Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sasudah tu Isa Almasih barangkek dari tampaik tu, mako payilah Baliau ka daerah Yudea, sarato jo daerah di subarang Sungai Yordan. Sambuah urang bi tibo baliak, ba uruang di sakuliliang Baliau. Bakcando nan biaso, Baliau muloi mambarikan pangajaran kabake urang-urang tu.

² Babarapo urang Farisi bi tibo pulo, bamukasuik nak ka manjarek Isa Almasih jo kato-kato. Urang-urang tu bi batanyo, "Manuruik atuaran agamo kito, layi buliahkoh urang mancaraikan bininyo?"

³ Isa Almasih manjawab, "Apo atuaran nan lah di ajakan dek Nabi Musa kabake angku-angku?"

⁴ Manjawablah urang-urang Farisi tu. "Nabi Musa layi mambuliahkan urang balaki bini bacarai, asakan layi mambuwek surek carai talabiah dawulu."

⁵ Bakatolah Isa Almasih, "Mangkonyo Nabi Musa manulihkan atuaran nan bakcando itu, dek karano angku-angku sabana sulik untuak di aja."

⁶ "Tapi sajak samulonyo, dikutiko Allah manjadikan manusia, lah dikatokan baraso, 'Allah manjadikan manusia, laki-laki sarato jo padusi.

⁷ Itulah sababnyo, mangko laki-laki payi maninggakan urang gaeknyo, untuak basatu jo bininyo,

⁸ mako kaduwonyo lah manjadi satu.' Jadi, inyo indak duwo urang lai, tapi lah manjadi satu.

⁹ Itulah sababnyo, apo nan lah dipasatukan dek Allah, indak buliah doh dicaraikan dek manusia!"

¹⁰ Sasudah inyo bi masuak ka rumah, pangikuik-pangikuik Isa Almasih bi batanyo kabake Baliau tantang parkaro itu.

¹¹ Baliau bakato, "Siya urang nan mancaraikan bininyo, sudah tu inyo babini ka padusi nan lain, urang tu samo jo bajina tu ukunnyo.

¹² Baitu pulo, jikok padusi nan maninggakan lakinyo, sudah tu inyo balaki jo laki-laki nan lain, inyo tu samo pulo jo bajina tu ukunnyo."

¹³ Ado urang bi mambawok-i paja-paja ketek kabake Isa Almasih, supayo buliah nak di awai, sarato jo dibarakaik-i dek Baliau. Tapi pangikuik-pangikuik Baliau mambangihi urang-urang tu.

¹⁴ Maliyek kajadian tu Baliau bangih pulo mako bakatolah Baliau kabake pangikuik-Nyo, "Padiyakan sajolah paja-paja tu nak bi tibo kabake Ambo! Jan ditagah pulo inyo lai, dek karano, urang-urang nan sarupo ikolah nan ka jadi pamiliak Karajaan Allah.

¹⁵ Kana-ilah apo nan Ambo katokan ko! Siya nan datang mangadap kapado Allah, tapi atinyo indak sarupo jo ati paja ketek, mako inyo indak ka dapek doh masuak Karajaan Allah."

¹⁶ Sasudah mangatokan nan sarupo itu, Isa Almasih mamaguik paja-paja tu, kudian Baliau malatakkan tangan Baliau ka paja tu surang-surang, untuak mambarakaik-inyo.

¹⁷ Kutiko Isa Almasih manaruihkan pajalanan-Nyo, ado urang tibo balari-lari mangaja-i Baliau. Urang tu sujuik di adok-an Baliau sarato batanyo, "Angku Guru nan baiak budi, apo nan musti ka ambo karajokan, supayo ambo buliah mandapek iduik sajati nan kaka?"

¹⁸ "Baa mangko angkau katokan, Ambo baiak?" tanyo Isa Almasih. "Indak ado doh nan baiak, salain daripado Allah sandiri.

¹⁹ Angkau kan lah tawu, jo sagalo parentah Allah, 'Jan mambunuah, jan bajina, jan mancilok, jan bakato duto, jan mangicuah, aromaik-ilah apak jo mandeh.'"

²⁰ "Angku Guru," kecek urang tu, "kasadonyo parentah tu lah ambo karajokan sajak dari mudo ambo."

²¹ Isa Almasih mancaliak kabake urang tu, Baliau maraso ibo, mako bakatolah Baliau, "Ado ciyek lai nan paralu angkau karajokan. Payilah juwa kasadonyo arato angkau tu; sudah tu, agiahkan pitihnyo kabake urang-urang nan bansaik, isuak angkau ka mandapek arato di sarugo. Sasudah tu datanglah kamari, turuikkanlah Ambo."

²² Mandangakan Isa Almasih mangecek bakcando itu, urang tu indak lamak atinyo, sudah tu inyo barangkek dari tampaik tu, atinyo rusuah dek karano aratonyo sambuah.

²³ Mako mancaliaklah Isa Almasih kabake pangikuik-pangikuik-Nyo, sudah tu Baliau bakato, "Sabana sulik bagi urang nan kayo untuak masuak Karajaan Allah!"

²⁴ Pangikuik-pangikuik Baliau bi tacangang, dek mandangakan kato-kato Baliau tu. Tapi Baliau bakato pulo, "Oih anak-anak-Den, iyo sabana sulik untuak masuak Karajaan Allah!

²⁵ Labiah mudah lai unto masuak lubang pinjayik, daripado urang kayo masuak Karajaan Allah."

²⁶ Kato-kato Isa Almasih tu, mambuwek pangikuik-Nyo batambah tacangang, sainggo pangikuik Baliau tu bi batanyo sasamo inyo, "Jikok baitu, siyalah urang nan ka dapek salamaik?"

²⁷ Isa Almasih mancaliak ka pangikuik-Nyo tu, sambia bakato, "Kok di manusia itu mustayie, tapi bagi Allah indak ado doh nan mustayie; sagalo sasuatu mungkin bagi Allah."

²⁸ Sudah tu si Petrus bakato, "Liyeklah kami ko Ngku, kami lah maninggakan sagalo-galonyo, dek karano nak ka manuruikkan Angku."

²⁹ Bakato pulolah Isa Almasih, "Picayolah jo kecek Ambo: urang nan lah maninggakan rumah tanggonyo, atau dunsanaknyo nan laki-laki, atau dunsanaknyo nan padusi, atau mandehnyo, atau apaknyo, atau anak-anaknyo, ataupun sawah ladangnyo, dek karano inyo manuruikkan Ambo, sarato dek karano di Injil nan dari Allah,

³⁰ mako urang tu dikutiko nan kiniko juwo, inyo ka manarimo nan labiah banyak. Inyo ka mandapek saratuih kali lipek, rumah, dunsanak laki-laki, dunsanak padusi, mandeh, anak-anak, sawah jo ladang, -- biyapun disaratoi pulo dek kasansaroan. Isuak dijaman nan ka tibo, inyo ka manarimo iduik sajati nan kaka.

³¹ Tapi banyak pulo ka tajadi, urang nan kiniko inyo nan tadawulu, bisa sajo isuak inyo ka manjadi urang nan takudian, baitu pulo sabaliaknyo, sambuah pulo urang nan kiniko inyo nan takudian, bisa sajo isuak inyo ka manjadi urang nan tadawulu."

³² Isa Almasih sarato jo pangikuik-pangikuik-Nyo sadang dalam pajalanan ka Yerusalem. Baliau bajalan paliang di muko, pangikuik-pangikuik-Nyo bi cameh kasadonyo. Urang-urang nan ma iriangkan-Nyo maraso takuik pulo. Kudian Baliau ma imbau pangikuik-pangikuik-Nyo pulo baliak, sacaro tasandiri, Baliau mambaritawukan kabake pangikuik-Nyo, apo nan ka tajadi kudian di diri Baliau.

³³ Isa Almasih bakato, "Dangakanlah kecek Ambo ko, kito kiniko sadang manuju ka Yerusalem. Tibo disinan baiko Anak Manusia ka disarahkan kabake imam-imam kapalo, sarato jo kabake guru-guru agamo Yahudi. Inyo ka di ukun mati, kudian disarahkan kabake urang-urang nan indak ba Tuhan Allah.

³⁴ Urang-urang tu ka mampaulah-ulahkan Inyo, ka maliyua-i Nyo, ka manangani Nyo, sudah tu ka manyalibkan Inyo. Tapi di ari nan katigo Inyo ka iduik baliak, kaluwa dari kubua."

³⁵ Sudah tu si Yakobus jo si Yahya, anak-anak Zebedeus, tibo kabake Isa Almasih. "Angku Guru," kecek inyo, "ado sasuatu nan ka kami mintak kabake Angku, kok dapek Angku agiahkanlah untuak kami."

³⁶ "Apo tu nan angku-angku mintak, supayo Ambo agiahkan untuak angku-angku?" tanyo Baliau.

³⁷ Nan baduwo tu bi manjawab, "Jikok isuak Angku lah duduak di ateh kurisi kamuliaan, kami niyo duduak di dakek Angku, surang di sabalah suwok Angku, nan surang lai di sabalah kida Angku."

³⁸ "Indak tantu doh ko di angku-angku apo nan bamintak," kecek Isa Almasih kabake inyo, "Layi lanteh angan angku-angku maminun isi cawan sansaro, nan ka Ambo minun, layi talok masuak ka kancah sansaro nan ka Ambo masuak-i?"

³⁹ "Layi," kecek nan baduwo tu. Mako Isa Almasih bakato pulo kabake inyo, "Batua angku-angku ka maminun pulo isi cawan sansaro nan ka Ambo minun, angku-angku iyo ka masuak pulo ka dalam kancah sansaro nan ka Ambo masuak-i.

⁴⁰ Tapi parkaro siya nan ka duduak di sabalah suwok, siya nan ka duduak di sabalah kida Ambo, itu indak Ambo doh nan ka manantukannyo. Tapi Allah lah nan ka manantukan, kok siya-siyanyo nan ka duduak di sabalah Ambo tu."

⁴¹ Kutiko kasapuluah urang pangikuik Isa Almasih nan lain, mandanga kajadian tu, inyo bi bangih kabake si Yakobus jo ka si Yahya.

⁴² Akienyo Isa Almasih ma imbau kasadonyo pangikuik-Nyo, Baliau mangatokan, "Angku-angku tawu, baraso pamimpin-pamimpin banso nan indak ba Tuhan Allah, suko manindeh rakyaiknyo. Panjabaik-panjabaik di nagari tu suko pulo mamaso rakyaik.

⁴³ Tapi, angku-angku indak buliah doh bakcando itu! Malah musti sabaliaknyo, urang nan baniyaik nak manjadi urang nan takamuko, di antaro angku-angku, inyo musti namuah andaknyo manjadi palayan angku-angku.

⁴⁴ Baitu pulo urang nan baniyaik nak manjadi urang nan partamu, di antaro angku-angku, mako inyo musti namuah andaknyo manjadi budak angku-angku.

⁴⁵ Dek karano, Anak Manusia datang indak untuak dilayani doh. Tapi Inyo datang untuak malayani, sarato untuak manyarahkan angok-Nyo, untuak malapehkan banyak urang dari doso."

⁴⁶ Tibolah urang-urang tu di kota Yerikho. Kutiko Isa Almasih jo pangikuik-Nyo, sarato jo urang nan banyak, barangkek dari kota tu, ado surang urang buto nan sadang mintak sidakah, duduak di tapi jalan. Namonyo si Bartimeus, anak dari Timeus.

⁴⁷ Kutiko inyo mandanga, baraso nan sadang lalu tu adolah Isa Almasih urang Nazaret, mako ba imbaulah inyo, "Oih Isa Almasih, Anak Nabi Daud! Iboilah ambo ko!"

⁴⁸ Mako bi bangihlah urang nan banyak kabake inyo, inyo disuruah anok. Tapi inyo malah ma ariak labiah kareh daripado cako, "Oih Anak Nabi Daud, iboilah Ambo ko!"

⁴⁹ Mako barantilah Isa Almasih bajalan, Baliau bakato, "Payilah imbau inyo." Mako payilah urang-urang tu ma imbau si Bartimeus. Urang-urang tu bi bakato kabake inyo, "Anoklah lai! Wa-ang di imbau dek Isa Almasih, tagaklah!"

⁵⁰ Si Bartimeus mambaekan jubahnyo, sudah tu inyo bagageh tagak, payi ka adok-an Isa Almasih.

⁵¹ "Apo nan niyo nak angkau mintak, nan ka Ambo pabuwek untuak angkau?" tanyo Isa Almasih kabake inyo. Inyo manjawab, "Ngku Guru, kok dapek mato ambo ko bisa untuak maliyek."

⁵² "Alah, payilah lai," kecek Isa Almasih, "dek karano angkau picayo kabake Ambo, itu mangkonyo angkau cegak." Disakutiko tu juwo, mato si Bartimeus bisa untuak maliyek. Inyo lah sato pulo ma iriangkan Isa Almasih bajalan.

Markus

Video Markus 10

Ikuti Kami:

KONTAK | PARTISIPASI | DONASI