Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Su tempo ene riměntạe i Yohanes Mananahani su wanua l᷊inggi su Yudea kụ nanětạe naněntiro.
2 "Pěmpẹ̌tobate wọu kal᷊awọu rosanu," angkuěnge, "batụ u Mawu Ruata e seng tạ karěngụe sarung mẹ̌parenta kere sěngkatau Ratu!"
3 I Yohanes ini e ilẹ̌habar'u Nabi Yesaya su ral᷊ungu manga wawerane kere ini, "Piạ tau mạmohang su wanua l᷊inggi, 'Diahiko ral᷊eng baugu Mawu e; teneko raral᷊engang baug'i Sie.'"
4 I Yohanes měpẹ̌pakeangu pakeang bọu rukụ u onta. Papehẹ e wọu pisim binatang, arawe kaěnge kal᷊imbotong ringangu ghul᷊ang katiupang.
5 Lawọ taumatang Yerusalem bọu patikụ banuang Yudea ringangu wọu manga wanua mạngělikụ Sal᷊ụ u Yordan nahunděnta su anung Yohanes.
6 I sire mạngakun kal᷊awọu rosan sire, kụ i Yohanes něnahani si sire su Sal᷊ụ u Yordan.
7 Lawọ l᷊ai tau Farisi ringangu Saduki němpẹ̌děnta su anung Yohanes mědeạu makisahani. Kai sarạeng i sie nakasilo si sire riměnta, i sie nẹ̌berạe si sire, "I kamene taumata ral᷊aị! I sai tangu nẹ̌bera u i kamene mal᷊iwirẹ̌ bọu hukumangu Mawu Ruata kụ sarung humombang?
8 Todẹko ringangu kakanoạ i kamene u i kamene seng nẹ̌tobatẹ̌ bọu kal᷊awọu rosang kamene.
9 Abe pěmpangěnnau i kamene mal᷊iwirẹ̌ bọu hukumang ual᷊ingu mẹ̌bera'u i Abraham kai i upungu. Kasingkạ, bọu manga watu tamai Mawu Ruata e makakoạ bue pal᷊ahite waug'i Abraham!
10 Bal᷊iung seng mạsasadia tadeạu ipanuwang kalu sarang manga hamụ e. Apang kalu ta mẹ̌bawuam buane mapapia e sarung tuwangeng, kụ iwahung su putung.
11 I kamene takụ sahaniangu akẹ tadeạu kasingkatengu i kamene seng němpẹ̌tobatẹ̌ bọu rosang kamene; arawe sarung duměnta samuring iạ e, ute sarung manahani si kamene dingangu Rohkẹ̌ u Ruata ringangu putung. I Sie limembọeweng kasěllahe wọu iạ e. Kal᷊ingung mẹ̌bawa sapatune lai iạ tawe hinone.
12 Su l᷊imane piạ nihung pẹ̌taẹ̌kangu kěbị ěmmene sarang mawurẹ̌si. Ěmme e sarung ikomol᷊ẹ̌ su ral᷊ungu wasung, arawe wal᷊ẹ̌kane ute tutungang su putung ta masasẹ̌bu."
13 Su orasẹ̌ ene i Yesus nẹ̌buạ bọu Galilea sarang Sal᷊ụ u Yordan. Su tampạ ene i Sie himaung si Yohanes kụ mědẹ̌dorong makisahani.
14 Arawe i Yohanes něnal᷊ukạ nametọ dorong'E ene. I Yohanes nẹ̌berạe, "Kai iạ e hinon sahaniang i Tuang. Kụ orasẹ̌ ini e kawe i Tuang diměnta su anuku."
15 Kai Mawu Yesus simimbah'u, "Měngkateko walạe pěněntal᷊ang su orasẹ̌ ini. Batụ u kai kere ini i kitẹ mẹ̌koạ kěbị ikẹ̌kapulung Duata." Tangu i Yohanes něnahanị e Mawu Yesus.
16 Bọuten nisahani, Mawu Yesus měngkatewe siměpụ bọu akẹ u sal᷊ụ e. Arakutẹu langịe natopẹ e kụ Mawu Yesus nakasilo Rohkẹ̌ u Ruata ěnnaẹ limintụ kere manụ paluma kụ dimorọ si Sie.
17 Mase nakaringihe tingih'u Mawu Ruata něhengetang, "Ini e kai Ahusẹ̌-Ku ikẹ̌kěndagẹ̌. I Sie makạl᷊uasẹ̌ naung-Ku."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA