Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani panorang ai jongjong ma si Johannes Pandidi, anjaha marambilan ma ia i halimisan Juda,
2 nini ma, “Paubah nasiam ma uhur nasiam, ai domma dohor Harajaon nagori atas in!
3 Pasalsi do na pinatugah ni Nabi Jesayas marhitei na hinatahonni, ʻSora na dilo-dilo i halimisan! Pasirsir nasiam ma dalan bani Tuhan in, papintor nasiam ma sidalanan-Ni!ʼ”
4 Ia si Johannes, ambulu ni unta do hiouni, hulingkuling do gonditni, anjaha sipanganonni balang pakon manisan ni lobah.
5 Jadi roh ma halak marayaksi hun Jerusalem, hun sab Judea ampa hun haganup pamah Jordan.
6 Jadi ididi si Johannes ma sidea i Bah Jordan ai, dob isopotkon sidea bei dousani.
7 Dob ididah buei halak Parisei pakon Sadukei marayak pandidionni ai, nini ma hubani sidea, “Nasiam ginompar ni ulog darih! Ise do na mangajari nasiam, boi maluah nasiam humbani ringis na sihol roh?
8 Parbuahkon nasiam ma buah na tama, paboa na dob mubah uhur nasiam,
9 anjaha ulang ma ninuhur nasiam ibagas, si Abraham do bapanami! Huhatahon ma bani nasiam, tarjadihon Naibata do anak bani si Abraham humbani batu on.
10 Domma tampei tangkei bani bona ni hayu. Ai pe, sirobohon do sagala hayu na so marbuahkon na madear, anjaha sigijigkononkon hubagas apuy!
11 Ia ahu, bah do hudidihon bani nasiam, mangkatahon paubah uhur, tapi gogohan ope hun bangku na roh hun pudingku, gari mamboan sipatu-Ni seng talup ahu. Didihonon-Ni do bani nasiam Tonduy Na Pansing ampa apuy.
12 Bani tangan-Ni do pamurpuran, paborsihon-Ni ma pardogeian-Ni, anjaha patumpuon-Ni ma omei-Ni hu tuangan-Ni, tapi lamlam-Ni tutungon do ai bani apuy na so ra mintop.”
13 Ijia roh ma Jesus hun Galilea hu Bah Jordan, laho padidihon diri-Ni hubani si Johannes.
14 Tapi manjua do si Johannes, nini ma, “Ahu do namin patut didion-Mu, mase ma Ham roh bangku?”
15 Tapi ibalosi Jesus ma ia, “Paturut ma sonai lobei, ai sonai do patut hita manggoki sagala hapintoron!” Jadi ibalosi ma.
16 Ase dob tardidi Jesus, mintor naik ma Ia humbagas bah ai. Anjaha tonggor ma, mungkab ma langit, anjaha taridah ma susur hun langit Tonduy ni Naibata songon asas, lanjar sogop hu Bani.
17 Lanjar nini sada sora ma hun nagori atas, “On do Anak, haholongan ni uhur-Hu, marosuh do uhur-Hu mangidah-Si!”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA