli lopoturusi lo nonao-Liyo, woluwo tawu ngota lonao mayi ode o-Liyo, tete-teteayi lotibonggohu'u to talu-Liyo wawu lohintu odiye, ”Guru, Tingoli tawu mopiyohu, wolo u musi pohutuwo latiya, alihu watiya mo'otapu tutumula kakali?”

¹⁸ Tameti Isa odiye, ”Longola yio hemolanggula ola-U ta mopiyohu? Diyalu ngota mao ta mopiyohu ngopohiya lo Allahuta'ala.

¹⁹ Tantu otawamu nga'amila parenta lo Allahuta'ala u odiye: Dila pohinggi nyawa lo tawu, dila pojina, dila potao, dila posakusi lo u yimbulo, dila pongilangi haku lo tawu, hurumatiya mao ti papamu woli mamamu!”

²⁰ Tawu boyito loloiya mao odiye, ”Guru, nga'amila boyito ma hepilohutu latiya lonto u donggo muda lomayi.”

²¹ Bo ti Isa lomilohe mota oliyo wolo toliango wawu loloiya odiye, ”Bolo tuwawu u i'ilangi to olemu. Ponaolo mota potaliya lomao nga'amila haratamu, wohiya lomao doyiliyo ode tawu-tawuwala ta misikini wawu yio ma mo'otapu harata to soroga. Lapatao ponao lomayi odiya modudua ola-U.”

²² Tawu boyito yilololo tou lo'odungoheo u yiloiya li Isa, lapatao tiyo ma lonao wolo uwolo-wololo sababu harataliyo ngohuntuwa.

²³ Ti Isa lomilohe mota ode mongomuri-Liyo ta hepalita to o-Liyo wawu loloiya odiye, ”Susa da'a ta hekayawa momaso ode Yiladiya lo Allahuta'ala.”

²⁴ Lo'odungoheo loiya boyito mongomuri li Isa hilerani. Bo ti Isa luli lohumbuta mota loiya-Liyo odiye, ”Mongowalau-U, memangi susa da'a momaso ode Yiladiya lo Allahuta'ala.

²⁵ Lebe gambangi unta tuwawu molibaya moli huwango dudetu popobandingiyo mao wolo ta kaya momaso ode Yiladiya lo Allahuta'ala.”

²⁶ Timongoliyo ma lebe hilerani wawu hepobisalawa monto ta ngota ode ta ngota odiye, ”Wonu odiye, tatonu ta mowali salamati?”

²⁷ Ti Isa lomilohe mota olimongoliyo wawu loloiya odiye, ”To manusiya u odito dila ponga lo akali, bo to Allahuta'ala nga'amila mowali. Sababu totonulala uhetuwa-tuwawuwa mowali to Allahuta'ala.”

²⁸ Te Petrus loloiya ode oli Isa odiye, ”Guru, amiyatiya boti ma lolola mayi nga'amila uhetuwa-tuwawuwa wawu ma lodudua oli Guru.”

²⁹ Tametiyo li Isa odiye, ”Tutuliyotutu polele-U mayi ode olimongoli: Titalotita ta molola mao beleliyo, wutatiyo ta lolai, wutatiyo tabuwa, ti mamaliyo woli papaliyo, mongowalaiyo wawu ilengiliyo sababu Wau wawu habari mopiyohe u hepilopotunggulu-U,

³⁰ to duniya botiya olo tawu boyito ma mololimo mayi po'ohetuto piu, bele, wutata ta lolai, wutata tabuwa, ti mama, mongowalao wawu ilengi, wolo arinaya olo. Wawu to aherati tiyo ma mololimo tutumula kakali.

³¹ Bo ngohuntuwa tawu ta hemulowa ma meyoli wawu ta heyoliya ma memulo.”

³² Ti Isa wolo mongomuri-Liyo henaowa ode kota lo Yerusalem wawu ti Isa nao-nao mulo-mulo limongoliyo. Mongomuri boyito hiheraniya wawu tawu ngohuntuwa ta hetunuhe olimongoliyo to dibalaka hewoheya. Lapatao ti Isa lotiyangayi poli mongomuri-Liyo ta mopuladulota wawu Tiyo ma lomulayi hemopotota ode olimongoliyo lo u ma mowali to batanga-Liyo.

³³ Uwa-Liyo mao, ”Ito botiya ma henaowa ode kota lo Yerusalem wawu Walao Manusiya ma wuduwoliyo ode mongotauwa lo imamu wawu ode mongoahali lo Tawurat. Timongoliyo ma momutusani mao mohukumani mate o-Liyo wawu ma mohudu mao o-Liyo ode ta kapiru.

³⁴ Tiyo ma pohehentealiyo, ponulaliyo lo yiyohu, wumbadeliyo lo bubo'o wawu salipuwoliyo sambe mate wawu to dulahe otoluliyo Tiyo ma muli popotumulo mayi lo Allahuta'ala.”

³⁵ Lapatao te Yakobus wole Yahya mongowalae Zebedewus lodudula mota ode oli Isa wawu loloiya odiye, ”Guru, pohile lamiyatiya alihu ti Guru mopowoluwo mayi openu boli wolo u pohile lamiyatiya!”

³⁶ Tametao li Isa ode olimongoliyo odiye, ”Wolo u otohila limongoli pohutuwo-U mayi ode limongoli?”

³⁷ Lapatao timongoliyo dulota lolametao odiye, ”Wohi mayi amiyatiya ijini motihuloa to olowala wawu to oloyihi lo arasi li Guru u gaga da'a.”

³⁸ Bo ti Isa loloiya mao ode olimongoliyo odiye, ”Dila otawa limongoli wolo u hepohile limongoli. Harapu limongoli timongoli sanggupi mongilu tuwango halati u yilumo-U meyalo molihu lo lilihu u tolimo-U.”

³⁹ Tameti mongoliyo odiye, ”Amiyatiya sanggupi.” Ti Isa luli loloiya poli odiye, ”Timongoli memangi ma mongilu tuwango halati u yilumo-U wawu ma lihuwaliyo lo lilihu u ma tilolimo-U.

⁴⁰ Bo pasali lo umotihuloa to olowala-U meyalo to oloyihi-U Wau dila o haku mongohi mayi. Uwito bo wohi-Liyo lo Allahuta'ala ode tawu-tawuwala ta ma tilantu-Liyo mayi motihuloa teto.”

⁴¹ Mongomuri li Isa wuwewo ta mopululota loyingo le Yakobus wole Yahya lo'odungoheo u odito boyito.

⁴² Bo ti Isa lotiyangayi olimongoliyo wawu loloiya odiye, ”Otawa limongoli ta hepomarentawa bangusa-bangusa ta kapiru hepomarentawa raiyati to hila-hila limongoliyo wawu ta dudula'a-dudula'a hepokawasawa olimongoliyo.

⁴³ Timongoli dila mowali odito. Titalotita ta ohila mali uda'a to wolota limongoli, tiyo musi mohinta olimongoli.

⁴⁴ Wawu titalotita ta ohila otilanggulo to wolota limongoli, tiyo musi mowali wato lo ta nga'amila.

⁴⁵ Sababu Walao Manusiya olo lonao mayi dila bome moiyinta. Tiyo lonao mayi mohinta wawu mongohi nyawa-Liyo mowali toloto tawu ngohuntuwa.”

⁴⁶ Lapatao ti Isa wolo mongomuri-Liyo ledungga mota ode kota lo Yeriko. Tou timongoliyo ma lokaluwari mao lonto kota lo Yeriko wolo tawu ngohuntuwa da'a hedudua olimongoliyo, woluwo ta pitoa ngota mohileya, walae Timewus ta hetanggula lo tawu te Bartimewus hulo-huloa to bihu dalalo.

⁴⁷ Tou tiyo lo'odungoheo deu ti Isa tawu lo Najaret woluwo to tambati boyito, tiyo ma lomulayi longuwatio odiye, ”Isa waliya li nabi Dawud, otolianga mayi watiya botiya!”

⁴⁸ Ngohuntuwa tawu hepongentela mao oliyo alihu tiyo motipo'oyo. Bo tombao ma heuda'a mola wuwati'iyo odiye, ”Waliya li nabi Dawud, otolianga mayi watiya!”

⁴⁹ Ti Isa lohuheli wawu loloiya odiye, ”Tiyanga mayi tiyo boyito.” Lapatao timongoliyo ma lotiyangayi ta pitoa boyito wawu loloiya ode oliyo odiye, ”Popolotola mola hilamu wawu tihulayi, peitiyangiyo mota li Isa yio.”

⁵⁰ Ta pitoa boyito lolola mao jumbaliyo wawu ma lato tilumayango lonao mota ode li Isa.

⁵¹ Ti Isa lohintu mao ode oliyo odiye, ”Wolo u otohilamu pohutuwo-U mayi de olemu?” Tametao lo ta pitoa boyito odiye, ”Guru, popowaliya mayi watiya mowali mo'onto!”

⁵² Lapatao ti Isa loloiya mao ode oliyo odiye, ”Ponaolo yio, imanimu ma lo'osalamati olemu!” Lapatao tiyo ma lato lo'onto wawu ma lolunuhe oli Isa.

Markus

Video Markus 10

Ikuti Kami:

KONTAK | PARTISIPASI | DONASI