Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kareb ineh Yahya luk Ngerereb iné' mada' déi' su luk ali-ali bang bawang Yudia,
2 kebalaneh, "Do' muyuh uren ratnan sala' muyuh, ngaceku Imet surga pangeh muneng."
3 Ngaceku ini ieh luk pangeh bila Nabi Yesaya, keburi'neh, "Seburur lemulun ngitang déi' su luk ali-ali, kebalaneh, 'Nganau' temina' dalan Tuhan, idi ngesiri lisangen-lisangenNeh.'"
4 Idi ayung Yahya ineh buluh pung unta, idi abet awa'neh kubil pung, idi akanneh, ieh ineh kato idi duru' tebikan.
5 Idi lemulun iné' neneh rat Yerusalim idi aput tana' Yudia, idi ratnan amung-amung bawang luk libut-libut Abpa' Yarden.
6 Idi ideh nengamo sala'deh, idi Yahya nengerereb nedeh bang Abpa' Yarden.
7 Kareb Yahya nenier nelun Parisi idi Saduki amé' mutuh rerebpen, keburi'neh nedeh, "O muyuh menipeh, idéké luk nemada' nemuyuh ratnan muyuh miak uen ngulun ratnan useh Allah luk macing?
8 Do' muyuh ngeruat bua' luk petulu dengan uren.
9 Idi aleg muyuh ngerawé bang niat muyuh, 'Ibrahim ineh taman tau,' ngaceku ui pebala nemuyuh, Allah melalud ngisu' batu-batu ini mangun ku inul Ibrahim.
10 Idi uai pangeh temina' inan uat kayuh, idi anid-anid lawa kayuh luk na ngeruat bua' luk do' miak tebangen idi talan bang apui.
11 Ui ngerereb nemuyuh bang abpa', mangun ku tanu' muyuh pangeh nuren, iamo' Ieh luk macing muci rat negku ngerereb nemuyuh ku Roh Meligan idi apui. Ieh meluun lalud ratnan ui, idi ngiding kasutNeh pana' ui na mayu.
12 Idi Ieh ngimet bebperNeh, pad Ieh rumik amung padé. Idi Ieh ngamung padéNeh bang lepoNeh, iamo' lipangneh miak sabpenNeh ku apui luk na miak milep."
13 Kareb idi Yésus iné' rat Galilia macing Yarden sikal rerebpen Yahya.
14 Iamo' Yahya nemebpeng Neneh, kebalaneh, "Do' ui rerebpenMu, ngudehké Iko amé' mutuh negku ngerereb Namu?"
15 Iamo' kebala Yésus, "Aganeh nekini, ngaceku do' tau maya' amung-amung luk pian Allah." Idi Yahya nemaya' balaNeh.
16 Idi kareb Yésus pangeh rireb, Ieh petacu numak rat bang abpa'. Idi langit pana' mukab, idi Yésus nenier Roh Allah temuruhn kudeng aceh suit sukur idi nucep luunNeh.
17 Idi inan aceh tang rat bang langit luk nepebala, "Ini AnakKu luk inanKu mawa, idi Ui mawang niat Neneh."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA