Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali yako etu, tempo i Yesu baemo, tempo etu re’e samba’a tau to rato’oka i Yohanes to Pombaptis. Yohanes etu ia mula mampakarebaka tau tuntu i mPue Allah nja’u pada bone ri propinsi Yudea.
2 Ia manganto’oka sira, “Pojeamo, apa mosumo temponya i Pue Allah damawali Makole ri lino.
3 Wali i Yohanes etu semo to nato’o nto pantuntu tuntu i mPue Allah, i Yesaya, tempo owi. Ia manganto’o, “Re’e tau maroso loonya mampogomboka tau boros nja’u pada bone, ia manganto’oka tau etu, ‘Tamo masae i Pue darata. Wali ewa naika ntau mampasilongaka yami i makole jaya see taa masuli palinjanya, ewa wetu seja nuika ngkomi mampasilonga raya ngkomi damangaya i Pue.’” Wali etu semo to natulis i Yesaya tempo owi.
4 Wali i Yohanes, to mangabanang gombo etu, ia mangika seja lengko nto pantuntu tuntu i mPue tempo owi, see naka ia pakenya pela nu binatang unta, pasi salipinya seja pela nu binatang. Pasi see naka pangkoninya kaborosinya mpa’o pei juu.
5 Wali tempo i Yohanes nja’u nja’u pada bone etu, boros tau to mangampago ia. Tau etu sangga’a yako ri kota Yerusalem, pasi sangga’a wo’u yako samparia lipu ntau to ri propinsi Yudea, pasi sangga’a yako samparia lipu ntau to ri koro Yordan.
6 Tau etu mampadongeka gombo i Yohanes pasi mampongakung dosa nsira, panewa i Yohanes mangabaptis sira nja’u koro Yordan etu.
7 Wali tempo etu re’e seja boros to Yahudi to yau seja mampago danabaptis i Yohanes. Ri oyo ntau etu malagi to aliran Parisi pasi malagi seja to aliran Saduki. Pei tempo i Yohanes mangkita sira ma’i, ia manganseko sira, to’onya, “Gete, komi ewa ule to mampeyaa mampiyaika apu nja’u pada! Wimba, komi bara mampobuuka ane ma’i darabaptis, ane ewa see komi maya mampiyaika huku to danaporata i mPue Allah? Gete, taa mawali ewa wetu, apa ane ojo gombo ngkomi to manoto, nempo roomo rabaptis pei komi tiroo damangarata huku nu dosa ngkomi.
8 Pei ane monso pu’u komi majea yako ri dosamu, ika lengko to masipato naika ntau to majeamo.
9 Pasi ne’e mampobuuka, ‘Kami taa darahuku apa kami wiyaa i Abraham.’ Ne’e mampobuuka ewa see apa ane naporoe, i Pue Allah nakoto mampakaja’aka yau komi panewa mangawali yau watu mayunu si’i damawali wo’u tau to wiyaa i Abraham damangabolos komi.
10 Wali huku i mPue Allah resi komi maya raporapaka ewa wase to raokotaka damangantowo yau kaju. Wali samparia kaju to taa mampowuaka wua to matao, kaju etu daratowo yau pei darapanasoka yau la’u apu.” Etu semo rapa to nato’oka i Yohanes sira.
11 Panewa ia manganto’oka wo’u tau boros, to’onya, “Aku mangabaptis komi mangika tondong komi majeam. Wali tempo aku mangabaptis komi etu, aku mangampake ue. Pei re’e tau to dama’i wo’u yako aku si’i, Ia semo to bae-bae kuasaNya pei aku. Ia bae kojo anggaNya, see naka aku mangepe aku nempo ojo mangangkeni sapatuNya taa masipato. Wali tau to dama’i etu taa damangabaptisika komi ue. Re’e komi to Ia damangabaptisika i Nosa Mapasing batuanginya Ia damampaporoo i Nosa Mapasing ri raya ntau etu. Pei re’e wo’u komi to danabaptisika apu batuanginya Ia damaposaka tau to etu ri raya nu apu.
12 Wali tau to dama’i etu raparapaka ewa tau to damanapi. DukuNya re’e ri paleNya pasi Ia damangantapis weaNya naka yongo. Panewa weaNya etu Ia damamposaka ri raya ngkonda, pei otanya Ia damamporomung pei mangantunu yau ri apu to tare to maya mangampika.” Etu semo gombo i Yohanes resi to Yahudi to aliran Parisi pasi to aliran Saduki pasi samparia tau boros etu mangkonong huku i mPue Allah to darata.
13 Wali yako etu rata i Yesu yako nja’u Galilea. Ia rata resi i Yohanes nja’u koro Yordan see danabaptis i Yohanes.
14 Pei i Yohanes taa rani. Ia manganto’o, “Gete, maka pei Komi ma’i resi aku darabaptis? To masipato Komi semo mangabaptis aku!”
15 Pei i Yesu mangansono, to’oNya, “Ikamo apa masipato kita mangabanang samparia anu to singkonong pei i Pue Allah.” Wali i Yohanes mampalaika gombo i Yesu pei mangabaptis Ia.
16 Wali ojo karoonya i Yesu rabaptis etu, Ia mansaka miyai muni yako ri ue. Tempo i Yesu miyai yako ri ue etu, yangi tiloka pei Ia mangkita i Nosa Mapasing yako ndate yangi ewa tagou tudu ri wawoNya.
17 Pasi tempo etu re’e radonge loo to yako ndate saruga, loo etu manganto’o, “Si’i semo AnangKu to kuporayang kojo. Aku masanang kojo resi Ia.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA